Azərbaycanın sabiq baş naziri, qiyamçı polkovnik Surət Hüseynovun son vaxtlar fəallaşdığı hiss edilir. Uzunmüddətli həbs həyatından sonra Surət Hüseynov barəsində səslənən ittihamlara belə cavab vermirdi.
Ancaq bir neçə aydır ki, qiyamçı polkovnik nəinki ittihamlara cavab verir, hətta özünü “qarabağlıların ağsaqqalı” da adlandırır. Əsasən xaricdə fəaliyyət göstərən bəzi internet telekanallarına verdiyi müsahibələrdə özü ilə bağlı ortaya ciddi iddialar qoyur. Məhz bu mövqe maraqlı sualların yaranmasına səbəb olub və hər kəs Surət Hüseynovun aşırı fəallığının sirrini axtarır. İlk olaraq onun özünü “qarabağlıların ağsaqqalı” kimi təqdim etməsinə əslən həmin bölgədən olan bir neçə tanınmış şəxs etiraz edib.
Akif Nağı: “Bu, ruhi xəstəliyin əlamətidir”
Onların sırasında Qarabağ Azadlıq Təşkilatının (QAT) sədri Akif Nağı da var. Onun sözlərinə görə, hər kəs özü haqqında çox şey deyə, hətta şəxsini imperator elan edə bilər: “Bu, ruhi xəstəliyin əlamətidir. Ağsaqqal məsələsi isə çox çətin məsələdir. Kimsə özünü ağsaqqal elan edirsə, o demək deyil ki, ağsaqqaldır. Ağsaqqalı el-oba, camaat müəyyənləşdirir. Surət Hüseynovun özünü ağsaqqal hesab etməsi çox qeyri-ciddi bir məsələdir və ona heç əhəmiyyət də vermək lazım deyil".
Elşad Musayev: “Düşünülmüş plan üzrə bir fəaliyyət görürəm”
Surət Hüseynovun niyə məhz indiki məqamda fəallaşması ilə bağlı fikirlərini qəzetimizlə bölüşən Böyük Azərbaycan Partiyasının sədri Elşad Musayevin sözlərinə görə, Surət Hüseynovun fəallaşması onun da nəzərini cəlb edib: “Bu adamla bağlı indiyə qədər kifayət qədər ciddi ittihamlar səslənib, ancaq o heç bir cavab vermirdi. Surət Hüseynovun birdən-birə üzə çıxıb ittihamlara cavab verməklə yanaşı, ortaya həm də ciddi siyasi iradə qoyması maraqlı sual yaradır: birdən-birə nə oldu? Düşünürəm ki, Surət Hüseynov təsadüfən ortaya çıxan adamlardan deyil. Surətlə yanaşı, gizlənən başqa adamların da səsi çıxmağa başlayıb. Hesab edirəm ki, Surət Hüseynov ilkin mərhələdə özünü Qarabağ müharibəsinin əsas qəhrəmanı kimi təqdim etmək istəyir. Hələ mexanizm təzə işə salınıb. Bir az bu mövzuda danışandan sonra onun başqa siyasi iddiaları da ortaya çıxa bilər. Hesab edirəm ki, Surət Hüseynovun çıxışlarına barmaqarası da baxmaq lazım deyil. Adam təsadüfən danışmır.İstər siyasi dairələr, istərsə də KİV bu çıxışları diqqətdə saxlayıb, ciddi təhlil etməlidir. O kifayət qədər məlumatlı adamdır. Mən onun müsahibələrini izləmişəm, indiyə qədər deyilməyən bir çox mətləblərə aydınlıq gətirir. Hələlik bu çıxıların əsas istiqaməti Qarabağ müharibəsində onun roluna yönəlib. Düşünülmüş plan üzrə bir fəaliyyət görürəm. Bir qədər sonra daha ciddi siyasi bəyanatlar verə bilər”.
Əslində Surət Hüseynovun bu mərtəbəyə qalxmasına səbəb xarici faktor olub. İndi də yəqin Surəti “beşinci kolon”un nümayəndələrinin fəallaşması layihəsinə qatıblar. Bu, Azərbaycana növbəti təzyiq məqsədi də daşıya bilər, lakin uğursuz çaba olduğu indidən bəllidir.
Məhəmmədəli QƏRİBLİ
