09/08/2020 03:34
728 x 90

Tovuzda təxribat qardaş Türkiyəni daha da sərtləşdirdi – “...bütün imkanlarla Azərbaycanı qoruyacağıq”...

Məhəmməd Əsədullazadə: “Hesab edirəm ki, Türkiyədən Azərbaycana dəstək və Ermənistana mesaj ciddi bir prosesdir”

img

Ermənistan silahlı qüvvələrinin bölmələrinin Azərbaycanın Tovuz bölgəsinə hücumunu şiddətlə qınayırıq. Dost və qardaş Azərbaycan xalqına və hökumətinə şəhidlərə görə başsağlığı verir, yaralılara şəfa diləyirik.

Bu fikirləri Türkiyə Xarici İşlər Nazirliyi Ermənistan silahlı qüvvələrinin bölmələrinin Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə hücuma keçməyə cəhd göstərməsi ilə bağlı yaydığı açıqlamada bildirib. Qeyd edilir ki, Ermənistanın xəstə təfəkkürlü millətçilik anlayışının yeni bir forması olan bu hücumun qarşısının Azərbaycan tərəfindən qətiyyətlə alınması təcavüzkar niyyətin cavabsız qalmayacağını göstərib.

Vurğulanır ki, Ermənistanın beynəlxalq ictimaiyyətin diqqətini Azərbaycanın tərkib hissəsi olan Dağlıq Qarabağ və ətraf rayonları illərdən bəri əsassız olaraq işğalda saxlaması faktından yayındırmaq üçün münaqişəyə yeni bir don geyindirməsi, problemin siyasi həllinin qarşısını kəsmək üçün göstərdiyi təcavüz cəhdi nəticəsiz qalmağa məhkumdur.

Ermənistan tərəfi bu cür təhlükəli taktikalardan əl çəkməli, ağıllı və hüquqi yol seçməlidir. Həddini aşan əməllərlə sərgüzəştlik etmək Ermənistanın zəifliyini ortaya qoyur, bölgəmizdəki sülh və sabitliyə böyük maneə yaradır. Ermənistanın öz təcavüzkarlığını ört-basır etmək cəhdləri beynəlxalq ictimaiyyət tərəfindən heç bir şəkildə qəbul edilməyəcək.

Türkiyə ərazi bütövlüyünü qorumaq mübarizəsində bütün imkanları ilə Azərbaycanın yanında yer almaqda davam edəcək.

 Bütün bu deyilənlərin fonunda, sözügedən bəyanatda Türkiyə bütün imkanları ilə Azərbaycanın ərazi bütövlüyünü qoruyacaq fikri nə deməkdir?

  • “Rəsmi İrəvan anlamalıdır ki, onun bu təxribatları irimiqyaslı müharibəyə gətirə bilər”

Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu:“Ermənistanın ölkəmizə qarşı təcavüzünün qarşısı, əlbəttə ki, ordumuz tərəfindən rəşadətlə alınır. Tovuz istiqamətində Ermənistanın bu cəhdləri uğursuz oldu. Buna baxmayaraq, işğalçı ölkənin təxribatları davam edir. Hesab edirəm ki, Türkiyədən Azərbaycana dəstək və Ermənistana mesaj ciddi bir prosesdir. Bu, əgər Ermənistana üçüncü tərəf kömək edəcəksə, Ankara da Azərbaycana kömək edəcək mesajıdır. Bundan əlavə, Türkiyədən bu mesajı almaq, demək olar ki, beynəlxalq siyasi nizamda Ankaranın güclü bir ölkə olduğunun göstəricisidir. Hesab edirəm ki, Türkiyə Azərbaycana istənilən köməyi əsirgəməyəcək. Çünki Cənubi Qafqazda baş verənlər Ankaranın da geosiyasi maraqlarını təhdid edə bilər. Məhz Ankaranın bu mesajı Azərbaycanın meydanda tək olmadığının göstəricisidir. Rəsmi İrəvan anlamalıdır ki, onun bu təxribatları irimiqyaslı müharibəyə gətirə bilər”.

Görünən odur ki, Türkiyənin məlum bəyanatı Azərbaycana ciddi dəstək hesab olunur.

Vidadi ORDAHALLI 

Son xəbərlər