Koronavirus pandemiyası ilə mübarizə dövründə müxtəlif dövlətlərin xarici ölkələrdəki vətəndaşlarına fərqli yanaşma sərgilədiyinin şahidi olduq. Bizimlə qonşu olan ölkələrdən Ermənistan ümumiyyətlə xarici ölkələrdən vətəndaşlarının təxliyəsi ilə bağlı heç bir tədbir görmədi, ermənilər ayrı-ayrı ölkələrin hava limanlarında günlərlə ac-yalavac, köməksiz qaldılar və ölkələrindən əlləri üzüldüyündən həmin ölkələrdən imdad dilədilər.
Gürcüstan isə son bir-iki həftəyə qədər vətəndaşlarının təxliyəsini həyata keçirmədi, yalnız son həftələr Azərbaycandan və başqa ölkələrdən çox məhdud sayda vətəndaşını təxliyə etdi. Proses isə vətəndaşın büdcəsi hesabına həyata keçirildi.
Azərbaycan isə xaricdəki vətəndaşına hər iki ölkədən fərqli münasibət göstərdi. Azərbaycan dövləti bir tərəfdən ölkədə pandemiya ilə bağlı böyük mübarizə hərəkatına başladı, digər tərəfdən dövlət hesabına vətəndaşların xarici ölkələrdən təxliyəsini həyata keçirdi. Bu gün yüzlərlə Azərbaycan vətəndaşı xaricdən ölkəmizə təxliyə edilib.
“Bu bizim dövlətin adları çəkilən və çəkilməyən dövlətlərdən üstünlüyüdür”
Mövzunu şərh edən siyasi şərhçi Azər Həsrət bizimlə söhbətində bildirdi ki, Azərbaycan dövlətinin öz vətəndaşlarının ölkəmizə operativ və itkisiz şəkildə təxliyə etməsinin özü nəinki region ölkələri, eləcə də dünyanın digər dövlətləri üçün bir nümunədir. “Sizin dediklərinizə bir fikir də mən əlavə edib. Ərəb ölkələrinin birindən təxliyə olunan bir xanım danışırdı ki, carter reyslərini gözləyən Azərbaycan vətəndaşlarını bizim səfirlik otellərə yerləşdirib, hər cür qayğılarına qalıblar. Orada olan başqa ölkələrin vətəndaşları deyiblər ki, sizin nə gözəl dövlətiniz var, burada həm yüksək səviyyədə sizin qayğınıza qalırlar, həm də sizing ölkənizə getməyiniz üçün arxanızla təyarə göndərirlər. Demək istəyirəm ki, başqa ölkələrin vətəndaşları Azərbaycan dövlətinin öz vətəndaşlarına göstərdiyi qayğıya böyük heyrətlə yanaşırlar. Həqiqətən də Azərbaycan dövləti koronavirusun pandemiya élan edilməsinin ilk günlərindən başlayaraq virusla mübarizə tədbirləri sırasında Azərbaycan vətəndaşlarının xarici ölkələrdən təxliyə edilməsini planlı şəkildə həyata keçirməyə başladı. Bu gün də proses davam etdirilir. Dövlət həm Rusiyadan, həm də başqa ölkələrdən vətəndaşlarımızın problemsiz, sağlam şəkildə ölkəmizə gətirilməsini təmin edir. Xaricdəki bəzi vətəndaşlarımız narahatlıq keçirirlər ki, biz burada qaldıq, bizi aparmadılar. Əlbəttə, yüzminlərlə vətəndaşı qısa bir müddətdə Vətənə gətirmək mümkün deyil, bu tədricən həyata keçirilməli olan bir prosesdir. Ona də dövlət mərhələli şəkildə vətəndaşlarımızı ölkəmizə gətirir. Gətirilənlərin də hamısı karantinə alınır və karantin müddətində də dövlət hesabına onlara hər cür qayğı göstərilir. Yüksək şəraitdə karantində saxlanılan vətəndaşlar isə sağlam şəkildə ailələrinə qovuşurlar. Bu bizim dövlətin adları çəkilən və çəkilməyən dövlətlərdən üstünlüyüdür”.
A.Həsrət qeyd edir ki, bu başlıca olaraq Prezident İlham Əliyevin siyasi iradəsinin ifadəsidir. Prezident İlham Əliyevin hər bir azərbaycanlının Prezidenti olduğunu hər an təsdiqlədiyini deyən A.Həsrətin bildirdi ki, o, dünyanın hər yerində yaşayan soydaşımızı düşünür, onların qayğısına qalır. “Azərbaycan dövlətinin öz vətəndaşlarına göstərdiyi münasibəti ilə Gürcüstanın, Ermənistanın, Ukraynanın öz vətəndaşlarına münasibəti arasında yerlə-göy qədər fərq var. Bu və digər ölkələrdən fərqli olaraq Azərbaycan dövləti dünyanın harasında olmasından asılı olmayaraq öz vətəndaşlarını axtarıb arayır, onları dövlət vəsaiti hesabına Vətənə gətirir. Burada həm xərclənən milyonlarla vəsaitdən və ölkə başçısının siyasi iradəsindən, hər addımda vətəndaşı düşünməsindən söhbət gedir” - deyə A.Həsrət vurğuladı.
İradə SARIYEVA
