Ağ Evin sözçüsü Keyli Makkenan bildirib ki, ABŞ administrasiyasının qondarma “erməni soyqırımı” ilə bağlı siyasəti dəyişməyib. O, Denver şəhərində qondarma “soyqırım” abidəsinin hücuma məruz qalmasına münasibət bildirərkən sözügedən ifadəni işlədib. Makkenan bir neçə həftə əvvəl sözügedən abidəyə edilən hücumu pisləyib.
Əslində qondarma “genosid” abidəsinə hücum ABŞ ictimaiyyətinin bunu qəbul etməməsinin göstəricisidir. Bu, ölkə ictimaiyyyətinin qondarma “erməni soyqırımı”na olan mənfi münasibətini özündə ehtiva edir. Məsələ ondadır ki, may ayının sonlarında ABŞ-ın Kolorado ştatının Denver şəhərində yerləşən qondarma “erməni soyqırımı” abidəsinin üzəri qaraya boyanıb, ətrafına müxtəlif şüarlar yazılıb. Abidənin (xaçkar) yerləşdiyi Denver şəhərinin mərkəzi hissəsində etiraz aksiyası keçirilib. Nümayişçilər qaradərili amerikalı Corc Floydun polis zorakılığı nəticəsində ölümünə etiraz ediblər.
Baş verənlər onu göstərir ki, Birləşmiş Ştatlar cəmiyyəti qondarma “erməni soyqırımı”nı qəbul etmir. Belə olmasaydı, o zaman həmin saxta genosidi simvolizə edən xaçkarikə hücum olmazdı. Bütün bunlar onu göstərir ki, ABŞ cəmiyyəti artıq erməni yalanlarının təsiri altına düşmək istəmir.
“Denverdə yaşanan hadisə də bunun əyani göstəricisidir”
Məsələyə münasibət bildirən millət vəkili Aydın Mirzəzadənin sözlərinə görə, qondarma “erməni soyqırımı” abidəsinə hücum ABŞ ictimaiyyətinin bunu qəbul etmədiyini göstərir:“Əvvəla, təkcə Birləşmiş Ştatlarda deyil, Rusiyada da ermənilərin bu kimi abidələrinə münasibət mənfidir. Bununla belə, ermənilərin faşist Njde üçün ucaltdıqları abidə hücuma məruz qalıb. İctimaiyyət tərəfindən dağıdılıb. Bütün bunlar onu göstərir ki, dünya tədricən “erməni soyqırımı” yalanına inanmır. İnanmadığı üçün də buna müxtəlif formada sərt etiraz edir. Hesab edirəm ki, gələcəkdə belə hallar artacaq. O cümlədən, ABŞ-da qondarma “erməni soyqırımı” abidələrinə daha çox etiraz edənlər olacaq. Nəzərə almaq lazımdır ki, həqiqət gec-tez öz yerini tapır. Zaman dəyişir. ABŞ ictimaiyyəti bir neçə mənbədən məlumat alır. Alimlər araşdırma aparırlar, insanlar özləri bir neçə mənbəyə daxil olaraq obyektiv məlumatlar əldə edirlər. Bu baxımdan artıq erməni yalanlarının üstü daha sürətlə açılır. Artıq açıq formada ABŞ cəmiyyəti bu yalanlara öz etirazını bildirir. Denverdə yaşanan hadisə də bunun əyani göstəricisidir”.
Zaman göstərir ki, ermənilərin saxta tarix yaratmaq cəhdləri ged-gedə onların əleyhinə işləyir.
Vidadi ORDAHALLI
