Rasim Balayev nə etməliyidi, Prezident yüksək mükafat - İstiqlal ordeni verir, Nəsimi, Babək obrazlarından danışır, o da durub iqtisadiyyatdan danışmalıydı? Söz düşmüşkən, qələbə müharibəsində Ali Baş Komandanın rolunu qiymətləndirib Babəkə bənzədir. Söhbət həmən an Babəkdən düşdüyü üçün belə müqayisə aparır, deməliydi əsl Napoleon Sizsiz?
Yoxsa bu qələbədə dövlət başçısının rolu yoxdur? Axı uzaq tarix deyil, hər şeyi hamımız gördük. Şəhid və qazilərimizin qəhrəmanlığı, ordumuzun, dövlətimizin, xalqımızın möhtəşəmliyi göz önündə idi.
Prezidentin bəlkə əvvəllər heç özünə də məlum olmayan fitri istedadları, geniş təsəvvür etmə, sonranı hesablaya bilmək, ağıllı, cəsarətli qərarları dünyanı heyrətə salmamışdı?
İndi Rusiya-Ukrayna-NATO müharibəsi fonunda bu aydın görünmür?
Müharibədən əvvəlki anı nəzərə alıb, sonrakı dəyişmələri təsəvvür etməkdə səhvlər buraxmışdı bir çox tarixi şəxsiyyətlər. Çoxu ildırım sürətilə qələbə proqnozlaşdırmışdı.
Napoleon hər şeyi hesablamışdı, başını qaldırıb təqvimə baxmağı, qabaqdan qış gəldiyini nəzərə almağı unutmuşdu. Hitler ildırım sürətilə Moskvanı tutacağını düşünmüş, SSRİ-nin genişliyini nəzərə almamışdı.
Putinə generalları 2-3 günə Kiyevdə şampan partlatmağa söz vermişlər, Qərb sanksiyalarla Rusiyanı çökdürməyi düşünmüşdü. Hanı nəticələr? Nə oldu? Bataqlıq.
Yaxın dünya tarixində müharibə edib qələbə çalan ikinci bir ölkə göstərə bilərsiz?
Bu qələbədə hər kəsin - əlində bayraq tutub "Azərbaycan" qışqıran uşaqdan Ali Baş Komandana qədər - payı vardı.
İndi bunu dilə gətirən Xalq artistinə hücumlar nəyə lazımdı?
Düzdür, Rasim müəllimin son müsahibədə səsləndirdiyi fikirlər məqbul deyil, ən azından daha təmkinli cavab verə bilərdi. Ancaq 75 yaşlı insanın, neçə gündür haqqında gedən söz-söhbətdən bezmiş, əsəbləşmiş, bir az da müxbirin suallarından əsəbiləşən vəziyyətdə ona irad tutanları xalq, kütlə anlayışları ilə eyniləşdirməsi baş verdi, yenidən müzakirələr başladı.
Nədənsə yaxşı şeyləri, uğurları, faydalı işləri deyil, belə şeyləri danışmaqdan zövq alırıq elə bil...
Bir neçə gün əvvəl Ramiz Rövşənin məlum şeirinin Necib Fazilin şeirlərilə oxşarlığını, şair buna izah verərsə yaxşı olar fikrini yazmışdım. Nə qədər dostlarımız müzakirəyə qoşulmuşdu. Amma faydası da bu oldu ki, kimsə bu şeirin bir hissəsini kəsib, türkcəyə çevirib, rəhmətlik Necib Fazilin şəklini qoyub, paylaşıb. Şeirin bütöv variantı Azərbaycan dilindədir və dəyərli şairimiz Ramiz Rövşənə məxsusdur.
Bilirsiniz, böyüklərimizi, dəyərlilərimizi təftiş etməyək, prokuror kimi onları sorğu - sual etməyək, səhv axtarmayaq, böyüklük axtaraq, faydalı tərəflərini qabardaq.
O pisdi, bu belədi, nə edək, çıxaq Marsdan gətirək?
Bəzən düşünürəm ki, çox yox e, 10-20 il sonra indiki uşaqlar, elə biz özümüz də Xankəndidə bir söyüdün altında paxlava ilə samovar çayı içə-içə gözlərimizi qıyıb ironiya ilə baxacağıq ki, görün nələri müzakirə edirmişik?!
Sən demə, bizə həqiqət kimi görsənən şübhələr, dedi-qodular ilğım imiş, Rasim Balayev də, Ramiz Rövşən də, digər səhv tutmaq istədiklərimiz də dəyərli azərbaycanlılar imiş.
Azərbaycan xalqı Sadıq Qarayevin dediyi kimi ali xalq imiş...
Sadıq Qarayev alim, yazıçı
