Mətbuatda yayılan məlumata görə, Xalq yazıçısı Anarın Azərbaycan Yazıçılar Birliyinin XIII qurulyatında yenidən Birliyin sədri seçilməsi davaya səbəb olub. İddialara görə, gənc yazarlar Anarın seçilməsinə etiraz ediblər. Onlar uzun müddət bu postu tutan Anarın yenidən sədr seçilməsinin ədalətli olmadığını deyiblər.
Mətbuatda qeyd edilənə görə, səbəb şairlər Emil Rasimoğlu və gənc Fuad Cəfərlinin AYB sədrliyinə namizədliyinin səsə qoyulmaması olub.
Sədarət onların namizədliyinin səsə qoyulmamasını qurultay iştirakçılarının Anarı dəstəkləməsi ilə izah edib. Bu isə gənclərin etirazı ilə qarşılanıb. Onlar seçkinin düzgün keçirilmədiyini və nəticələrin qanunsuz olduğunu bildiriblər.
"Davadan söhbət getmir, biz sadəcə etiraz etdik, öz narazılığımızı bildirdik"
Emil Rasimoğlu "Bakı-Xəbər"ə açıqlamasında qurultayda baş verən narazılıqlardan danışdı. E.Rasimoğlu qeyd etdi ki, qurultayda AYB sədri postuna namizədliyini irəli sürsə də, namizədliyi təsdiq edilməyib: "Mən 2019-cu ildən Azərbaycan Yazıçılar Birliyi sədrliyinə namizədliyimi irəli sürəcəyimi açıqlamışdım. Bu öz yerində. Bunu media da, ədəbi ictimaiyyət də bilir. Bir neçə gün bundan əvvəl Azərbaycan Yazıçılar Birliyinin XIII qurultayına nümayəndə seçildim. AYB - nin daxili nizamnaməsinə əsasən, qurultay iştirakçısı seçilən istənilən şəxs qurum sədrliyinə öz namizədliyini irəli sürə bilər. Mən də nizamnamənin mənə verdiyi səlahiyyətlərdən istifadə edib qurultayda namizədliyimi irəli sürdüm. Bu gün də qurultayda iştirak etdim. AYB-nin XIII qurultayında, başda Anar olmaqla, Rəşad Məcid və AYB - nin rəhbər orqanında təmsil olunan digər şəxslər namizəd kimi mənim hüquqlarımı tanımadılar, namizədliyimi səsə qoymadılar. Birmənalı olaraq bu qurultay bundan əvvəlki, yəni Anarın sədrliyinə xidmət edən qurultayların təkrarı idi".
E.Rasimoğlu qurultayda gənclərin dava salması ilə bağlı deyilənlərə aydınlıq gətirməklə yanaşı onu da vurğuladı ki, AYB sədrliyinə gələcəkdə yenə namizəd olacaq. "Davadan söhbət getmir, biz sadəcə etiraz etdik, öz narazılığımızı bildirdik. Bu qurultayda baş verənlər bizə qarşı böyük hörmətsizlik oldu. Mənim yenə də məqsədim Yazıçılar Birliyini Anardan xilas etməkdir. Mən etiraz etdim, etirazım ünvanına çatmaya bilməzdi, bu mənim vicdan haqqım idi. Biz qurultayın nəticələrinə açıq şəkildə etiraz etdik"-deyə E.Rasimoğlu qeyd etdi.
İradə SARIYEVA
