Ramil Hüseynov:“Hesab edirəm ki, sessiyada hər hansı bir problemin olacağı güman olunmur”
Qoşulmama Hərəkatının sammitində Azərbaycan Prezidenti İlham Əliyevin BMT-nin Baş Assambleyasının koronavirusa həsr edilmiş xüsusi sessiyasının keçirilməsi barədə təşəbbüsünün BMT-də müzakirəsi artıq başlanır, hərçənd, xüsusi sessiyanın keçirilməsi müddəti hələ müəyyən edilməyib.
Bunu Rusiyanın Xarici işlər naziri Sergey Lavrov deyib.
Nazir deyib ki, Qoşulmama Hərəkatının, - bu Hərəkata hazırda Azərbaycan sədrlik edir, - təşəbbüsü ilə Baş Assambleyanın COVID-19 mövzusuna həsr edilmiş xüsusi sessiyası çağırılacaq, lakin sessiya bir qədər sonra keçiriləcək:“Bu gün, iyulun 10-da isə xüsusi sessiyanın çağırılmasında rəhbər götürüləcək qaydaların prosedur baxımından tərtibatı başlanır, çünki koronavirus infeksiyası şəraitində qeyri-adi distant formada çağırılan bütün tədbirlər təşkilati-prosedur məqamları baxımından razılaşdırılmalıdır. Ona görə də bu gün yalnız prosedur məqamları müzakirə ediləcək, xüsusi sessiyanın çağırılması tarixi isə hələ müəyyən edilməyib”.
S.Lavrov qeyd edib ki, BMT-də pandemiya ilə bağlı məsələlər üzərində işdə müəyyən nəticələr əldə edilib:
“Mən düşünürəm ki, BMT-ni COVID-19 təhdidlərinə münasibət bildirmək baxımından gecikmiş, astagəl adlandırmağa əsasımız yoxdur. Baş Assambleya barədə danışmalı olsaq, o artıq iki dəfə toplaşıb. Bu vəziyyətin ilkin mərhələsində koronavirusa qarşı mübarizə üzrə dünya birliyinin vəzifələrinə həsr edilmiş iki qətnamə qəbul edilib. Nəhayət, lap yaxın vaxtlarda Təhlükəsizlik Şurası COVID-19 barədə qətnamə qəbul edib. Biz bunu uzun müddət edə bilmirdik, çünki amerikalılar bu sənəddə Ümumdünya Səhiyyə Təşkilatının rolunun qeyd olunmasını qətiyyətlə istəmirdilər. Sonda həm bu rolu qeyd etməyə, həm də konsensusu təmin etməyə imkan verən sözlər tapıldı”.
Bütün bu deyilənlərin fonunda maraqlıdır, sözügedən problem bizim prezidentin təşəbbüsü ilə çağırılan xüsusi sessiyada da ola bilərbi? Bu kimi çətinliklər yarana bilərmi?
Məsələyə münasibət bildirən siyasi ekspert Ramil Hüseynov ÜST barədə beynəlxalq çəkişmələrin Azərbaycanın təşəbbüsü ilə keçirilən xüsusi BMT sessiyasının qərarlarına mane ola biləcəyini istisna etdi: “Məsələ ondadır ki, Lavrov artıq sözügedən məsələ ilə bağlı konsensusun əldə olunduğunu dedi. Pis-yaxşı, ÜST ilə bağlı anlaşma əldə olunub. O baxımdan düşünmürəm ki, Azərbaycanın təşəbbüsü ilə keçirilən sessiyada belə problemlər ortaya çıxsın. Məsələ ondadır ki, pandemiya dünyada çox ciddi bir problemə çevrilib. Dünya ölkələrinin bu bəladan xilas olmaq üçün əməkdaşlıq etmələri, birgə çıxış yolu tapmaları vacibdir. Necə deyərlər, bu istiqamətdə birgə hərəkət etməyə məhkumdurlar. Başqa bir tərəfdən, Azərbaycanın nüfuz faktoru var. Qoşulmama Hərəkatı yekdilliklə rəsmi Bakının təşəbbüsünü dəstəkləyib. Eyni zamanda, BMT Təhlükəsizlik Şurasının daimi üzvləri Azərbaycanın təşəbbüsünü dəstəkləyir. Bütün bunlardan çıxış edərək hesab edirəm ki, sessiyada hər hansı bir problemin olacağı güman olunmur”.
Belə məlum olur ki, narahat olmağa dəyməz.
Vidadi ORDAHALLI
