Osman Qazi və Orhan Qazinin türbələrini ziyarət etdikdən sonra üz tuturuq Bursa Ulu Camisinə. Bursa Ulu Camisi Osmanlı sultanı Bəyazidin Nigbolu səfərindən dönərkən verdiyi göstəriş əsasında inşa edilib. Bu inşaatın tarixi barədə dəqiq bilgi olmasa da, minbərin qarşısındakı 802 (1399) rəqəmi caminin inşa tarixi kimi qəbul olunub. 1413-cü ildə Yıldırım Bəyazidin Ankara savaşında əsir düşməsinin ardından Timurun Bursanı işğalı və Bəyazidin oğulları arasında yaşanan çəkişmələr zamanı caminin iki dəfə yandırılmasına cəhd edilib.
Caminin ən diqqətçəkən tərəfi burada Yavuz Sultan Səlim tərəfindən 1517-ci ildə Misirin fəthi və xilafətin Osmanlıya keçdiyi dönəmdə Kəbədən gətirilən və Ulu Camiyə hədiyyə edilən örtükdür ki, bugünə kimi qorunub saxlanır və əsrlərlə burada saxlanmasına baxmayaraq, qüsursuz görünüşü ilə görənləri valeh edir.
Ulu Cami daha sonralar, 1889-cu il zəlzələsində də ciddi zərər görüb. Zəlzələ sonrası sultan Əbdülməcid xan İstanbuldan usta və sənətkarlar gətirdərək bu müqəddəs ocağı əvvəlki vəziyyətinə gətirdib.
Hazırda Bursanın önəmli tarixi simvollarından sayılan bu unikal tikili şəhərin tam mərkəzində - Atatürk caddəsində yerləşir.
Bursanın saysız gəzməli-görməli yerləri sırasında Bursa Panoramik Muzeyinin də xüsusi yeri var. Osman Qazi Bələdiyyəsinin inşa etdiyi “1326 Bursa Panoramik Muzeyi”nin təməli 2015-ci ildə qoyulub. Burada 6 Osmanlı sultanının hakimiyyət dönəmini əks etdirən və onların Bursa şəhərində yaşadıqları dövrlərdə ictimai həyatlarını əks etdirən 16 rəsm əsəri nümayiş olunur. Muzeyin 3-cü qatına qalxan hər kəs özünü Bizans dönəmində Prusya adlandırılan Bursanın fəthi və buraya köç dalğasının başlaması prosesinin içində hiss edir. Muzeyin aurası o qədər cazibəlidir ki, ilk anda eskalatorun səni açıq havaya çıxardığını zənn edirsən. İstər dairəvi gümbəz şəklindəki zalda çəkilən rəsmlər, istərsə də köç dalğasının səsi – at kişnərtisi, insan səsləri, silah cingiltisi və mal-heyvan sürüsünün təlaşlı səs-sədası insanı əsrlərin ötəsinə aparır, bir anlıq sanki zaman və məkan anlayışını itirirsən...
Muzeylə bağlı bizi ilgiləndirən ən maraqlı xəbər isə o oldu ki, bu əsrarəngiz layihənin rəhbəri 20 ildən çoxdur Türkiyədə yaşayan Azərbaycan Respublikasının Əməkdar rəssamı Yaşar Zeynalovdur.
Samirə SƏFƏROVA
Bursa-Türkiyə
Ardı var
