Ermənistanda hər şey onun əleyhinə, “Gallup” isə Paşinyanı “sorğu qəhrəmanına” çevirib...
Ermənistanın “Past” qəzeti yazır ki, Paşinyan yenidən media və sosial şəbəkələrin “qəhrəmanına” çevrilib. Başı bu günlərdə açıqlanan sorğunun nəticələrindən gicəllənən Nikol Ermənistanın koronavirusa yoluxma göstəricisinə görə hazırda dünyada 9-cu yerdə qərarlaşdığını belə “unudub”.
Ermənistanın koronavirus liderliyi ilə yanaşı, iqtisadi çətinliklər, kütləvi işsizlik və əhalinin sosial problemlərlə üz-üzə qaldığı bir ərəfədə Nikol reytinqinin pik həddə olmasından dəm vurmağa başlayıb. “Gallup”un keçirdiyi sorğunun nəticələrini əlində bayraq edərək xalqın dəstəyinin əvvəlki tək qaldığını iddia etməyə başlayıb. Sözsüz ki, bu sorğu Rusiya ilə yaşanan gərginlikdən sonra Qərbin müəyyən dairələrinin ona dəstəyindən xəbər verir. Mərkəzin keçirdiyi sorğunun nəticələri erməni cəmiyyətində ən müxtəlif formada tənqidlərə gətirib çıxarıb. Qəzet yazır ki, əslində sorğuda bir sıra metodoloji səhvlər var və o nəticə heç də reallığı əks etdirmir: “Bu cür “rəqəmlər” əslində hakimiyyət tərəfindən piar məqsədləri üçün ortaya atılıb. Məsələ ondadır ki, hakimiyyət üçün əslində Milli Təhlükəsizlik Xidmətinin keçirdiyi məxfi və gizli sorğular əhəmiyyət kəsb etməlidir. Həmin sorğuların nəticələri barədə əsasən hesabat verirlər, ancaq dərc etmirlər”.
Nəşrin yazdığına görə, Nikolun reytinqi sürətlə aşağı düşməyə başlayır. Lakin burada başqa bir məqam da var. Məsələ ondadır ki, hakimiyyətdən narazı və gözləntiləri doğrulmayan böyük bir hissə var. Onların da yeni lider müəyyən etdikləri bəlli deyil. Məhz bu vəziyyət də Paşinyanın reytinqini, hələ ki, tam şəkildə aşağı düşməyə qoymur. Öz növbəsində, “Erməni Qartalları: Vahid Ermənistan” partiyasının sədri Xaçik Asryan deyib ki, Nikolun dağılan hakimiyyətinin yeganə ümidi fövqəladə vəziyyətin uzadılması və “Gallup”ın sorğularının saxta nəticələridir.
Bütün bunlar onu göstərir ki, müəyyən xarici dairələr sifariş əsasında saxta reytinq sorğuları tərtib edərək bu yolla Paşinyanın hakimiyyət ömrünü uzatmağa çalışırlar.
- “Qərbin hələlik digər alternativi yoxdur və istəmirlər ki, “Qarabağ klanı” yenidən hakimiyyətə gəlsin”
Məsələyə münasibət bildirən AMİP-in sədr əvəzi Arzuxan Əlizadənin sözlərinə görə, Paşinyanla bağlı sorğunun real əsasları yoxdur:“Açıq-aşkar görünür ki, bütün bunların təşkil edilməsində müəyyən siyasi məqsədlər var. İndiki məqamda Paşinyanın cəmiyyətdə ciddi nüfuzunun olmasını düşünmək doğru deyil. Bəli, iki il əvvəl onun cəmiyyətdə nüfuzu var idi. Məsələ ondadır ki, Ermənistan əhalisi 20 illik “Qarabağ klanı”nın hakimiyyətindən bezmişdi. Həmin dövrlərdə Paşinyanın populist çıxışları narazı elektoratın diqqətini cəlb etdi. Bununla belə, Qərbin bəzi dairələri hakimiyyət dəyişikliyinə dəstək verdilər. Qərb ümid edirdi ki, bu minvalla Ermənistanı Rusiyanın təsir dairəsindən uzaqlaşdıracaqlar. Ancaq nəzərə almadılar ki, bu heç də asan məsələ deyil. Ən azı ona görə ki, Ermənistanın açıq dənizə çıxışı yoxdur və Rusiyanın bu ölkədə hərbi təmsilçiliyi mövcuddur. Digər tərəfdən, Ermənistanın Rusiyadan enerji asılılığı var. Ötən iki ildə Paşinyan nə iqtisadi sahədə verilən vədləri yerinə yetirə bildi, nə də digər öhtəlikləri. O biri tərəfdən, ölkədə tüğyan edən pandemiya onun bütün planlarını alt-üst etdi. Faktiki olaraq hökumət pandemiya ilə mübarizəni təşkil edə bilmir. İqtisadiyyat da bərbad durumdadır. Təbii ki, belə şəraitdə Paşinyanın yüksək reytinqindən danışmaq gülüncdür. Belə olan halda sual ortaya çıxır ki, “Gallup”ın saxta sorğuları nəyə lazım idi? Məsələ ondadır ki, Qərbin hələlik digər alternativi yoxdur. İstəmirlər ki, “Qarabağ klanı” yenidən hakimiyyətə gəlsin. Ona görə də Paşinyan hakimiyyətinin ömrünü bu yolla uzadırlar. Ancaq bu metodla da uzağa getmək real görünmür”.
Beləliklə, Paşinyan iqtidarının saxta reytinq sorğuları ilə də uzağa getməsi mümkün görünmür.
Vidadi ORDAHALLI
