Sosial şəbəkələrdə "Milli Şura - AXCP"nin növbəti videokonfrans formatındakı iclasının görüntüləri yayılıb. Qeyd edək ki, bundan əvvəl yayılan videolardan da görünürdü ki, həmin toplantılarda ciddi nəsə müzakirə edilmir. Qeybətxana şousunu xatırladan son məclisdə “Milli Şura” üzvləri növbəti şoularını təqdim ediblər.
Budəfəki söhbətlərində isə onlar bir-birinə etiraz ediblər. Milli Şuranın videokonfransında Əli Kərimlinin Rahim Hacıyev tərəfindən "zəmanəmizin Rəsulzadəsi" elan edilməsi iddiasına Cəmil Həsənli və Vidadi Mirkamal etiraz edib. Qənimət Zahid isə ironiya ilə “Yaxşı bəylər, Topçubaşov, Allah xeyir versin” replikasını atıb. Bir-birini tərifləməyə etiraz edən "Milli Şura" üzvləri guya bu yolla dəyər itirdiklərini deyiblər. Qənimət Zahid Əli Kərimliyə qarşı şiddətin təşkilinin ona, AXCP yə və Milli Şuraya dividendlər qazandırdığı, onların təbliğatına kömək etdiyini, onlara siyasi qazanc gətirdiyini də etiraf edib.
Əli Kərimlinin Rəsulzadə ilə eyniləşdirilməsinə Milli Şuradan olan etirazlar nə ilə bağlıdır? Müqayisənin yersiz olduğu həqiqətən başa düşülür, yoxsa bu, Əli Kərimliyə silahdaşlarının qısqançlığından irəli gəlir?
“Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, əvvəlcə bu mövzunu müzakirə edən “Milli Şura” adlanan təsisatın harda və niyə yaranmasına diqqət edək:“Siyasətdən anlayışı olanlar bilir ki, bu təsisat 2013-ci ildə Azərbaycanda keçirilən prezident seçkiləri zamanı bizə təzyiq məqsədilə xarici qüvvələrin sifarişi ilə yaranıb. Seçki qurtarandan sonra həmin sponsorlar üçün bu layihənin əhəmiyyəti qalmadı. Bundan sonra isə “Milli Şura” özünü buraxa bilmədi. Çünki kartlar açılardı və məlum olardı ki, bu, mövsümi bir qurumdu. Belə təşkilatdan ciddi nəsə gözləməyə də dəyməz. Elə buna görə də onlar yığışıb cayxana səviyyəli söhbətlərlə dedi-qodu edirlər. Bunları, hətta “Qeybət Şurası” da adlandırmaq olar. Çünki bir neçə iclaslarından görünür ki, onlar yalnız qeybətlə məşğuldurlar. Elə son iclaslarındakı müzakirələrdən də görünür ki, onlar bizim üçün milli əhəmiyyət kəsb edən dəyərləri ləkələməyə çalışırlar. Rəsulzadənin adının belə bir müqayisədə çəkilməsi tariximizdə olan şəxsiyyətlərimizin dəyərsizləşdirilməsinə xidmət edir. Hamı bilir ki, özünə bərabər olmayan adamla müqayisə həmin adama nüfuz gətirmir, əksinə, onu hörmətdən salır. Mən burdada başqa istiqamət görürəm. Hansısa xarici qüvvələr Rəsulzadəni gözdən salmaq üçün belə fikirləri öz emissarlarına dedizdirirlər. Bu, əslində Azərbaycan bayrağını qaldırıb dövlət quran Rəsulzadəyə qarşı edilən çox böyük həqarət və hörmətsizlikdir. Həmin müzakirədə iştirak edən adamlara baxın. Onların neçəsi Azərbaycandadır? Əksəriyyəti müxtəlif adalarla xaricə sığınıb Azərbaycan dövlətinə qarşı təbliğat aparır. Onlardan nə desən gözləmək olar. Az-çox məntiqi olan şəxs buna etiraz etməlidir. Rəsulzadə ilə Əli Kərimli müqayisəyəgəlməz adamlardı. Buna, hətta “Milli Şura” kimi qeyri-ciddi təşkilatdan etiraz edənlər varsa, deməli həmin adamlardan az da olsa obyektivlik var”.
Doğrudan da, Şərqdə ilk demokratik dövləti yaradan adamla, böyük bir təşkilata sahib çıxıb onu partiyadan dərnək səviyyəsinə endirən adamın müqayisə olunması yolverilməzdi.
Məhəmmədəli QƏRİBLİ
