Vətən müharibəsi başa çatan kimi çoxlarımız elə düşünürdük ki, bizi Zəfərə qovuşduran 44 günlük savaş barədə tezliklə bədii filmlər, seriallar görəcəyik. Çünki 30 il bu günün həsrətini çəkmişdik ki, bircə torpaqlarımızı geri qaytaraq. Bu baş verdi. Amma təəssüf ki, biz yerli kino şirkətlərinin bu addımlarını görə bilmədik. Bugünə qədər də Qarabağ müharibəsi ilə bağlı tammetrajlı bədii filmin yolunu gözləyirik, hələ ki, gəlib çıxmayıb. Halbuki, bu 30 il müddətində nəinki Ermənistan, eləcə də Qarabağdakı separatçılar bizim əleyhimizə kifayət qədər filmlər çəkib yayırdılar, təəssüf ki, 44 günlük müharibədən sonra da onlar xaricdəki kinoşirkətlərin və erməni lobbisinin dəstəyi ilə bu yöndə təxribatlarını davam etdirirlər...
44 günlük müharibənin sonrası Mədəniyyət Nazirliyi tərəfindən Vətən müharibəsi ilə bağlı bədii filmlərin çəkiləcəyi bəyan edildi. Xeyli müddətdən sonra açıqlandı ki, Türkiyə kino şirkətlərindən biri ilə Qarabağ mövzusunda bədii serial çəkilişlərinə başlanılır və 8 hissəli filmin birinci hissəsi 8 noyabr Zəfər günündə təqdim ediləcək. Əlbəttə, bu xəbərə yalnız sevinmək olardı ki, nəhayət, bizdə də bu sahədə tərpəniş var.
Amma yerli mediada yaylan xəbərlər bizi məyis etməyə bilmir. Azərbaycan KİV-lərində yayılan məlumatlara görə, Mədəniyyət Nazirliyinin 44 günlük Vətən müharibəsi haqqında 8 seriyalı bədii filmin çəkilməsi üçün elan etdiyi tenderi udmuş Türkiyənin “Bozdağ Film Yapım Prod. Rek. İnş. Tur. San. Tic. AŞ” şirkəti ilə əməkdaşlığı yarımçıq qalıb. Mediada iddia edilir ki, sözügedən filmin ilk seriyasının təqdimatı bu il noyabrın 8-də nəzərdə tutulsa da, Türkiyə şirkəti çəkilişləri yarımçıq dayandıraraq filmdən imtina edib...
Qarabağ serialının çəkilişləri hansı səbəbdən dayandırılıb? Şirkət bu filmi çəkməkdən niyə imtina edib? Filmin çəkilişinin dayandırılma səbəbi maliyyə çatışmazlığıdır, yoxsa hansısa digər problem ortaya çıxıb?
Bəziləri iddia edir ki, “Bozdağ Film”in serialı çəkməkdən imtina etmə səbəbi Mədəniyyət Nazirliyinin pulu vaxtında köçürməməsi ilə bağlıdır.
“Biz artıq bir həftə əvvəl şirkətlə bir yerdə filmin yayıma hazırlanması, demək olar ki, hazırlıq prosesinin başa çatması ilə bağlı xəbərləri təqdim etdik”
Yayılan iddialarla bağlı suallarımızı Mədəniyyət Nazirliyinin Media və Kommunikasiya şöbəsinin müdiri Nuridə Allahyarovaya ünvanladıq. N.Allahyarova baki-xeber.com-a açıqlamasında mətbuatda yayılan məlumatı təkzib etdi. “Ümumiyyətlə, yayılan xəbərlər həqiqəti əks etdirmir. Məhz Mədəniyyət Nazirliyi “Bozdağ Film” şirkəti ilə birlikdə bir həftə əvvəl mətbuat üçün brifinq keçirdi. Həmin brifinqdə şirkətin prodüserləri, nümayəndələri də, bizim nazirliyin aidiyyəti şöbəsinin müdiri də iştirak edirdi. Onlar bir həftə əvvəl o filmlə bağlı ayrıntıları söylədilər, necə olacaq, hansı formada təqdim ediləcək və sair. O ki, qaldı şirkətin bunu 8 noyabra elan etməsinə, rəsmi mövqe olaraq bildirim ki, Mədəniyyət Nazirliyi üçün əsas şərt filmin daha tez təhvil verilməsi deyil, əsas şərt daha keyfiyyətli bir işin təhvil verilməsidir. Çünki bu film həqiqətən də Azərbaycan üçün kifayət qədər önəmli bir filmdir. Elə adı bizim üçün mühüm əhəmiyyət kəsb edir, o ki qala bütün mahiyyətindən söhbət gedirsə. 8 seriyadan ibarət olan filmin hər seriyası tammetrajlı olacaq. Bu bədii filmdir. Bu filmdə çəkilişlər həm Azərbaycanın işğaldan azad edilən ərazilərində, həm də digər bölgələrimizdə aparılacaq. Hava şəraitinin nəzərə alınmasından tutmuş ən xırda detallara qədər işlənib hazırlanmalıdır ki, bu məsələlər vaxt ala bilər. Buna filmin hazırlıq mərhələsi deyilir. Filmin hazırlıq mərhələsi filmin çəkiliş mərhələsindən daha önəmli, daha vaxt aparan mərhələdir. Buna görə bu məsələdə də bu mərhələnin olması normaldır. Proqnoz verilə bilər. Amma bu proqnoz əsasında ümumiyyətlə filmin dayandırılmağı, təxirə salınmağı, yaxud şirkətə pulun ödənilməməsi kimi məsələlərin heç biri həqiqəti əks etdirmir. Tam əksinə, biz artıq bir həftə əvvəl şirkətlə bir yerdə filmin yayıma hazırlanması, demək olar ki, hazırlıq prosesinin başa çatması ilə bağlı xəbərləri təqdim etdik”-deyə N.Allahyarova qeyd etdi.
İradə SARIYEVA
