“Hazırda teatrımızda Sankt-Peterburq teatrlarından birinin rejissoru uşaq tamaşası hazırlayır”
Müasir Azərbaycan teatrlarının qarşısında duran vəzifələrdən biri xarici ölkə teatrları ilə əməkdaşlıq etmək məsələsidir. Bəzi teatrlar buna cəhd göstərsələr də, teatrların əksəriyyəti bu sahədə əməkdaşlığa, aktyor, rejissor mübadiləsinə meyl göstərmir.
Paytaxtımızda 100 ilə yaxındır fəaliyyət göstərən Rus Dram Teatrı ölkənin rusdilli tamaşaçılarına maraqlı tamaşalar təqdim edir. Səməd Vurğun adına Akademik Rus Dram Teatrı keçmiş ittifaq məkanına daxil olan rusdilli teatrlarla nə kimi əməkdaşlıq edir? Bu teatr aktyor, rejissor mübadiləsinə maraq göstərirmi?
S.Vurğun adına Akademik Rus Dram Teatrının direktor müavini İlham Məmmədov “Bakı-Xəbər”ə açıqlamasında bildirdi ki, bu teatr zaman-zaman başqa ölkələrin teatrları ilə sıx şəkildə əməkdaşlıq edib. Vaxtaşırı olaraq qastollara getdiklərini deyən İ.Məmmədovun sözlərinə görə, Rusiyanın, Gürcüstanın, Belarusun, Ukraynanın və digər ölkələrin də teatrları Rus Dram Teatrının qonağı olur, burada tamaşalar təqdim edirlər.
O qeyd etdi ki, 1920-ci ildən fəaliyyət göstərən Rus Dram Teatrı böyük ənənəyə malikdir. Bu yaxınlarda aktyor mübadiləsi çərçivəsində Belarus aktyorlarının ilk dəfə Rus Dram Teatrının səhnəsində çıxış etdiyini deyən İ.Məmmədov vurğuladı ki, bu, sözügedən ölkənin “Tri T format” teatrının yaradıcı kollektivinin Bakıda qastrol səfərində olduğu zaman baş tutub. Onların Akademik Dövlət Rus Dram Teatrında israilli yazıçı Efraim Kişonun əsəri əsasında hazırlanan “Nikah müqaviləsi” adlı musiqili komediya nümayiş etdiriblər.
Azərbaycanla Belarus arasında mədəniyyət və incəsənət sahəsində uğurlu əməkdaşlıq mövcuddur.
Teatrın Sankt-Peterburqa, Tiflisə və digər şəhərlərə qastrol səfərləri zamanı qarşılıqlı əməkdaşlıq məsələlərinin də önə çəkildiyini deyən İ.Məmmədovun sözlərinə görə, teatrlar arasında əməkdaşlıq mübadiləsinin faydaları böyükdür. “Bizim teatr mütəmadi olaraq başqa ölkələrin rus dram teatrları ilə əməkdaşlıq edir. Teatrımız başqa ölkələrdən aktyorlar, aktrisalar, rejissorlar, rəssamlar dəvət edir və birgə tamaşalar hazırlayırıq. Biz işimizi yalnız aktyor və rejissor mübadiləsi çərçivəsində qurmuruq, həmçinin, quruluşçu rəssamların və sair mübadiləsini həyata keçiririk. Hazırda teatrımızda Sankt-Peterburq teatrlarından birinin rejissoru uşaq tamaşası hazırlayır, martın 30-da həmin tamaşanın premyerası olacaq. Finlandiyadan gələn azərbaycanlı rejissor da bizdə tamaşa qoyur. Demək istəyirəm ki, həm aktyorları, həm aktrisaları, həm rejissorları, həm rəssamları dəvət edirik. Qarşılıqlı mübadilə bizə çox böyük təcrübə qazandırır. Bu əməkdaşlıq nəticəsində onlar bizdən, biz də onlardan öyrənirik, yenilikləri tətbiq edirik” - deyə bildirən İ.Məmmədov hesab edir ki, qarşıdakı aylarda da bu cür mübadilələr olacaq. O, həmçinin, vurğuladı ki, Rus Dram Teatrı akademik teatr statusu aldıqdan sonra fəaliyyətini daha da genişləndirib və tamaşaçılara daha maraqlı tamaşalar təqdim edəcək.
İradə SARIYEVA
