Azərbaycan dili elə qüdrətlidir ki, onun əzəmətindən, səslənişindən bizi sevməyənlər əndişəyə düşər, dostlar o dilin gözəlliyini hava-su kimi canına çəkər. Çox təəssüflər olsun ki, 100 ilə yaxındır ana dilimiz panfarsistlərin yumruğu altında əzilir. Hazırda fars-molla rejiminin təzyiqi altında olan Güney Azərbaycanda dilimiz şifahi şəkildə yaşadılır, bu dildə yazıb-oxumaq, film çəkmək, tamaşa göstərmək yasaqdır. Molla rejimi uzun illərdir dilimizə düşmən kəsilib, dilimizi yaşadanlara, təbliğ edənlərə cəlladlıq edir.
Azərbaycan dilində hansısa bir tamaşa qoyularsa rejim tör-töküntüləri dərhal müdaxilə edər.
Azad İran Telegram kanalı “GünAZ”a istinadən məlumat yayıb ki, Urmu şəhərində "Şəhriyar" tamaşasının sonadək oynanılmasına icazə verilməyib. Teatr kollektivi aktyorlardan birinin xəsarət aldığını bildirib. “Halbuki, mühafizəkar simalardan bəziləri tamaşada qadınların Azərbaycan rəqsini ifa etməsinə etiraz edərək teatra qarşı mübarizə aparılmasını tələb ediblər.
Tamaşanın ləğvindən sonra media və fəallar bildiriblər ki, Urmu şəhər Mədəniyyət və İrşad İdarəsinin rəisi Əlirza Novruzi həmin mühafizəkarların bu əməlinə dəstək verib”-deyə məlumatdaa qeyd olunur.
Molla rejimi Azərbaycan dilində tamaşadan niyə qorxub?
“Panfarsist rejim Urmudan Azərbaycanın adını, mədəniyyətimizin, dilimizin izini silmək istəyir”
BAO sədrinin müavini Babək Türkoğlu “Bakı-Xəbər”ə şərhində bildirdi ki, Urmu bizim ən həssas nöqtələrimizdən biridir. B.Türkoğlu qeyd etdi ki, dövlətçiyimizin əsas ocaqlarından olan Urmiyada (Urmu) dilimizin, mədəniyyətimizin təbliğ edilməsi molla rejimini ciddi qorxudur. “Bura çox həssas bir ərazimizdir. Qorxuruq ki, yaxın gələcəkdə biz növbəti Qarabağ faciəsini Urmiyada yaşaya bilərik. İraqın kürdlər yaşayan hansısa bir bölgəsinin valisi ilə İranın daxili işlər naziri gəlib Urmuda görüş keçirib. Çox təəssüflər olsun ki, Qərbi Azərbaycan vilayətində kürdləşdirmə siyasətinə başlanılıb. Burada imkan düşdükcə kürd mədəniyyətini, həyat tərzini təbliğ etməyə çalışırlar. Hətta İraqdan, Suriyadan gələn separatçı qrupları kürd geyimi geyən uşaqlar qarşılayıb. Fars molla rejiminin Azərbaycana qarşı olan nifrəti, düşmənçiliyi görün nə həddə çatıb ki, onun ərazisindən torpaq istəyən sepratçılarla belə işbirliyinə hazırdırlar. Sözümün canı odur ki, biz molla rejimindən mədəniyyətimizə qarşı hər cür düşmənçilik gözləyirik. Panfarsist rejim Urmudan Azərbaycanın adını, mədəniyyətimizin, dilimizin izini silmək istəyir. Mollakratiya heç zaman orada Azərbaycanla bağlı heç bir mədəni hadisənin baş verməsinə imkan vermir. Sözügedən tamaşanın yarımçıq dayandırılması panfarsistlərin türk düşmənçiliyindən qaynaqlanır. Onlar bizim dilimizin, mədəniyyətimizin gücündən hər zaman qorxurlar. Mollalar Azərbaycan adına çox ağrılı yanaşırlar və nifrət sərgiləyirlər”-deyə B.Türkoğlu qeyd etdi.
İşğalçı molla rejiminin bütün oyunlarının düşmənçilikdən qaynaqlandığını deyən müsahibimiz bildirdi ki, “Şəhryar” tamaşasının göstərildiyi salonun icarə haqqı və bütün biletlərin pulu azərbaycanlı iş adamı tərəfindən ödənilibmiş: “Tamaşanın bütün xərcləri iş adamı tərəfindən ödənilmişdi ki, nəyin bahasına olursa olsun, o tamaşa göstərilsin, milli rəqsimiz təqdim edilsin və tamaşaçılar da gəlib pulsuz baxsınlar, öz mədəniyyətləri ilə tanış olsunlar. Məqsəd camaatı tamaşaya cəlb edib mədəniyyətimizi nümayiş etdirmək olub. Amma təəssüf ki, molla rejimi bunun qarşısını almaq üçün təxribat həyata keçirib. Mollakratiya görür ki, heç bir təzyiqə baxmayaraq xalqımız birləşir, ona görə də bu cür hərəkətlər edib. Molla rejimi həm Azərbaycan dilində tamaşanın təqdim edilməsini, həm də soydaşlarımızın birləşib öz mədəniyyətinə sahib çıxamaq istəklərini həzm edə bilmədi. O bizim birliyimizdən qorxur”-deyə müsahibimiz vurğuladı.
Leyla QARAXANLI
