Həmidə Rüstəmova: “Yoxlamaların nə üçün, hansı istiqamətlərdə aparıldığı bizə məlum deyil”
Mədəniyyət Nazirliyinin müvafiq əmri əsasında Abdulla Şaiq adına Azərbaycan Dövlət Kukla Teatrında xidməti araşdırmanın aparılması üçün komissiya yaradılıb.
Bu barədə Trend-in sorğusuna cavab olaraq Mədəniyyət Nazirliyindən məlumat verilib.
Qeyd edilib ki, Azərbaycan Respublikasının Mədəniyyət Nazirliyi tərəfindən həyata keçirilən islahatlar çərçivəsində nazirliyin strukturuna daxil olan və strukturuna daxil olmayan tabe qurumların fəaliyyəti yoxlanılır, aşkar edilən nöqsanlarla bağlı müvafiq tədbirlər görülür. “Nazirliyin tabeliyində fəaliyyət göstərən teatrlarda da yol verilən pozuntu hallarına dair nazirliyə müraciətlər daxil olub, həmçinin bu barədə mediada məlumatlar yayılıb.
Xidməti araşdırmanın nəticələri barədə kütləvi informasiya vasitələrinə məlumat veriləcək”,- deyə qeyd edilib.
Qeyd edək ki, Kukla Teatrının rejissoru, "Oyuq", "Küllücə" studiyalarının və "Oyun" teatrının rəhbəri, yazıçı Səidə Haqverdiyeva mətbuata verdiyi açıqlamada yoxlamanın məhz onun KİV-dəki açıqlaması ilə bağlı olduğunu iddia edib. S.Haqverdiyeva açıqlamasında, həmçinin, Mədəniyyət Nazirliyinin son 3 ildə onlara diqqətsizliyindən gileylənib:“Bir həftə əvvəl mətbuatda müsahibəm çıxmışdı və orada haqlı olaraq məni narahat edən bəzi məqamlara toxunmuşdum. Həmin açıqlamadan tam bir həftə sonra, yəni noyabrın 21-də Kukla Teatrına yoxlama gəlib. Əllərində sənəd var ki, guya bütün teatrları və Nazirliyin balansında olan qurumları yoxlayacaqlar. Amma paytaxt teatrları olaraq birinci bizdən başlayıblar. Mən demirəm məhz buna görə gəliblər, amma belə görünür.
Bu məsələdə mütləq şəkildə qərəz var. Çünki Rəşad Əhmədzadə mənim həyat yoldaşımdır. Kiçik uşağa da bunu desən, eynən o da düşünəcək ki, bir həftə əvvəl adam etirazını dilə gətirib. Bir həftə sonra onun həyat yoldaşının rəhbərlik etdiyi quruma yoxlama göndərilib. Sizcə bunun altında nə yatır? Bəlkə mən səhv anlayıram?”
Səidə Haqverdiyeva Mədəniyyət Nazirliyinin teatra ögey münasibətindən də danışıb:“Teatra festivallardan dəvətlər gəlir, amma Nazirlik maliyyə ayırmır. Namiq Ağayevin 60 illik yubileyi keçirildi. Dəvət olunduqları halda Mədəniyyət Nazirliyindən bir nəfər olsun təşrif buyurmadı. Sadalamağa başlasam, siyahı uzun olacaq. Bir neçə ay əvvəl Kukla Teatrının direktoru Rəşad Əhmədzadə də müsahibəsində bildirmişdi ki, Kukla Teatrının 90 illik yubileyinə nazir gəlmədi. Bilirsiz ki, 1931-ci ildən bu teatr yaradılıb və bir ömürlük yol gəlib. Amma nazir gəlməmişdi.
Haqlı olaraq öz gözləntimizi və bəkləntimizi dilə gətirmişdik. Bir neçə ay keçdi, heç bir reaksiya olmadı. Indi isə bir həftə əvvəl verdiyim müsahibə səbəbindən yoxlama başladılıb. Qeyd edim ki, Kukla Teatrı bacardığını edir, ayaqda durmağa çalışır və bir-birindən gözəl tamaşalar hazırlayır. Amma 3 ildir teatr Mədəniyyət Nazirliyinin diqqətindən kənarda fəaliyyət göstərir. Halbuki, teatr uşaqlara xidmət göstərir və hər zaman qayğıya, diqqətə ehtiyacı var. Yeganə teatrdır ki, getdiyi bütün festivallardan birinciliklə qayıdıb.
Hətta nəzdində “Oyuq” studiyası fəaliyyət göstərir ki, azyaşlı uşaqlardan ibarətdir. Xaricdə baş tutan festivallarda iki dəfə Qran-pri, bir dəfə birincilik, bir dəfə isə fərqlənmə diplomu alıb”, -deyə rejissor əlavə edib.
Dövlət Kukla Teatrında nə baş verir və nazirlik teatrda hansı dövrləri yoxlayır? Məsələ ilə bağlı teatrın mətbuat xidmətinin rəhbəri Həmidə Rüstəmova ilə əlaqə saxladıq. H.Rüstəmova “Bakı-Xəbər”ə açıqlamasında bildirdi ki, nazirlik tərəfindən teatrda yoxlamalar davam edir, amma yoxlamanın hansı səbəbdən aparıldığı onlara məlum deyil. “Azərbaycan Dövlət Kukla Teatrında yoxlamalara 21 noyabr 2022-ci il tarixindən başlanılıb. Mədəniyyət nazirinin bu barədə əmri 18 noyabrda imzalansa da, bizə həmin əmr ayın 21-i daxil oldu. Teatrın istirahət günü idi. Bilirsiz ki, həftənin birinci günləri teatrların istirahət günü olur. Amma inzibati şəxslərdən həmin gün çalışanlar olur. Yoxlama elə onlarla başladı. Yoxlamaların nə üçün, hansı istiqamətlərdə aparıldığı bizə məlum deyil. Yalnız biz onu bilirik ki, bu yoxlama Azərbaycan Dövlət Kukla Teatrından başlayıb. Bu yoxlamanın digər teatrlara da şamil olunacağını bilmirəm. Yoxlamanın operativ, ədalətli olacağı, yaxud məqsədi barəsində də sizə heç bir məlumat verə bilməyəcəyəm. Hamımız oturub nəticəni gözləyirik. Bütün hallarda tamaşa plan göstəricilərini, tamaşalardan əldə olunan gəlir göstəricilərini çox şəffaflıqla, açıq kassa ilə həyata keçirən teatrdan yoxlamaya başlanılması, yəqin ki, həm də digər teatrlara siqnal vermək üçündür. Yəqin ki, qanun pozuntusu aşkar etmək niyyəti ilə aparılan bu yoxlamalar mətbuatda adı bu və digər şəkildə hallandırılan teatrlardan başlansaydı daha arzuolunan idi. Amma yəqin istədilər ki, bizdən başlasınlar və başqa teatrı da xəbərdar etsinlər ki, ehtiyatlı olun, gəlirik.
Hər halda, Nazirlik rəsmi strukturdur, onun yoxlama aparmaq səlahiyyəti var. Yəni nazirlik teatrın istənilən şöbəsində istənilən istiqamət üzrə yoxlamalar apara bilər. Bizim də bu yoxlamanın aparılmasına qətiyyən mane olmaq fikrimiz yoxdur”. Yoxlama aparmağın nazirliyin səlahiyyətinə aid olduğunu deyən H.Rüstəmova vurğuladı ki, bu yoxlamalarla bağlı məlumatların teatr kulislərinə daşınması, teatrların müzakirə predmetinə çevrilməsi narahatvericidir, bu düzün deyil, yolverilməzdir. “Burada məqsəd o idi ki, Rəşad Əhmədzadənin işgüzar nüfuzuna xələl gətirilsin, bu və digər şəkildə onun adını hansısa sensasiyaya, qalmaqala çevrsinlər. Bu məlumatın kənara sızdırılması məhz bu məsələyə xidmət edib. Nazirliyin daxili audit şöbəsinin bir neçə əməkdaşına məlum olan nazirin bu əmri necə olur ki, başqa teatrlarda, başqa sənət adamları, bir neçə fərdlər arasında müzakirə olunur, əmrlər "kopyalanıb" bir-birinə ötürülür". H.Rüstəmova vurğuladı ki, nazirliyin mətbuat xidmətinin rəhbəri Nuridə Allahyarovaya müraciət edib və bu məlumatların hansı yollarla mətbuata sızdırıldığı barədə sual ünvanlayıb. "Belə çıxır ki, nazirlikdə imzalanan hər bir əmr elə ictimaiyyətə açıqlanmamışdan, dəftərxanaya gedib çıxmamışdan əvvəl kimlərinsə telefonlarında, vatsaplarına olur. Məsələnin bu tərəfi daha ağrıdıcıdır. Fikrimcə, Mədəniyyət Nazirliyi məhz bu məqama daha çox diqqət yetirməlidir"-deyə teatrın mətbuat xidmətinin rəhbəri bildirdi.
Yəqin ki, mövzu ilə bağlı Mədəniyyət Nazirliyi yenidən geniş açıqlama verəcək, iddialara, səsləndirən fikirlərə aydınlıq gətirəcək.
İradə SARIYEVA
