Məlum olduğu kimi, Azərbaycan ATƏT-in kütləvi informasiya vasitələrinin azadlığı məsələləri üzrə nümayəndəsi vəzifəsinə növbəti üç il üçün fransalı Arlem Dezirin mandatının təsdiqlənməsinə razılıq verməyib. Nəticədə məsələ həll olunmamış qalıb. Səbəb də budur ki, Dezir bu mandatdan sui-istifadə etdi, onun mahiyyətini tam başa düşmədi və mandatdan nəzərdə tutulmuş istiqamətlər üzrə istifadə etmədi.
Bu arada sözügedən məsələ ilə bağlı Article-19, Jurnalistləri Müdafiə Komitəsi, Sərhədsiz Reportyorlar, Avropa Mətbuat və KİV Azadlığı Mərkəzi, Avropa Jurnalistlər Federasiyası, Freedom House, Senzura İndeksi, Beynəlxalq Jurnalistlər Federasiyası, Beynəlxalq Mətbuat İnstitutu, ABŞ Pen-Klubu, Beynəlxalq Pen-Klub, Rori Pek Fondu birgə bəyanat verib. Bəyanatda sözügedən təşkilatlar Bakını Arlem Dezirin mandatını bloklamağa son qoymağa çağırıb. İddia edilir ki, guya Azərbaycan ifadə azadlığı və KİV azadlığı ilə bağlı öhdəliklərinə riayət etmir. Azərbaycanın bu addımı ATƏT Nümayəndəsinin əsas nəzarət funksiyasını zəiflətmək cəhdidir. Ümumilikdə, Azərbaycana yönəlik bu ittihamlar nə dərəcədə doğru və ədalətlidir?
“Sözügedən təşkilatlar da əslində özbaşına hərəkət etmir”
Məsələyə münasibət bildirən media eksperti Azər Həsrətin sözlərinə görə, məlum təşkilatların Azərbaycana yönəlik tənqidlərinin heç bir əsası yoxdur:“Əvvəla, Arlem Dezir ümumiyyətlə ATƏT-in media azadlığı nümayəndəsi kimi daim Azərbaycana münasibətdə qərəzli mövqe sərgiləyib. Onun nəinki Azərbaycana, Türkiyəyə, Orta Asiya ölkələrinə münasibəti qərəzlidir. Təbii ki, Azərbaycan hökuməti də onun bu davranışlarını daim müşahidə edib. Bu nəticəyə gəlib ki, belə bir adam o postda obyektiv fəaliyyət göstərə bilməz. Ona görə də ölkə hakimiyyəti Dezirin fəaliyyətinin bloklanması üçün təşəbbüsünü irəli sürüb. Yəni növbəti mərhələ üçün onun seçilməsini əngəlləyir. Maraqlısı odur ki, Arlem Dezirin müdafiəsinə qalxan müəyyən təşkilatlarla yanaşı, Ermənistan da bu işə qoşulub. Bu bir daha göstərir ki, A. Dezir anti-Azərbaycan mövqedə olduğuna, ermənipərəst mövqedən çıxış etdiyinə görə ona bu cür isti münasibət göstərilir. Yəni Azərbaycan özünə qarşı qərəzli münasibət gördüyündən, Dezirin növbəti mərhələ üçün seçimini əngəlləyir, Ermənistan isə bunun əksini edir. Ermənistan dövləti bütün arsenalıni işə salıb ki, A.Dezir növbəti dəfə o vəzifəyə təyin edilsin. Çünki bu şəxs Ermənistana qarşı deyil. Bax, məsələnin kökü bundadır. Sözügedən təşkilatlar da əslində özbaşına hərəkət etmir. Onların arxasında Ermənistan xüsusi xidmət orqanları dayanır”.
Görünən odur ki, A.Dezirlə bağlı müəyyən təşkilatların göstərdiyi cənfəşanlıq müəyyən çirkin məqsədlərə hesablanıb.
Vidadi ORDAHALLI
