“Kitabxana sistemində güclü islahatlara və müasir tələblərə cavab verən ixtisaslı kadrların yetişdirilməsinə ciddi ehtiyac var”
Azərbaycanda mövcud olan kitabxanaların heç də hamısı günün tələblərinə cavab vermir. Xüsusən də bölgələrdəki kitabxanaların vəziyyəti hər zaman mütəxəssisləri düşündürür. Bir çox ucqar rayon və kəndlərdə kitabxanaların internet resursları ilə təmin edilməməsi faktı da kitabxana sahəsinə aid olan problemlərdəndir.
Mədəniyyət naziri Əbülfəs Qarayev mətbuata bildirib ki, Azərbaycanda bəzi kitabxanalar bağlanacaq. Nazirin bildirdiyinə görə, Azərbaycanda Mərkəzləşdirilmiş Kitabxana Sisteminə keçid bəzi kitabxanaların fəaliyyətinin dayandırılması ilə nəticələnəcək: “Sistemə keçid, ümumilikdə, kitabxanaların bağlanması demək deyil. Burada kitabxana işinin təkmilləşdirilməsi əsas məqsədimizdir. Kitabxanalar bağlanmamışdan əvvəl orada çalışan əməkdaşların işlə təmin olunması da bizim diqqətimizdədir. İnsan faktoru nəzərə alınacaq. Söhbət kiminsə işdən azad olunmasından getmir. Biz artıq bu layihə ilə bağlı işlər aparırıq. İki ay ərzində layihə hökumətə təqdim olunmalıdır” - deyə nazir qeyd edib.
Ölkəmizdəki bəzi kitabxanaların bağlanmasına münasibət bildirən kitabxana üzrə mütəxəssis Fikrət Mahmud baki-xeber.com-a bildirdi ki, kitabxanaların bağlanmasını bu sahədə həyata keçirilən islahatların nəticəsi saymaq olmaz. F.Mahmudun bildirdiyinə görə, bağlanan kitabxanaların binaları çoxdan satılıb. “Bildiyim qədər bağlanacağı bildirilən kitabxanalar, binaları çoxdan satılmış kitabxanalardır, onların bağlandığını indi rəsmiləşdirirlər. Onlarla kitabxananın binası artıq illərdir ki, satılıb. Bilirsiz ki, o satılan binalar haqqında məlumatlar verilmirdi. Ona görə ki, o zaman Ulu öndər Heydər Əliyevin kitabxanalarla bağlı Sərəncamı vardı və həmin sərəncamda bildirilirdi ki, kitabxanalara toxunmaq, onların binasını satmaq olmaz. Lakin bəzi kitabxanaların binası gizli satılmışdı. Məsələn, Tağı Şahbazi adına kitabxana binası çoxdan satılıb. Amma o ətrafda üç orta məktəb bir neçə ali məktəb yerləşir, halbuki o kitabxananın qalması vacib idi. Kitabxanaların binasının satılması və onların bağlanması bizim ağrılı yerimizdir. Kitabxanalar bağlansa da, güman edirəm ki, işçiləri başqa kitabxanalarda işlə təmin edərlər, yəni onları digər kitabxanalara köçürürlər. Peşəkar kitabxana işçilərinə tələbat çoxdur. Bizdə əhalinin sayına görə kitabxanaların sayı çox azdır.
Mövcud kitabxanaların çoxu isə günümüzün tələblərinə cavab vermir. Kitabxana sistemində güclü islahatlara və müasir tələblərə cavab verən ixtisaslı kadrların yetişdirilməsinə ciddi ehtiyac var. Kitabxana işçilərinin əməkhaqları da yüksək olmalıdır. Bu sahədə əməkhaqqı az olduğu üçün ixtisaslı kadrların çoxu başqa sahələrə üz tuturlar, bu da kitabxana işinin axsamasına gətirib çıxarır.
Güman edirəm ki, kitabxanalar üçün günün tələblərinə cavab verən binalar tikiləcək və bu sahədə ixtisaslı kadrların yetişdirilməsinə diqqət yetiriləcək” - deyə F.Mahmud bildirdi.
İradə SARIYEVA
