Xeyli vaxtdır mətbuatda Azərbaycan Respublikası Kinematoqrafçılar İttifaqı (ARKİ) barədə müəyyən söz-söhbətlər gedir. Bir müddət əvvəl məlumat yayıldı ki, ARKİ-nin növbədənkənar qurultayı qanunsuz olub və s. Qurum isə qurultayın keçirilməsi ilə bağlı xəbəri təkzib etdi.
Onu da deyək ki, xalq artisti Şəfiqə Məmmədovanın sədri olduğu ARKİ barədə bir sıra kino xadimləri tənqidi fikirlər bildirib. Bir sözlə, ittifaq ətrafında söz-söhbət səngimək bilmir, günü-gündən daha da böyüyür. Son günlər isə mətbuatda ARKİ ilə bağlı başqa bir qalmaqallı fikirlər yayılıb. Belə ki, ARKİ-nin mətubat katibi vəzifəsindən ayrılan Əli Vəliyev qurum barədə qalmaqallı açıqlamalar verib. O, “Milli.Az”a açıqlamasında İttifaqdakı özbaşınalıqlarla bağlı son açıqlamalarından sonra ciddi təzyiqlə üzləşdiyini bildirib: “İşdən çıxmağımla bağlı açıqlamalar verəndən sonra mənə qarşı təzyiqlər artıb. Dediklərimin hamısı düzdür, hamısı faktdır. Vətən müharibəsi zamanı "YAŞAT" Fonduna köçürmək üçün üzvlərdən və katiblərdən pul toplandı, eyni zamanda mən özüm də müəyyən vəsait qoymuşam ora. Xalq artisti Vasif Babayev 500 manat, Nəriman Məmmədov 200 manat, Oktay Mirqasım müəyyən qədər və s. pullar ödəmişik. Ümumilikdə 2820 manat pul yığıldı. Hətta Vasif Babayev o pulu verəndə açıq qeyd etdi ki, "Balalarımın boğazından kəsib, bu pulu qazilərimiz, şəhid ailələrimiz üçün göndərirəm". Şəfiqə Məmmədova isə bu pulları mənimsəyib, qoyub cibinə. Əvəzində dövlətin İttifaqa ayırdığı puldan 5 min manat YAŞAT Fonduna ianə edib.
Qoy, həmin o 2820 manatı hara köçürübsə, zəhmət olmasa Şəfiqə xanım onun qəbzini versin. Verə bilməyəcək. Əgər dediyimin əksini edə bilsə, mən üzr istəyib, sözlərimi geri götürəcəyəm".
“Əli Vəliyev tərəfindən təqdim edilən qərəzli məlumatlar hüquqi qiymət verilməsi üçün araşdırma materiallarına əlavə edilmişdir”
Ə.Vəliyevin ittihamları kifayət qədər ciddi ittihamlardır və bununla bağlı ARKİ-nin açıqlama verməsi vacibdir. Bu məsələ ilə əlaqədar ARKİ ilə əlaqə saxladıq. ARKİ-nin “Bakı-Xəbər”ə verdiyi yazılı açıqlamada Ə.Vəliyevin iddiaların əsassız olduğu vurğulanıb: “Məlumat üçün bildiririk ki, ARKİ-nin əməkdaşı olmuş Əli Vəliyev cəmiyyətimizin həssas olan təbəqəsinin, yəni şəhid ailələrinin adını hallandıraraq 25.01.2023-cü il tarixdə növbəti dəfə həqiqətə uyğun olmayan məlumat təqdim etmişdir.
ARKİ-nin mühasibatlıq sənədlərinə əsasən 19.10.2020-ci il tarixdə ARKİ-nin üzvləri tərəfindən könüllülük prinsipi əsasında yığılan 2220 AZN nağd vəsait Azərbaycan Respublikasının Silahlı Qüvvələrinin hesabına köçürülmüşdür.
Qeyd edilən vəsait nağd üsulla ARKİ-nin hesabına mədaxil edilmiş və ARKİ-nin hesabından əlavə vəsait ayrılmaqla ümumilikdə 5000 AZN məbləğində vəsait Azərbaycan Respublikasının Silahlı Qüvvələrinin hesabına köçürülmüşdür.
Əli Vəliyev tərəfindən təqdim edilən qərəzli məlumatlar hüquqi qiymət verilməsi üçün araşdırma materiallarına əlavə edilmişdir.
25.01.2023-cü il tarixli məqalədə “üzr istəyib sözlərimi geri götürəcəyəm” sözü ilə əlaqədar bildiririk ki, həqiqətə uyğun olmayan məlumat təqdim etdiyi üçün şəhid ailələrindən üzr istəməyi təklif olunur”.
Leyla QARAXANLI
