Prezident İlham Əliyevin müvafiq Sərəncamına uyğun olaraq, Mədəniyyət Nazirliyinin strukturuna daxil olan regional mədəniyyət idarələri yenidən təşkil edilib.
Azərbaycanın iqtisadi rayonlarının yeni bölgüsünə uyğun olaraq, nazirliyin Sumqayıt, Xaçmaz, İsmayıllı, Şəki, Kürdəmir, Ağstafa, Şəmkir, Gəncə, Bərdə, Ağcabədi, Ağdaş, Sabirabad, Biləsuvar, Masallı və Lənkəran regional mədəniyyət idarələri əsasında Abşeron-Xızı, Dağlıq Şirvan, Gəncə-Daşkəsən, Qarabağ, Qazax-Tovuz, Quba-Xaçmaz, Lənkəran-Astara, Mərkəzi Aran, Mil-Muğan, Şəki-Zaqatala, Şərqi Zəngəzur və Şirvan-Salyan regional mədəniyyət idarələri yaradılıb.
Prezidentin sözügedən Sərəncamına müvafiq olaraq, Mədəniyyət Nazirliyi tərəfindən yeni regional mədəniyyət idarələrinin strukturu və əsasnamələri təsdiqlənib.
Prezidentin sərəncamı ilə artıq bu sahədə yeni yanaşma olacaq. Məlum olduğu kimi, uzun illər mədəniyyətin idarə edilməsi sahəsində ciddi problemlər olub, mədəniyyət idarələrində ciddi korrupsiya, əyintilər barədə məlumatlar yayılıb. Sonradan regional mədəniyyət idarələri yaradılıb, onların da fəaliyyəti qüsursuz olmayıb. Yəni nəzərə alsaq ki, mədəniyyət idarələrinin, regional idarələrin fəaliyyətində ciddi pozuntular olub, bu baxımdan yeni struktur dəyişikliyi nə vəd edir?
"Regional idarələrin bəzilərində ciddi pozuntular olub, onların aradan qaldırılacağına ümid edirik"
Medianews.az-ın baş redaktoru, sənətşünas Xəyalə Rais “Bakı-Xəbər”ə şərhində bildirdi ki, Prezident İlham Əliyevin müvafiq Sərəncamına uyğun olaraq, Mədəniyyət Nazirliyinin strukturuna daxil olan regional mədəniyyət idarələrinin yenidən təşkil edilməsi çox müsbət haldır. "Bilirsiz ki, regional mədəniyyət idarələrinin əksəriyyətinin fəaliyyəti yarıtmaz idi. Ciddi nöqsanların, pozuntuların olduğu gizlin deyildi. Elə regional idarələr vardı ki, onların rəhbərlərinin regiondan xəbərləri yox idi. Bəzi idarələr bir - iki tədbir keçirməklə işlərini bitmiş sayırdılar. Bu sahədə ciddi islahatların keçirilməsi zərurətə çevrilmişdi və artıq prosesə start verilib. Bizim mədəniyyətimizin özəyi bölgələrdə yerləşir və bu baxımdan orada mədəniyyətin hər sahəsinə xüsusi diqqət ayrılmalıdır. Fikrimcə, regional mədəniyyət idarələrinin yenidən təşkil olunması bu sahədə mövcud olan problemlərin köklü həllində mühüm rol oynayacaq".
X.Raisin sözlərinə görə, yeni dəyişiklik onu deməyə əsas verir ki, ixtisaslı kadrların işlə təmin edilməsi üçün əsaslı işlər görüləcək. Onun fikrincə, bu sahədə mövcud olan korrupsiya halları əsasən mədəniyyətin idarə edilməsi sahəsində ixtisaslı kadrların olmaması ilə bağlı olub ki, bu da musiqi məktəblərində, incəsənət təmayüllü təhsil ocaqlarında, özfəaliyyət dərnəklərində, kitabxalarda, xalq teatrında və sairdə ciddi problemlərin mövcudluğuna səbəb olub. "Regional idarələrin bəzilərində ciddi pozuntular olub, onların aradan qaldırılacağına ümid edirik. Bütün idarələrin işləri yenidən araşdırılmalı, şikayətlərə diqqət yetirilməlidir. Bilirsiz ki, əvvəllər neçə idarənin müdiri işində yol verdiyi nöqsanlara görə vəzifəsini itirib. Rayonların arxeologiyasından tutmuş tarixinə, musiqisinə və başqa mədəniyyət sahələrinə qədər hər şeyin inkişafına diqqət yetirilməlidir. Verilən tapşırıqlar icra olunmalıdır. Çox təəssüf ki, uzun illər çoxları bu sahəyə yeyinti obyekti kimi baxıb. Amma ümid edirəm ki, artıq mədəniyyət idarələrinə yem yeri kimi baxanlara bu qurumlarda yer olmayacaq. Bu idarələrdə mədəniyyətimizi yaxşı bilən, onu təbliğ edən, regionları yaxşı tanıyan insanlar vəzifədə olacaqlar. Dəyişikliklərin uğurlu olacağına inanıram. Bu sahədə ciddi problemlər var, onların tez bir zamanda aradan qaldırılacağına inanıram" - deyə X.Rais bildirdi.
İradə SARIYEVA
