Məhərrəm Qasımlı: “Paşinyan nə qədər istəsə belə, erməni ideologiyasına aşıq sənətini daxil edə bilməyəcək, çünki…”
Ermənistanın baş naziri Nikol Paşinyan yeni Konstitusiyanın referendum yolu ilə qəbul edilməsinin "real Ermənistan" ideologiyası üçün mühüm əhəmiyyət kəsb etdiyini ictimaiyyətə açıqlayıb. Hətta "Paşinyan " Real Ermənistan" adlı yeni milli ideologiya adlı sənədi xüsusi bir efir çıxışında təqdim edib.
Erməni milli ideologiyasının əsaslarında onu da qeyd edib ki, erməni aşıq sənəti inkişaf etdirilməlidir.
Qeyd edək ki, Ermənistanın yeni milli ideologiyası da saxtakarlıq üzərində tərtib olunur. Məlumdur ki, aşıq sənəti ta qədimdən Azərbaycana aiddir. Aşıq sənəti heç vaxt ermənilərə aid olmayıb, onların heç sazbəndi, sazı belə olmayıb. Günü bu gün də ermənilər Azərbaycan milli-mənəvi dəyərlərini mənimsəməyə çalışır.
“Bu gün Ermənistanda bir aşıq belə qalmayıb, yoxdur, Azərbaycanla əlaqə kəsilən kimi aşıq sənəti və saz onlardan yox oldu”
Azərbaycan Aşıqlar Birliyinin sədri, professor Məhərrəm Qasımlı “Bakı-Xəbər”ə şərhində bildirdi ki, tarixən ermənilər Azərbaycan aşıqlarının təsirində olub. İrəvan, Qərbi Azərbaycan, o cümlədən Azərbaycanın bir sıra ərazilərində Aşıq Abad və digər yerlərdə İrəvan aşıqları olub. Onlar güclü şəkildə Azərbaycan aşıqlarının təsiri altında olub: “Ancaq bu gün Ermənistanda bir aşıq belə qalmayıb, yoxdur. Azərbaycanla əlaqə kəsilən kimi aşıq sənəti və saz onlardan yox oldu. Paşinyanın məlum fikri ilə bağlı onu deyə bilərəm ki, o Qərb bölgəsindədir. Ora da Qazax, Tovuza yaxın olduğu üçün aşıq sənəti ona doğma gəlir. Çünki o vaxtlar Qazax, Tovuz aşıqları onların toyunu aparıb, ənənəni bilir. Mən biləni, Paşinyanın babası zurnaçı olub. O tez-tez Qazax, Tovuz toylarında çalıb. Bu səbəbdən də saz ona doğma gələ bilər. Ancaq unutmamalıdır ki, o başqa mədəniyyətin təsiri altındadır”.
Həmsöhbətimiz onu da əlavə etdi ki, tarixən böyük, tanınmış sazbəndləri elə Azərbaycan torpağı yetişdirib. Paşinyan nə qədər istəsə belə, erməni ideologiyasına aşıq sənətini daxil edə bilməyəcək. Çünki aşıq sənəti Azərbaycana məxsusdur.
Günel CƏLİLOVA
