Ölkə teatrlarının bir çoxunda vəziyyət elə də ürəkaçan deyil. Hazırda bəzi teatrların direktorsuz olması faktı vəziyyəti daha da qəlizləşir. Bir yandan bahalaşma, bir yandan məvacibin azlığı, başqa bir tərəfdən rəhbərsizlik teatrları gücdən salır, əməkdaşları narazılığa sövq edir.
Maraqlıdır, teatrlarda aktyorlar aylara maaş almırlar, amma nazir müavini kabinetində “paçka-paçka” pul saxlayır... Bildiyimiz kimi, Sumqayıt Dövlət Dram Teatrının aktyorları əməkhaqlarının gecikməsindən şikayətçidirlər. Onlar iddia edirlər ki, vəziyyətin bu həddə çatmasının səbəbi teatrın rəhbərsiz qalmasıdır. Aktyorların sözlərinə görə, son 7 aya qədər maaşlarını normal şəkildə kart vasitəsilə alıblar. Ancaq 7 aydır direktor olmadığına görə əməkhaqları hər ay gecikir. Direktoru əvəz edən müavinin səlahiyyəti isə bu məsələdə məhduddur. Aktyorların sözlərinə görə, teatrda vəziyyət heç də ürəkaçan deyil. Bəzən elə olub ki, onlar bir gün ac-susuz tamaşada oynamaq məcburiyyətində qalıblar.
Teatrın aktyorları qarşılaşdıqları problemlə bağlı kütləvi şəkildə Mədəniyyət Nazirliyinə videomüraciət ünvanlayıblar.
Sumqayıt Dövlət Dram Teatrının aktyorlarının maaşları hansı səbəbdən gecikir? Mədəniyyət Nazirliyi problemin həlli üçün hansı addımlar atacaq?
Sualı əvvəlcə Mədəniyyət Nazirliyinə ünvanladıq, Lakin nazirliyin aidiyyatı şöbəsindən sualımıza cavab verilmədi.
“Hazırkı qalmaqala səbəb oktyabr maaşının bu və ya digər şəkildə gecikməsidir”
Sumqayıt Dövlət Dram Teatrının direktor müavini Əməkdar artist Vidadi Məmmədov “Bakı-Xəbər”ə açıqlamasında məsələyə aydınlıq gətirib: “Sumqayıt Dövlət Dram Teatrı hər zaman tamaşaçıların zövqünə xidmət edən, milli mənəvi dəyərləri aşılayan tamaşalar ərsəyə gətirib. Habelə, şəhər tədbirlərində truppa öndə olub. Sənət maddiyyatdan üstün tutulub. Amma son 7 ay direktor təyin olunmaması bir qisim yaradıcı heyətin narazılığına səbəb olub.
Əlli beş ildir ki fəaliyyət göstərən, ulu öndər Heydər Əliyevin xeyir duası və təşəbbüsü ilə Moskvada çıxış etmiş, beynəlxalq festivallardan layiqli prizlərlə qayıtmış və Bakı teatrlarının tanınmış simaları üçün yaradıcılıq laboratoriyası, təcrübə meydanı olmuş Sumqayıt Dövlət Dram Teatrının kateqoriyası çox aşağıdır. Bu da məvacibin az olması deməkdir. Ötən mövsümdə hörmətli nazirimiz Sumqayıta gəldi, "Xəzinə" tamaşasının məşqinə baxdı. Kollektiv bu problemi cənab nazirə çatdırdı. O da təmkinlə yaradıcı heyəti dinlədi və bu məsələnin həll olunması üçün Elnur Əliyevə göstəriş verdi. Hazırkı qalmaqala səbəb oktyabr maaşının bu və ya digər şəkildə gecıkməsidir.
Əslində rəsmən məvaciblər gecikməyib, həmişə məvaciblərimizi qabaqcadan hər ayın 20-25-i arası almışıq. Maaş nazirlik tərəfindən vaxtında hesaba yatırılıb. Sadəcə olaraq hazırda direktoru əvəz edən şəxsin bu haqda əmrinin vaxtının bitməsi səbəbindən imza səlahiyyəti yoxdur. 7 ay maaş gecikməsi məsələsi həqiqəti əks etdirmir. Kollektiv cari ayda məvacib cədvəlini imzalamaq səlahiyyətinin verilməsi ilə bağlı məsələnin həllini gözləyir”.
Qeyd edək ki, Sumqayıt Dövlət Dram Teatrının problemlərinin həlli ilə bağlı mədəniyyət nazirinin tapşırıq verdiyi birinci müavini Elnur Əliyev DTX-nın keçirdiyi əməliyyat nəticəsində saxlanılıb. Bundan əlavə, E.Əliyevin vəzifədə olduğu müddətdə öz səlahiyyətlərindən və dövlət vəsaitindən hansı şəkildə istifadə etdiyi barədə də mediada yetərincə məlumat var. Belə çıxır ki, nazirin birinci müavini teatr işçilərinin əməkhaqqı problemini həll etmək əvəzinə öz cibini doldurmaqla məşğul olmazdı. Belə olmaydı teatrların işçiləri uzun müddət məvacibsiz qalmazdı və bir qarnı ac, bir qarnı tox tamaşa oynamazdılar. Fikrimizcə, yaxın vaxtlarda bir sıra məsələlərə, o cümlədən də Sumqayıt teatrı əməkdaşlarının məvacib məsələnin həllinə diqqət yetirəcəklər...
İradə SARIYEVA
