Qarış-qarış gəziləsi, öyrəniləsi bir möcüzədir Türkiyə... Hər daşının, qayasının altından bir tarix boylanır – qürurverici, möhtəşəm bir tarix... Sanki hər addımda böyük Türk millətinin əzəmətini hiss edirsən, əzmkar ruhunu duyursan. Çünki bir ağıllara sığmayan Çanaqqala Zəfəri ilə bütün dünyanı mat qoyan cəsarətin beşiyidir Türkiyə... Bir də, məşhur bir mahnıda deyildiyi kimi, “Hər köşəsi cənnətim”dir Türkiyə...
Budəfəki Türkiyə səfərimiz bu cənnət ölkənin Bursa şəhərində keçirilən “Qorqud Ata” Beynəlxalq Film Festivalı ilə bağlı idi. Türkiyə Mədəniyyət Nazirliyinin təşkilatçılığı, Türkiyə Cumhuriyyətinin Azərbaycandakı Səfirliyinin dəstəyilə baş tutan səfər İstanbulu ziyarətlə başladı. İlk ziyarət etdiyimiz məkan isə, təbii olaraq, Türk dünyasının Atası böyük Atatürkün adını daşıyan Mədəniyyət (Kültür) Mərkəzi oldu. İlk dəfə 1969-cu ildə dünyanın dördüncü böyük mədəniyyət mərkəzi olaraq qapılarını sənətsevərlərin üzünə açan bu çoxfunksiyalı Mərkəz həm də İstanbulun əsas simvollarından biri sayılır. Əslində əsası 1946-cı ildə qoyulan binanın tikilib ərsəyə gəlməsi müxtəlif səbəblərdən 23 il çəkib. 1970-ci ildə isə Artur Millerin “Çətin sınaq” pyesinin nümayişi zamanı binada yanğın baş verib. Yanğın zamanı insanlar arasında xəsarət alan olmasa da, Mərkəzə Topqapı sarayından teatrda istifadə edilməsi məqsədilə gətirilən Sultan IV Muradın kaftanı, sultanı əks etdirən rəsm əsəri və qiymətli Quran yanaraq məhv olub.
İstanbulun tam ortasında – Taksim meydanında yerləşən mərkəzin binası 1960-cı il Türk memarlıq üslubunun parlaq nümunələrinədən biri hesab olunur. Mərkəzdə opera, balet, teatr, konsert salonları ilə yanaşı sərgi salonu və kitabxana da fəaliyyət göstərir. Buranı unikal edən ən maraqlı cəhət isə pəncərə şüşələrinin səskeçirməz olmasıdır. O üzdən, şəhərin ən qələbəlik yeri sayılan Taksim Gəzi Parkının qarşısında yerləşməsinə rəğmən, burada tam bir səssizlik hökm sürür. Kitabxana fondu 300 min nüsxə təşkil edir və ziyarət etdiyimiz sürədə buraya kifayət qədər marağın olduğunun şahidi olduq.
Mərkəzin ikinci qatında yerləşən Müzik Qaleri buranı ziyarət edən hər kəsi heyran qoyur. Burada çox maraqlı formada tavandan asılmış, Türk musiqisinini müxtəlif dönəmlərinə aid musiqi alətlərindən tutmuş, divarlardan asılmış yazılara, ekranda davamlı şəkildə nümayiş olunan Mövlana rəqslərinə qədər hər şey unikallığı ilə seçilir.
Mərkəzin daha bir maraq doğuran məkanı İstanbulu əks etdirən rəsm əsərlərinin yer aldığı Sərgi Salonudur. Sərgi ən müxtəlif rəssamların fırçasından çıxmış əsərlərdə İstanbulu ziyarətçilərinə müxtəlif rakurslardan və tam fərqli rəng çalarları ilə təqdim edir.
Samirə SƏFƏROVA
Ardı var
