Prezident İlham Əliyev Azərbaycan telekanallarına verdiyi son müsahibəsində Ermənistanın beynəlxalq təşkilatlarda korrupsiya hesabına özünə lobbi dəstəyi qazandığına vurğu edib.
Ölkə başçısı bildirib ki, bizdə kifayət qədər siqnallar var ki, bəzi siyasi xadimlər, deputatlar, bir sıra Avropa ölkələrinin hökumət üzvləri Ermənistana xüsusi münasibət bəsləyir:"Ermənistanın daxilində də demokratiyanın, insan haqlarının pozulması halları geniş vüsət alır. Avropa təşkilatları isə bütün bunlara göz yumur. Hesab edirəm ki, bunun əsas səbəbi erməni lobbisi və onun maliyyə vəsaitidir. Erməni lobbisi Ermənistanı bütün təşkilatlarda müdafiə edir. Mən bunu şəxsən Avropa Şurası Parlament Assambleyasında Azərbaycan nümayəndə heyətinin başçısı kimi görmüşəm. Yəni Ermənistan tamamilə tənqiddən kənarda idi. O vaxt ermənipərəst deputatlar və əslən Avropa ölkələrindən olan varlı ermənilər bütün imkanlardan, öz maliyyə imkanlarından istifadə edib Ermənistanı bütün tənqidlərdən qoruyurdular. Ermənistanda insan haqlarının və demokratiyanın pozulması bu günün işi deyil. Ermənistanda heç vaxt demokratiya olmayıb. Ermənistan hələ müstəqil ölkə kimi formalaşandan dərhal sonra öz əsl xislətini göstərdi. Xocalı soyqırımını törədən faşistlər demokrat ola bilməzlər. Başqasının torpağına göz dikən, bir milyon insanı evsiz-eşiksiz qoyan ölkə demokrat ola bilməz. Onlar bir milyon Azərbaycan vətəndaşının və Ermənistanda yaşayan azərbaycanlıların elementar insan haqlarını pozublar. Ancaq ermənilərə himayədarlıq edənlər, ilk növbədə erməni lobbisi, onun pulları, ondan sonra Ermənistan hökumətinin Avropada çirkin lobbiçilik fəaliyyəti onları həmişə bu tənqiddən qoruyurdu. Əslində bu, lobbiçilik fəaliyyəti deyil, bu, korrupsiya fəaliyyətidir. Mən hesab edirəm ki, bu fəaliyyət Avropada geniş araşdırılmalıdır. Bizdə kifayət qədər siqnallar var ki, bəzi siyasi xadimlər, deputatlar, bəzi Avropa ölkələrinin hökumət üzvləri Ermənistana xüsusi münasibət bəsləyirlər. Elə adamlar var ki, Dağlıq Qarabağa yüzlərlə səfər edib. Bunun arxasında nələr dayanır, hamımız yaxşı başa düşürük. Ona görə Avropanın hüquq-mühafizə orqanları bu məsələni, Ermənistan hökumətinin Avropada korrupsiyanın yayılmasına verdiyi dırnaqarası töhfəni, əlbəttə ki, Ermənistanın riyakar siyasətini araşdırsınlar. Çünki o, hər bir güc mərkəzinə o güc mərkəzinin eşitmək istədiyini deyir yalandan. O, bir neçə stulda oturmaq istəyir. Bu günə qədər buna müvəffəq olub. O, saxta tarixi, uydurulmuş, yüz il bundan əvvəl dırnaqarası hadisələri - soyqırımı istismar etmək istəyir. Özündən qurban, yazıq bir xalq düzəltmək istəyir. Halbuki, hər kəs yaxşı bilir ki, ermənilər bizə qarşı soyqırımı törətmişlər. Budur, əsas amillər".
Prezident konkret faktlara söykənərək, Avropa qurumlarının Ermənistanla korrupsya əlaqəsinə girdiyini və bunun da müqabilində həmin ölkədəki insan haqlarının pozulmasına göz yümulduğunu deyib. Bu cür neqativliklərin hansı formada araşdırılması mümkündür?
Politoloq Rəşad Bayramov “Bakı-Xəbər”ə açıqlamasında bildirdi ki, Ermənistan beynəlxalq arenada konyak diplomatiyasını işə salıb və bir çox siyasətçiləri satın almasına dair kifayət qədər faktlar mövcuddur:“Bu məsələyə Prezident ilk dəfə deyil ki, toxunur. Hələ ötən ilin əvvəlində keçirilən bir müşavirədə çıxışı zamanı Avropada erməni lobbisinin fəaliyyətini, xüsusilə Azərbaycana qarşı hücumda bütün vasitələrdən istifadə etdiyini gündəmə gətirmişdi. Prezidentin demokratiya və ədalətdən dəm vuran Avropa qurumlarının Ermənistandakı biabırçı mənzərəyə niyə göz yumduqalrı ilə bağlı ortaya qoyduğu dəlillər təkzibedilməzdir. Bu da beynəlxalq arenada siyasi münasibətlərin gerçək üzünü ortaya çıxarır. Ermənistanı müdafiə edən bir neçə QHT illər boyunca AŞPA-dakı əlaqələrinin köməyilə Azərbaycana qarşı amansız kampaniya aparır. Heç kim iddia etmir ki, Azərbaycanı tənqid etmək olmaz, lakin Ermənistanın Dağlıq Qarabağı qanunsuz işğalını müdafiə edib, bunun fonunda ölkəmizi tənqid etmək ədalətli sayıla bilməz. İstərdim, Avropa qurumlarında ermənilərin hansı korrupsiya mexanizmi ilə hərəkət etmələrinə dair bir faktı nəzərinizə çatdırım. Bir müddət əvvəl Ukrayna deputatı Vladimir Arev “Facebook”da yazdı ki, son illər bəzi deputatlar AŞPA-nı şəxsi məqsədlərinə alət edib. O, AŞPA-dakı üç erməni deputatın adını çəkirdi: Samvel Farmanyan, Naira Karapetyan və Naira Zoqrabyan (Ermənistanın AŞPA-dakı nümayəndə heyətinin keçmiş üzvləri).
Onlar Arevə mətbuat azadlığı və beynəlxalq hüquqa riayət etmə haqqındakı məruzəsini dəyişdirməsi üçün rüşvət təklif ediblər. Erməni deputatlar rüşvəti ona görə təklif edirdilər ki, Arev məruzədən Dağlıq Qarabağın Ermənistan tərəfindən işğalı hissəsini çıxartsın. Arevin sözlərinə görə, üç deputat 1400 avro və 40 illik erməni konyakı ilə onu ələ almağa çalışıb.
Arev rüşvəti qəbul etmir və bundan sonra təzyiqlər, böhtanlar dövriyyəyə buraxılır. AŞPA-nın sessiyasında ermənilər ədalətli və qərəzsiz ukraynalı deputatı milliyyətcə azərbaycanlı olmaqda ittiham etdilər. Belə faktları çox göstərmək olar. Yaxşı olardı ki, bu cür konkret faktların araşdırılmasını Avropadakı hüquq-mühafizə orqanları nəzarətə götürsün”.
Ermənistan bizim torpaqlarımızı işğal etməklə yanaşı, eyni zamanda bizə qarşı bütün cəbhələrdə müharibə aparır. Səslənən fikirlər və təqdim olunan faktlardan görünür ki, onlar bunu bütün ləyaqətsiz yollarla həyata keçirirlər.
Məhəmmədəli QƏRİBLİ
