Ayaz Salayev: “Ümid edirəm ki, Prezidentin göstərişi tezliklə icra olunacaq və ittifaq üçün ya bina tikiləcək, ya da hazır bina veriləcək” Şamil Əliyev: “Hesab edirəm ki, bu vacib məsələ tezliklə həll olunacaq və ittifaq bina ilə təmin ediləcək”
Məlum olduğu kimi, 2012-ci ildə yaradılan Azərbaycan Respublikası Kinematoqraflar İttifaqı təsis edildiyi gündən binasızlıq şəraitində fəaliyyət göstərir.
Prezident İlham Əliyev və ölkəmizin Birinci vitse-prezidenti Mehriban Əliyevanın bir qrup mədəniyyət və incəsənət xadim ilə görüşündə Respublika Kinematoqraflar İttifaqının bina məsələsi də səsləndirilib. Azərbaycan Kinematoqraflar İttifaqının sədri, xalq artisti Şəfiqə Məmmədova görüşdə “Mən istərdim ki, Kinematoqraflar İttifaqının aqibətini bu gün Sizə çatdırım. Artıq altı ildir ki, təsis olunmuş Respublika Kinematoqraflar İttifaqı binasızdır. Azacıq da olsa bizə dəstək verilən o büdcədən il boyu biz kirayə pulu veririk. Fəaliyyətimizə uyğun olmayan yerdə yerləşirik. Düzdür, ağlamırıq. Məktublar yazmışam, lakin bəlkə çatmayıb. Amma çox istərdim, bilirsiniz, artıq bu mümkünsüzdür, il boyu mənim büdcədən verilən vəsaitimin çox hissəsi kirayəyə gedir. Ona görə mən Sizdən xahiş edirəm, bizə elə bir məkan verilsin ki, artıq bu, Kinematoqraflar İttifaqına layiq olsun” - deyə bildirib.
Prezident İlham Əliyev isə dərhal məsələyə müsbət reaksiya verərək, onun həllini müvafiq qurumlara tapşırıb: “Onda təklif olunur ki, Bakı şəhərinin mərkəzində gözəl bina seçilsin. Bakı Şəhər İcra Hakimiyyətinə, Əmlak Məsələləri Komitəsinə, Mədəniyyət Nazirliyinə göstəriş verilir. Şəfiqə xanım, siz özünüz də bu məsələ ilə bağlı təkliflər verin. Əlbəttə ki, biz bunu etməliyik. Çünki Kinematoqraflar İttifaqının müstəqil binası olmalıdır və şərait yaxşı olmalıdır”.
Xalq artisti, tanınmış kinorejissor Ayaz Salayev “Bakı-Xəbər”ə bildirdi ki, 6 ilidir Azərbaycan Kinematoqraflar İttifaqının binasız olması müsbət hal deyil. O hesab edir ki, Prezidentin göstərişindən sonra bu məsələ tezliklə öz həllini tapacaq. “Bilirsiniz ki, Azərbaycan Kinematoqraflar İttifaqı təsis edildiyi gündən binasızlıq şəraitində fəaliyyət göstərir. İttifaq hələ də bina ilə təmin edilməyib. Ümid edirəm ki, Prezidentin göstərişi tezliklə icra olunacaq və ittifaq üçün ya bina tikiləcək, ya da hazır bina veriləcək. İttifaqın binasız olması həqiqətən də çox pis haldır. Bu problemin tezliklə aradan qaldırılacağına əminəm” - deyə bildirən A.Salayevin sözlərinə görə, ittifaqın binasının olmaması onun işinə də mənfi təsir edir.
Tanınmış kinorejissor, “Humay” mükafatçısı Şamil Əliyev də hesab edir ki, Azərbaycan Kinematoqraflar İttifaqının tezliklə bina ilə təmin olunacağına inanır. “Prezidentin tanınmış mədəniyyət və incəsənət xadimləri ilə görüşü kino sahəsinin inkişafı üçün də çox faydalıdır. Bilirsiniz ki, kinoya hər zaman dövlət dəstəyi göstərilib, bu gün də göstərilir. Əgər dövlətin qayğısı olmasaydı, kinonun bir incəsənət sahəsi kimi taleyi sual altında idi. Lakin ümummilli liderimiz Heydər Əliyevin kino sənəti ilə bağlı imzaladığı sərəncamlar, kinoya göstərdiyi diqqət və qayğı kinonu xilas etdi. Bu gün də cənab Prezident kinoya hərtərəfli diqqət və qayğı göstərir. Mədəniyyət və incəsənət xadimlərinin Prezidentlə görüşündə kino ilə bağlı bir sıra əhəmiyyətli məsələlər müzakirə edildi. O cümlədən də Azərbaycan Kinematoqraflar İttifaqının bina ilə təmin olunması məsələsinə toxunuldu. Hesab edirəm ki, bu vacib məsələ tezliklə həll olunacaq və ittifaq bina ilə təmin ediləcək. Mən Prezidentin mədəniyyət və incəsənət xadimləri ilə görüşünü tarixi hadisə hesab edirəm” - deyə Ş.Əliyev bildirdi.
İradə SARIYEVA
