10/08/2020 20:00
728 x 90

BMT Baş katibinin qlobal sessiya ərəfəsində İlham Əliyevlə fikir mübadiləsi aparmasını zəruri edən əsaslar...

img

Prezident İlham Əliyev BMT-nin Baş katibi Antonio Quterreşə zəng edib. Telefon danışığı əsnasında Prezident bildirib ki, Azərbaycan COVID-19 pandemiyasına qarşı mübarizədə Baş katibin və BMT-nin səylərini, o cümlədən çoxtərəfli əməkdaşlığı dəstəkləyir.

Dövlət başçısı COVID-19 pandemiyasına qarşı mübarizə məqsədilə Azərbaycanın Ümumdünya Səhiyyə Təşkilatına 10 milyon ABŞ dolları məbləğində ianə, 30-dan çox ölkəyə isə humanitar və maliyyə yardımı ayırdığını qeyd edib. Prezident İlham Əliyev Qoşulmama Hərəkatının sədri statusunda üzv dövlətlər adından BMT Baş Assambleyasının COVID-19-a həsr olunmuş xüsusi sessiyasının çağırılması barədə müraciətinə qısa müddətdə cavab verdiyinə görə Baş katibə təşəkkürünü çatdırıb və BMT-nin 130-dan çox üzv dövlətinin bu təşəbbüsü dəstəklədiyini vurğulayıb. İlham Əliyev BMT Baş Assambleyasının COVID-19-a həsr olunmuş xüsusi sessiyasının çağırılmasında Baş katibin liderliyinin mühüm əhəmiyyət kəsb etdiyini diqqətə çatdırıb.

Prezident İlham Əliyev xüsusi sessiyanın keçirilməsi ilə əlaqədar texniki-logistik məsələlərin həllinə Azərbaycanın öz töhfəsini verməyə hazır olduğunu bildirib.

BMT-nin Baş katibi Antonio Quterreş telefon zənginə görə Prezident İlham Əliyevə təşəkkür edib. Baş katib BMT Baş Assambleyasının COVID-19-a həsr olunmuş xüsusi sessiyasının keçirilməsi təşəbbüsünü dəstəklədiyini qeyd edərək, texniki-logistik məsələlərin həlli ilə əlaqədar BMT-nin Azərbaycan tərəfi ilə birlikdə işləməyə hazır olduğunu deyib. Eyni zamanda, Baş katib Azərbaycanın BMT-nin Dayanıqlı İnkişaf Məqsədlərinin həyata keçirilməsi üçün fəal surətdə çalışdığını bildirib.

Prezident Ilham Əliyev və Baş katib Antonio Quterreş telefon danışığında əminliklərini ifadə ediblər ki, keçiriləcək xüsusi sessiya COVID-19 pandemiyasına qarşı mübarizədə önəmli addım olacaq.

Göründüyü kimi, BMT-nin Baş katibi Prezident İlham Əliyevin təkliflərinə böyük həssaslıqla yanaşır. Bunun səbəbi nə ilə bağlıdır və bu amildə dünyaya necə bir mesajın verildiyi qənaətinə gəlmək olar?

Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, tərəflər arasında baş tutan söhbətin əsas istiqaməti BMT-nin xüsusi sessiyasının çağırılması ətrafında olub:“Azərbaycanla BMT arasındakı münasibətlər hər zaman yüksək səviyyədə olub. Ölkəmiz bu əməkdaşlıqla bağlı üzərinə düşən öhdəlikləri hər zaman yüksək səviyyədə yerinə yetirib. Azərbaycanın pandemiya dönəmində apardığı siyasət və BMT-yə verdiyi təkliflər bizim münasibətlərimizi tamamilə yeni mərhələyə gətirdi.

Dünyanın 130-dan çox dövlətinin Prezident İlham Əliyevin BMT Baş Assambleyasının xüsusi sessiyasının təşkil olunması təşəbbüsünü dəstəkləməsi Azərbaycana olan etimadın göstəricisi sayıla bilər. Məlum olduğu kimi, ”COVİD-19” pandemiyasının başlanmasından etibarən Prezident İlham Əliyevin rəhbərliyi altında Azərbaycan tərəfindən regional və qlobal səviyyədə koronavirusa qarşı mübarizədə beynəlxalq həmrəyliyin gücləndirilməsi məqsədilə zəruri təşəbbüslər irəli sürülür və effektiv addımlar atılır. Azərbaycan Respublikası COVİD-19-a qarşı mübarizədə qlobal həmrəyliyin nümunəsi kimi Ümumdünya Səhiyyə Təşkilatına könüllü ianə ayırıb, 30-dan artıq dövlətə humanitar yardım edib. BMT-dən sonra ikinci ən böyük təsisat olan Qoşulmama Hərəkatı da məhz Azərbaycanın təşəbbüsü ilə virusa qarşı mübarizədə həll yolları axtarmaq üçün bir araya gəldi. Məlumdur ki, əksər böyük dövlətlər və beynəlxalq təşkilatlar qlobal liderlik əvəzinə özünütəcridə üstünlük verdi. BMT Təhlükəsizlik Şurasının xüsusi iclaslarının çağırılması təşəbbüsü fikir ayrılığına görə baş tutmadı. Məhz belə şəraitdə İlham Əliyevin təşəbbüsü ilə çağırılan BMT-nin xüsusi sessiyası pandemiya qarşısında dünya ictimaiyyətinin səfərbər olunmasına hesablanmış oldu. Tarixə nəzər yetirsək, BMT-nin təsis olunmasından indiyə qədər Baş Assambleyanın xüsusi sessiyaları məhdud sayda keçirilib. Qaydalara əsasən, BMT-yə üzv ölkələrin çox hissəsi - ən azı 97 ölkə təşəbbüsə dəstək verdiyi təqdirdə, xüsusi sessiya təşkil oluna bilər. Bu mənada, Azərbaycan həm də bəşəriyyətin xilasına çalışan dövlət kimi tarixə düşdü. Hesab edirəm ki, BMT Baş katibinin bizim Prezidentin təkliflərinə xüsusi həssaslıqla yanaşmasının kökündə duran amil bununla bağlıdır. Çünki biz belə çətin dönəmdə yalnız özümüzün yox, bütün bəşəriyyətin xilası barədə düşünmüşük. Bununla dünyaya verilən mesaj isə ölkəmizin önəmi ilə bağlıdır. Göstərilir ki, dünyanın nəhəng ölkələrinin miqyası üçün olan işləri, təşəbbüsləri Azərbaycan kimi ölkə təkbaşına edir”.

Görünən budur ki, koronovirus pandemiyası qlobal xarakter daşımaqla bütün xalqların təhlükəsizliyini təhdid edir. Təəssüf ki, bu günə qədər nə milli, nə də qlobal səviyyədə bu virusa qarşı mübarizədə effektiv bir vasitə tapılıb. Belə olan halda pandemiyaya qarşı yalnız birgə səylər və mümkün bütün resursları birgə səfərbər etməkllə uğur qazanmaq olar ki, bunun da təşəbbüskarı qismində Azərbaycan və onun Prezidenti çıxış edir.

Məhəmmədəli QƏRİBLİ

Son xəbərlər