Prezident İlham Əliyev iyulun 6-da Bakının Xətai rayonunda Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli hospitalı ilə tanışlıqdan sonra Azərbaycan Televiziyasına, İctimai Televiziyaya və “Xəzər” Televiziyasına müsahibəsi zamanı deyib ki, Ermənistan və Azərbaycan Xarici işlər nazirlərinin videokonfranslarının heç bir əhəmiyyəti yoxdur. Bu, sadəcə olaraq, Minsk Qrupunun sanki fəaliyyətdə olmasını göstərir:
"Ermənistan işğal edilmiş torpaqlarda qanunsuz məskunlaşma aparır. Mən bu məsələni dəfələrlə qaldırmışam. Bizim bütün beynəlxalq təşkilatlardakı nümayəndə heyətlərinin üzvlərinə göstəriş verilib ki, bu məsələ onların gündəliyində bir nömrəli məsələ olmalıdır. Bu məsələ ilə bağlı Minsk qrupunun həmsədrləri açıqlama verir, yoxsa yox?! ATƏT-in axırıncı faktaraşdırıcı missiyası işğal olunmuş torpaqlarda 10 il bundan əvvəl olub. On il keçib. Son bir neçə il ərzində biz onlara təkidlə deyirik ki, yeni missiya getməlidir. Bu 10 il ərzində Ermənistan Suriyadan və başqa yerlərdən erməniləri oraya gətirib, onları zorla saxlayır. Bizim şəhərlərimizin tarixi adlarını dəyişdirir, işğal edilmiş torpaqlarda kilsələr tikir. Yəni sabah deyəcək ki, bu, erməni torpağıdır. Dəfələrlə demişik onlara. Reaksiya var? Yoxdur! Yəni10 il ərzində faktaraşdırıcı missiyanı göndərmək olmaz? İstəmirlər. Gedib nə görəcəklər?! Görəcəklər ki, orada məskunlaşma gedir. Amma bunu 10 il bundan əvvəl öz məruzələrində əks etdiriblər. Yəqin ki, indi əks etdirmək istəmirlər. Bu haqda bəyanat verib Minsk qrupu? Verməyib! Bilirsiniz, indi biz də dözümlülük göstəririk və konstruktiv olmağa çalışırıq. Amma bu gün faktiki olaraq danışıqlar prosesi getmir. Ermənistan və Azərbaycan Xarici işlər nazirlərinin videokonfranslarının heç bir əhəmiyyəti yoxdur. Bu, sadəcə olaraq, Minsk Qrupunun sanki fəaliyyətdə olmasını göstərir. Yaxşı, nə qədər olar? Fəaliyyətdə olmaq fəaliyyətdə olmaq deməkdir. Mən demişəm ki, biz danışıqları imitasiya üçün aparası deyilik. Biz danışıqları mahiyyət üzrə aparmaq istəyirik. İndi onlar bir söz çıxarıblar - substantiv danışıqlar. Özləri bu sözü çıxarıblar, aydındır bunun mahiyyəti nədir - bəli, mahiyyət üzrə danışıqlar formatı dəyişmədən və masa üzərində olan danışıqlar predmetinə əlavə etmədən. Belə olan halda, əlbəttə, biz danışıqlarda iştirak edəcəyik. Əks halda, mənasız danışıqların aparılmasına heç bir ehtiyac qalmayacaq. Bax, biz Minsk Qrupundan bunu gözləyirik və öz mövqeyimizdə möhkəm dayanmışıq, haqq-ədalət bizim tərəfimizdədir. Biz haqlı olmağımızı həm beynəlxalq arenalarda göstərmişik, həm də döyüş meydanında və heç kimin Aprel döyüşləri yadından çıxmasın".
Göründüyü kimi, ölkə başçısı ATƏT-in vasitəşiliyilə keçirilən Ermənistan və Azərbaycan Xarici işlər nazirlərinin videokonfranslarının heç bir əhəmiyyətinin olmadığını dilə gətirib. Prezidentə bu qənaətə gəlməyə əsas verən amillər nə ilə bağlıdır?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, ölkə başçısına belə qənaətə gəlməyə əsas verən kifayət qədər amillər mövcuddur:“Bunun ən bariz nümunəsini uzun illərdən bəri nəticəsiz olan danışıqlar prosesində görürük. Prezidentin son çıxışından belə başa düşdük ki, vasitəçilik missiyasını həyata keçirənlərin davranışları ölkə rəhbərliyini qəti qane etmir. Prezident konkret faktlarla danışır. Deyir ki, ermənilər gəlib işğal altında olan torpaqlarda andiçmə mərasimi keçirir, orada qanunsuz məskunlaşma edirlər, ancaq kimsə buna reaksiya vermir. Əgər ermənilərin ağıllarına gələn qanunsuz hərəkətinə Minsk Qrupu göz yumursa, onunla prosesin davamında nəsə gözləməyə dəyməz. Əslində, Ermənistanın bu cür hərəkətlərinə görə onlara qarşı sanksiyanın tətbiq edilməsi tələb olunmalıdır. Buradan birmənalı şəkildə bu qənaətə gəlmək olar ki, həmsədrlər ermənipərəst mövqedədirlər. Prezident onu təəccübləndirən məsələlərdən biri barədə də danışdı. Bildirdi ki, beynəlxalq təşkilatlar, nədənsə, məsələnin hərbi yolunun mümkünsüzlüyündən danışırlar. Bunu nə vaxta kimi təkrarlamaq olar? Prezident onlara konkret istiqamət göstərdi və dedi ki, getsinlər BMT nizamnaməsi ilə yaxşı tanış olsunlar. Öz torpaqlarını işğaldan azad etmək Azərbaycanın öz hüququdur. Bunu heç bir beynəlxalq konvensiya da qadağan etmir. Prezidentin bu eyhamları problemin həllinin güc tətbiqi ilə mümkünlüyünə bir mesajdı. Başqa bir yolun olmadığı, hərbi yolun mümkünlüyünə bir işarə hiss etdim həmin çıxışda. Hərbi yolun vacibliyini biz dəfələrlə bildirmişik. Ancaq ölkə başçısının danışığından belə anlaşıldı ki, vasitəçilər heç bir başqa yol qoymurlar. Bunu müharibənin istənilən vaxt mümkünlüyü ilə bağlı verilən anons kimi də qəbul edə bilərik. Belə vəziyyətdə, təbiidir ki, XİN rəhbərlərinin nəticəsiz görüşünü təşkil etməyin heç bir faydası olan deyil”.
Azərbaycan uzun illərdir ki, sülh danışıqlarına sadiqlik nümayiş etdirir. Ortada olan isə nəticəsizlikdir. Təbiidir ki, belə olan təqdirdə bizim torpaqlarmızı ordumuzun gücü ilə də azad etməyə ixtiyarımız var.
Məhəmmədəli QƏRİBLİ
