Aydın Kazımzadə: “Sevinirəm ki, artıq kinodan üz döndərmiş tamaşaçıları yenidən kinoya qaytara bilirik” Aysel Əmirova: “Azərbaycan kinosunun düşmənlə üz-üzə dayanan Ağdamda nümayişi olduqca əhəmiyyətlidir”
Ölkəmiz müstəqillik qazandıqdan sonra Azərbaycan kinosunun ölkə daxilində təbliği, nümayişi ilə bağlı elə də geniş səviyyəli işlər görülmürdü. Bir-iki istisnanı nəzərə almasaq deyərdik ki, bu sahədə ciddi problem və çətinliklər mövcud idi. Ancaq son aylar Mədəniyyət və Turizm Nazirliyi tərəfindən bu problemin birdəfəlik aradan qaldırılması üçün bir sıra tədbirlər həyata keçirilməkdədir.
Bildiyimiz kimi, bir neçə həftə əvvəl mədəniyyət və turizm naziri Əbülfəs Qarayev Azərbaycan kinosunun regionlarda nümayiş etdirilməsi, təbliği və təşviqi ilə bağlı əmr imzaladı. Əmrə əsasən, hər il sentyabrın 15-i ölkəmizdə kino mövsümünün başlanğıcı kimi qeyd olunacaq.
Nazirin imzaladığı əmrin artıq icrasına başlanıb. Belə ki, bir neçə rayonda kino mövsümünün açılışı olub. Azərbaycan kinosunun təbliği baxımından böyük əhəmiyyətə malik olan hadisə ekspertlər tərəfindən müsbət qarşılanır.
Qeyd edək ki, sentyabrın 19-da Balakən Rayon Heydər Əliyev Mərkəzində Azərbaycan filmlərinin nümayiş olunması ilə əlaqədar təqdimat mərasimi keçirilib. Balakənlilərə ssenari müəllifi və quruluşçu rejissoru Mirbala Səlimlinin ekranlaşdırdığı “Qırmızı bag” filmi təqdim edilib.
Yeri gəlmişkən bildirək ki, “Qırmızı bağ" bədii filmi Mədəniyyət və Turizm Nazirliyinin sifarişi ilə C.Cabbarlı adına "Azərbaycanfilm" kinostudiyasında və Rusiyanın "WeiT Media" kino şirkətində istehsal olunub.
Zaqatala Rayon Heydər Əliyev Mərkəzində də kino mövsümünün açılışı olub. Burada isə 2011-ci il Azərbaycan istehsalı olan “Buta” bədii filminə tamaşa edilib.
Düşmənlə nəfəs-nəfəsə dayanan Ağdam rayonunda da kino mövsümünün açılışı olub və “Yarımçıq xatirələr” filmi təqdim edilib. Ağdam rayonu Quzanlı qəsəbəsinin Mədəniyyət evində Azərbaycan Respublikasının Prezidenti cənab İlham Əliyevin təsdiq etdiyi “Azərbaycan kinosunun 2008-2018-ci illər üzrə inkişafına dair” Dövlət Proqramına uyğun olaraq, mədəniyyət və turizm naziri cənab Əbülfəs Qarayevin “Milli kinonun inkişafına dair tədbirlər haqqında” 08 avqust 2017-ci il tarixli, 186 saylı əmrinin icrasının təmin olunması məqsədilə müşavirə də keçirilib.
Kino ekspertlərinin bildirdiyinə görə, son illər Azərbaycanda çəkilən filmlərin bölgələrdə nümayişi mövsümi xarakter daşımayacaq. Onların fikrincə, son illər çəkilən filmlər mütəmadi olaraq region tamaşaçılarına təqdim ediləcək.
Kinoşünas Aydın Kazımzadə bizimlə söhbətində filmlərin bölgələrdə nümayişinə başlanmasının müsbət addım olduğunu dedi. Onun sözlərinə görə, bunun əhəmiyyəti böyükdür: “Mən bu işi ancaq alqışlaya bilərəm. Sevinirəm ki, artıq kinodan üz döndərmiş tamaşaçıları yenidən kinoya qaytara bilirik. Mədəniyyət saraylarının kino tamaşaçılarının üzünə açıq olması olduqca böyük əhəmiyyətə malikdir. Azərbaycanda kino çəkilir və bu filmlərin hansı səviyyədə olduğunu tamaşaçılar özləri görəcəklər. Çox gözəl filmlərimiz var. Dövlətimiz də kinoya böyük qayğı göstərir. Düşünürəm ki, filmlərin davamlı olaraq təbliğ edilməsi kinonu daha da inkişaf etdirəcək və tamaşaçıları cəlb edəcək”.
A.Kazımzadə qeyd etdi ki, uzun müddət bölgə tamaşaçıları müasir Azərbaycan filmlərinə kinoteatrlarda, belə imkanı olan məkanlarda baxmayıb, amma bu gün bu iş reallaşıb.
Kinoşünas Aysel Əmirovanın sözlərinə görə, Azərbaycanın milli kino sənəti 119 il ərzində əlamətdar hadisələrlə yadda qalıb. Onun sözlərinə görə, kino cəmiyyətin inkişafında böyük rola malikdir. Kinoşünasın bildirdiyinə görə, Azərbaycan kinosunun əsası 1898-ci il avqustun 2-də Bakı elmi-foto dərnəyinin katibi, naşir və fotoqraf Aleksandr Mişonun lentə aldığı “Bibiheybətdə neft fontanı yanğını”, “Əlahəzrət Buxara əmirinin yolasalma mərasimi”, “Qafqaz rəqsi” xronikal sənədli və “İlişdin” adlı bədii süjetlərinin nümayişi ilə qoyulub.
Azərbaycan dövlətinin kinonun inkişafına həm maddi, həm də mənəvi dəstək verdiyini deyən ekspert bildirdi ki, son 10 ildə ölkəmizdə kino sənayesinin inkişafı istiqamətində mühüm addımlar atılıb, kinomuzun maddi-texniki bazası möhkəmləndirilib: “Prezident İlham Əliyevin 2008-ci il 4 avqust tarixli Sərəncamı ilə təsdiq olunan “Azərbaycan kinosunun 2008-2018-ci illər üzrə inkişafına dair Dövlət Proqramı” Azərbaycan kino sənətinin inkişafında yeni mərhələnin başlanğıcını qoyub.
Bilirsiniz ki, ölkə başçısı kinonun inkişafına kifayət qədər dəstək verir. Bu yaxınlarda da regionlarda film nümayişi işinin təşkili və inkişaf etdirilməsi məqsədilə mədəniyyət və turizm naziri Əbülfəs Qarayevin əmr imzalaması bu sahədə yeni addımların atılması ilə nəticələndi. Artıq bir neçə rayonda Azərbaycan filmləri nümayiş etdirilib. Bu filmlərin çoxundan tamaşaçılar xəbərsiz idi. Ancaq bu gün bir çox regionlarda tamaşaçılar bilir ki, yeni filmlər çəkilir və bu filmlərə maraqla baxırlar. Bildiyim qədər, kino mövsümünün açılışına qədər bu sahədə sistemli işlər görülüb və bu işlər bəhrəsini verəcək. Bölgə tamaşaçıları sovet illərində Azərbaycanda və digər ittifaq respublikalarında çəkilən filmlərlə tanış idilər. Çünki o dövrdə bu filmlərin təbliği, yayımı mərkəzləşdirilmiş qaydada həyata keçirilirdi. Ən ucqar kəndlərdə belə, sakinlər yeni çəkilən filmlərdən xəbərdar idi. O vaxt həm də çox yaxşı bir ənənə vardı, filmləri bölgələrə aparanda kinoda çəkilən aktyorlar da görüşə gedirdi. Tamaşaçılar hətta aktyorlara oyunları haqqında fikirlərini bildirirdi. Ümid edirik ki, bu ənənə də bərpa ediləcək. Sirr deyil ki, bölgə tamaşaçılarının çoxu müasir aktyor və aktrisaları tanımır. Sənətdə yeni olanların da tanıdılmasına ehtiyac var”.
A.Əmirova qeyd etdi ki, Azərbaycan filmlərinin sərhəd bölgələrində nümayişi daha effektivdir. Onun sözlərinə görə, içində yaşadığımız il ərzində filmlərimiz daha çox rayonlarda nümayiş etdiriləcək: “Azərbaycan kinosunun düşmənlə üz-üzə dayanan Ağdamda nümayişi olduqca əhəmiyyətlidir. Hesab edirəm ki, bu daha intensiv xarakter almalıdır. Cəbhə bölgəsində yerləşən rayon və kəndlərdə daha çox vətənpərvərlik, azərbaycançılıq ruhunda çəkilən filmlər təqdim edilməlidir. Bölgələrdə də ali məktəblər, kolleclər var. Bu filmlərə tamaşaçı qismində tələbələr də cəlb edilməlidir. Bu çox yaxşı hal olardı”.
A.Əmirova vurğuladı ki, davamlı olaraq paytaxtda və bölgələrdə yerləşən 250-dək mədəniyyət müəssisəsində həftədə üç dəfədən az olmayaraq Azərbaycan filmlərinin nümayiş olunması qərarı olduqca müsbətdir. Onun sözlərinə görə, rəsmi qərara əsasən, həmin müəssisələrə regionlarda fəaliyyət göstərən Heydər Əliyev mərkəzləri, mədəniyyət sarayları, kənd klubları, eyni zamanda, film nümayişi üçün müvafiq imkanları olan digər obyektlərin daxil olmasının filmlərin daha geniş sferada təbliğinə şərait yaratdığını vurğulayan ekspert dedi ki, bu işdə kino təşkilatları da aktivlik göstərməlidir: “Məlumatıma əsasən, regionlarda və paytaxtda əsasən müstəqillik illərində çəkilən, televiziya ekranlarında nümayiş etdirilməmiş və ya az nümayiş etdirilən filmlərə üstünlük veriləcək. Həmçinin, müstəqillik dövründə Qarabağ mövzusunda çəkilən, habelə sovet dövründə müharibə mövzusunda ekranlaşdırılan müxtəlif mövzularda filmlər də tamaşaçılara təqdim ediləcək. Bayaq sizə dediyim ki, vətənpərvərlik ruhu aşılayan filmlərin nümayişi vacibdir, onu da nümayiş etdirəcəklər”.
İradə SARIYEVA
