Elşən Manafov: “Paşinyanın Rusiyanı şantaj etmək cəhdləri ona baha başa gələ bilər”
Ermənistanın baş naziri Nikol Paşinyan Rusiya hakimiyyətindən ən azı neytral münasibət almaq üçün yollar axtarmağa davam edir. Paşinyan üçün Ermənistan üzərində böyük iqtisadi və siyasi təsiretmə gücünə malik olan rəsmi Moskvanın onun hökumətinə laqeyd qalmaması və ya düşmən olmaması çox vacibdir.
Bu barədə Ermənistanın Politik.am nəşri yazıb.
Nəşrin fikrincə, ancaq Paşinyan hədəfinə çatmaq üçün effekti olmayan təhlükəli bir yol seçib - şantaj vasitəsilə Kremllə münasibətləri normallaşdırmağa üstünlük verir: “Paşinyan Moskvanı inandırmağa çalışır ki, Qafqazda yeganə dayağı olan Ermənistanda güclü anti-Rusiya dalğası qaldıra bilər. Bu anonslar çoxdan yaranmışdı və indi konkret tədbirlər görülür”.
Nəşr onu da vurğulayır ki, şantajla yanaşı, Ermənistanın baş naziri Rusiya hakimiyyətini, xüsusən də siyasi proseslər vasitəsilə ona məhəl qoymayan prezident Putini qorxutmağa çalışır: “Məqsəd Rusiya hakimiyyətinə Ermənistanda güclü anti-Rusiya siyasi birliyinin olduğunu göstərməkdir. Ancaq Paşinyan bir vacib detalı nəzərə almır: hazırkı Rusiya prezidenti KQB məktəbini keçib. Bu o deməkdir ki, şantaj və hədə-qorxu ilə onu yolundan döndərmək olmaz. Bu fonda, ən azından, Paşinyanın başlatdığı informasiya şantajı gülüncdür. Bu nəinki mövcud hakimiyyətə kömək edəcək, əksinə, Ermənistanı məhv edə bilər”.
Bütövlükdə, artıq neçə vaxtdır ki, sözügedən tendensiya Ermənistanda müşahidə olunur. Yəni Rusiyaya yönəlik şantaj xarakterli materiallar dərc edilir. Maraqlıdır, Paşinyanın belə siyasət aparması ona nə vəd edir?
- “Onun gözləntilərinə rəğmən, Qərb indiyə qədər Ermənistana ciddi maliyyə yardımı etməyib”
Sözügedən məsələ üzrə fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu:“Əvvəla, ilk vaxtlar Paşinyanın Rusiya ilə şantaj dilində danışması gözlənilən idi. Çünki o, Sorosun maliyyə dəstəyi ilə Ermənistanda hakimiyyətə gəlib. Bunun müqabilində Paşinyan Qərbin müəyyən dairələri qarşısında bir sıra öhdəliklər götürüb. O üzdən, həmin öhdəliklərin yerinə yetirilməsi istiqamətində müvafiq addımlar atılmalıdır. Bu kontekstdə Paşinyanın Rusiya ilə şantaj dilində danışacağı gözlənilən idi. Digər tərəfdən, Paşinyanın bu öhdəliyi o kontekstdə özünü büruzə verdi ki, o. Rusiyanın təsir dairəsində olan “Qarabağ klanı”nı hakimiyyətdən uzaqlaşdırdı. Bu azmış kimi, separatçı qurumda ona yaxın olan şəxsi “prezident” kürsüsünə gətirdi. Daha sonra Paşinyan Rusiya ilə xüsusi münasibətləri olan şəxsləri bu və ya digər formada güc strukturlarından uzaqlaşdırdı. Qərbin qarşısında götürdüyü öhdəliklərdən biri də bu idi. Daha sonra korrupsiyaya qarşı mübarizə adı altında Rusiya ilə yaxınlığı olan iri məmurları sıradan çıxardı. Ancaq Paşinyan küçədən gəlmiş bir siyasətçi kimi, ciddi idarəetmə təcrübəsinə malik olmayan siyasətçi olaraq bir sıra reallıqları unutdu. Reallıq odur ki, Ermənistana Rusiya daha yaxındır, nəinki Qərb. İkincisi Rusiyanın Ermənistanda hərbi mövcudluğu faktorudur. Qərb orada ciddi hərbi dayaqlara malik deyil. Üçüncüsü, Ermənistan Rusiyadan, o cümlədən İrandan enerji baxımından asılı bir ölkədir. O baxımdan Paşinyanın Rusiyanı şantaj etmək cəhdləri ona baha başa gələ bilər. Prezident İlham Əliyev bu günlərdə dedi ki, Ermənistanda xunta diktatura ilə əvəz olundu. Qərb də belə məsələləri bağışlamır. Təsadüfü deyil ki, Paşinyanın gözləntilərinə rəğmən, Qərb indiyə qədər Ermənistana ciddi maliyyə yardımı etməyib”.
Göründüyü kimi, Paşinyanın sözügedən reveransları ona yaxşı perspektiv vəd etmir. Çünki Ermənistanın imkanları buna adekvat deyil.
Vidadi ORDAHALLI
