Ermənistanın Baş naziri Nikol Paşinyan o qədər bacarıqsız bir rəhbərdir ki, hətta işlərində uğursuz olan hökumət üzvlərini də işdən çıxara bilmir.
Bu barədə Ermənistanın Politik.am nəşri yazıb. Nəşr yazır ki, Paşinyan bəzi nazirlərdən qorxur:“İşlərini bacarmayan kadrların lideri Ermənistanın Səhiyyə naziri Arsen Torosyandır. Nazir nəinki ziddiyyətli açıqlamaları, peşəkarlığı ilə koronavirus epidemiyasına qarşı mübarizəni dayandıra bilmədi, həm də nalayiq davranışı ilə cəmiyyətin geniş kütlələrinin qəzəbinə səbəb oldu. Bütün bunlara baxmayaraq, Baş nazir onu səhiyyə sisteminin rəhbərliyində saxlamağa davam edir. Halbuki, müxtəlif ölkələrdə səhiyyə işçiləri koronavirusla mübarizədəki kiçik nöqsanlara görə istefa edirlər.
Əslində, baş nazir Paşinyan Arsen Torosyandan qorxur. Səhiyyə naziri Ermənistanın Vatikandakı keçmiş səfiri Mikael Minasyanın ailə üzvləri ilə ilk mübahisəyə girdi. İndi Minasyan Paşinyanın bir nömrəli düşməni sayılırsa, Torosyanın istefası müxtəlif söz-söhbətlərə səbəb ola bilər”.
Erməni mətbuatı daha sonra bu məsələdə ölkənin sabiq prezidenti Levon Ter-Petrosyan faktorunu qabardır: “Torosyanın Ter-Petrosyanın komandasından olduğunu unutmayın. Paşinyan təkcə bu söhbətlərdən deyil, həm də siyasi atası Levon Ter-Petrosyanla münasibətləri korlayacağından qorxur. İlk prezident Nikol Paşinyanın siyasi sahədəki yeganə müttəfiqidir. Bütün bunlar nəzərə alınaraq, səhiyyə sektoru tamamilə uğursuz olsa belə, Arsen Torosyan vəzifəsindən uzaqlaşdırılmayacaq. Torosyan bu vəzifəni yalnız baş nazirin müavini təyin edildikdə tərk edəcək. Bu isə yaxın gələcəkdə alınan məsələ deyil”.
Erməni mediası o qənaətə gəlir ki, indiki məqamda Paşinyan Levon Ter-Petrosyanın dəstəyinəi itirsə, onun devrilməsi qaçılmaz olacaq.
Bütün hallarda, indiki məqamda Ter-Petrosyanın Paşinyana arxa durması onun üçün nə deməkdir?
“Qorxur ki, Ter-Petrosyan ona qarşı olan siyasi cəbhədə yer ala bilər”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı:“Ermənistanda Baş nazir Nikol Paşinyanın öz komandasına inamı və etimadı zəifdir. Bununla belə, getdikcə onda qorxalıq sindiromu yaranır. Bunu səhiyyə nazirinə münasibətdə sezmək olar. Bu gün Ermənistanda pandemiyaya qarşı mübarizə effektli deyil. Ölkədə yoluxma hər keçən gün artır. Səhiyyə Nazirliyinin işi ifıic olub. Ancaq Paşinyan naziri istefaya göndərə bilmir. Halbuki, özünü demokrat adlandıran sistemdə bu kimi hallarda nazir istefaya göndərilir. Göründüyü kimi, Ermənistanda belə bir tendensiya yoxdur. Hesab edirəm ki, Levon Ter-Ptrosyandan qorxduğu üçün Paşinyan buna getmir. Bütün erməni siyasi müxalifəti Paşinyana qarşı olduğu bir dövrdə o, yeni cəbhənin açılmasından çəkinir. Ona görə də səhiyyə nazirinə dəymir. Çünki qorxur ki, Ter-Petrosyan ona qarşı olan siyasi cəbhədə yer ala bilər. Göründyü kimi, ölkədə ağır vəziyyəti öz siyasi marqlarına qurban verən Paşinyanın siyasi görüşü belə bir bəsit ideyaya söykənir. Bu gün Ermənistanda vəziyyət acınacaqlı fon alır. Paşinyan bu çətin durumdan çıxmaq üçün heç bir siyasi konsepsiyaya malik deyil. Yalnız onun işi öz hakimiyyətini möhkəmlətməkdən ibarət olub. Düşünürəm ki, bu gediş Paşinyan üçün müsbət sonluq vəd etmir”.
Görünən odur ki, Paşinyan sonuncu dayağını da itirməkdən qorxduğu üçün bəzi nazirlərə münasibətdə belə “dözümlülük” göstərir.
Vidadi ORDAHALLI
