Asif İbrahimov: “Burada əsasən bir qısqançlıq əlamətləri görürəm”
Məlum olduğu kimi, Qoşulmama Hərəkatının sədri kimi Prezident İlham Əliyevin BMT Baş Assambleyasının “COVİD-19”a həsr olunmuş xüsusi sessiyasının keçirilməsinə dair təşəbbüsünə böyük dəstək ifadə olunub.
Azərbaycan Prezidenti ilə BMT Baş katibi arasında baş tutan son telefon söhbətindən sonra Rusiya Xarici İşlər Nazirliyinin (XİN) rəsmi nümayəndəsi Mariya Zaxarovadan bu yöndə maraqlı açıqlama gəlib. Zaxarova qeyd edib ki, Azərbaycanın təşəbbüsü ilə BMT Baş Assambleyasının xüsusi sessiyasının konstruktiv yöndə keçəcəyinə əmindirlər. O bildirib ki, Rusiya bu təşəbbüsü dəstəkləyib:"Qoşulmama Hərəkatının və onun sədri qismində Azərbaycanın təşəbbüsü ilə xüsusi sessiyanın çağırılması qərarı qəbul edilib və Rusiya bu təşəbbüsü dəstəkləyib. Əminik ki, xüsusi sessiya konstruktiv əsasda keçəcək və hansısa substantiv qərarın qəbul olunması ilə bitəcək. Nyu-Yorkda mürəkkəb epidemioloji vəziyyəti nəzərə alaraq xüsusi sessiya onlayn formatda keçiriləcək. Hazırda müvafiq prosedurların razılaşdırılması davam edir".
Zaxarovanın bu açıqlamasında maraqlı eyham hiss edilir. Sanki Azərbaycanın təşəbbüsü ilə çağırılan sessiyada nələrinsə ola biləcəyinə dair məlumatlarının olduğuna bir işarə olunur. Zaxarovanın bu açıqlamasından hansı nəticəni çıxarmaq olar?
Beynəlxalq standartlaşma üzrə ekspert Asif İbrahimov “Bakı-Xəbər”ə açıqlamasında bildirdi ki, Azərbaycanın təşəbbüsü ilə reallaşacaq sessiya ilə bağlı hansısa narahatlığın olmadığı qənaətindədir:“Bilirsiniz ki, bu böyük bir təşəbbüs idi və dünya ölkələri bu məsələdə Azərbaycanı tam dəstəklədilər. İki gün əvvəl isə İlham Əliyevlə BMT Baş katibi arasında telefon danışığı oldu. Həmin söhbətin məğzindən də göründü ki, bu istiqamətdə heç bir narahatlıq yoxdu. Hətta Baş katib ölkəmizin bu təşəbbüsünə yüksək qiymət verdiyini bildirdi. Bizim təklif Nyu Yorkda – Qoşulmama Hərəkatına üzv 120 ölkə arasında yekdilliklə razılaşdırılıb, bunun ardınca Hərəkatın sədri Azərbaycan Prezidenti İlham Əliyev, Qoşulmama Hərəkatına üzv ölkələr adından BMT Baş katibi Antonio Quterreşə müraciət ünvanlayıb. Mövcud qaydalara əsasən, BMT-yə üzv ölkələrin çox hissəsi – bu isə 97 ölkə edir – təşəbbüsə dəstək verdiyi təqdirdə, xüsusi sessiya təşkil olunmalıdır. BMT bildirib ki, bizim təşəbbüsə 130 ölkə dəstək verib. Bu, Qoşulmama Hərəkatının sədri statusunu daşıyan Azərbaycan Prezidenti İlham Əliyevin müvafiq təşəbbüsünün dəstəklənməsi, beynəlxalq ictimaiyyət tərəfindən ölkəmizə, Prezidentə olan böyük etimadın, ehtiramın növbəti göstəricisidir. Bu təşəbbüsə qarşı çıxış edən yeganə dövlət Ermənistan olub. Bu addımı ilə Ermənistan prosesə hər hansı maneçilik törədə bilməyəcək. Əksinə, özünü rüsvay etmiş oldu. Ona görə ki, bütün dünya “COVİD-19”a qarşı mübarizədə həmrəyliyin vacibliyini vurğuladığı halda, Ermənistan qlobal xarakter daşıyan bu təşəbbüsə qarşı çıxış etməklə BMT sistemində və dünya dövlətləri arasında əsl mahiyyətini ortaya qoymuş oldu. Azərbaycan Prezidentinin təşəbbüsünün əleyhinə olmaqla, bütün dünya bir daha Ermənistanın əsl irticaçı mahiyyətinin şahidi oldu. Rusiyanın bundan cuzi narahatlığı da başadüşüləndir. Çünki BMT-nin əsas qurumları olan Baş Assambleya və Təhlükəsizlik Şurasının rolu, demək olar, görünmürdü. Rusiya da həmin qurumda əsas söz sahibi olan ölkədir. Burada əsasən bir qısqançlıq əlamətləri görürəm. Sessiyanın vaxtı bilinir, virtual formatda keçəcək tədbirlə bağlı heç bir narahatlıq yaşana bilməz. Rusiyanın özü də bizim təşəbbüsü rəsmən dəstəkləyib. Xırda eyhamlara ciddi fikir verməməyin tərəfdarıyam”.
Doğrudan da, BMT Baş Assambleyasının xüsusi sessiyası çərçivəsində ölkələrin təcili və təxirə salınmadan bir araya gəlməsinə, dünyanı bürüyən “COVİD-19”dan çıxış yollarını müzakirə etməsinə və həll yollarının tapmalısına böyük ehtiyac var.
Məhəmmədəli QƏRİBLİ
