İctimai dəyərlər insanı ali mərtəbələrə qaldırır. Dövlətçiliyin xidmətində vicdanla duran hər kəs bu ucalığa qalxır. Açığı, çöhrəsində insanlıq günəşi yanan Fəxrəddin Məmmədovun ziyalı baxışlarında da fövqəl ucalıq yalnız dövlət dəyərlərindən ibarətdir. Onun elmi yaradıcılığınının ictimai predmeti də elə bu prosesi ehtiva edir.
Bəs Fəxrəddin Məmmədov kimdir? İstəkli oxucularımıza əvvəlcə onun qısa tərcümeyi-halını təqdim edək:
Məmmədov Fəxrəddin Məcid oğlu 16 oktyabr 1952-ci ildə Azərbaycanın qədim yurd yerlərindən sayılan Ağbaba mahalının Amasiya rayonunda eldə-mahalda xüsusi ləngəri və çəkisi olan böyük nüfuz sahibi Məcid Məmmədovun ailəsində dünyaya göz açıb. 1960-cı ildə Amasiya rayonunda orta məktəbə gedib, 1970-ci ildə orta məktəbi əla qiymətlərlə bitirib. 1971-ci ildə Azərbaycan Pedaqoji İnstitutunun biologiya fakültəsinə daxil olub. 1975-ci ildə institutu fərqlənmə diplomu ilə başa vurub. Həmin ildən Ümumittifaq Bitkiləri Mühafizə İnstitutunun Azərbaycan filialında elmi işçi kimi əmək fəaliyyətinə başlayıb. 1977-ci ildə ordu sıralarına çağırılıb. Xidmətini Rusiyanın Ulyanovsk şəhərində keçib. Tərxis olunduqdan sonra ikinci ali təhsilini Sankt-Peterburqdakı Kənd Təsərrüfatı Akademiyasının Arıçılıq fakültəsində alıb. Sonra Azərbaycan Kənd Təsərrüfatı Nazirliyində uzun müddət Arıçılıq şöbəsinin baş aparıcı mütəxəssisi işləyib. Azərbaycanda Arıçılığın inkişaf etməsində xüsusi xidməti olub. Onlarla elmi məqalənin müəllifidir. Birinci Qarabağ müharibəsində döyüşçü oğullarla çiyin-çiyinə səngərdə dayanıb, onlara maddi və mənəvi dəstəyini əsirgəməyib. Onun kimi tək-tək Vətən övladı tapılar ki, xalqını, dövlətini və torpağını bu qədər sevsin.
Fəxrəddin Məmmədov uzun müddət akademik Həsən Əliyevin yanında çalışıb, sözün əsl mənasında görkəmli akademikin ən sevimli işçisinə çevrilib. Dəfələrlə akademik Həsən Əliyev kollektiv arasında Fəxrəddin Məmmədov haqqında gələcəyi işıqlı fikirlər səsləndirib. Xüsusi olaraq qeyd edib ki, Fəxrəddin Məmmədov kimi alimlər kənd təsərrüfatı üçün bitkin nəzəri-praktik konsepsiyadır və gələcək nəsillər ondan çox şey öyrənəcəklər. Əlbəttə, Həsən Əliyev kimi bir akademikdən Fəxrəddin Məmmədov haqqında bu cür sözlər eşitmək çox böyük anlam kəsb edir.
Fəxrəddin Məmmədov ömrünün 70-ci pilləsində aram-aram addımlayır. Şərt onun neçə yaşında olmasında deyil, insanlara bu qədər önəm verməsində, Vətənə bu qədər bağlı olmasındadır.
Fəxrəddin Məmmədovun həyat yoldaşı Sənubər Rəsul ziyalı Məğrur Fəzinin, ölkədə yaxşı tanınan sərkərdə Məşədi Qasımın nəvəsidir. Sənubər xanım həm də qələm sahibidir, gözəl şeirlər müəllifi kimi oxucuların qəlbində özünə əbədi məskən qurub. Eyni zamanda, Fəxrəddin Məmmədovun həyat boyu əzmkar, zəhmətkeş olmasında məxsusi rol oynayıb, onun ictimai düşüncəsi Fəxrəddin Məmmədovun elmi fəaliyyətinə də müsbət təsir edib. Onlar birlikdə övladlarına yüksək və ali ailə tərbiyəsi verib, onların həqiqi vətəndaş kimi yetişmələrində pay sahibi olublar. Sənubər Rəsulun imzası bu gün Azərbaycanda yaxşı tanınır. O, daim öz ailəsinə yaxşı ana, istedadlı jurnalist, gözəl şair və ən əsası, təşkilatçı, son dərəcə səxavətli qadın kimi bağlı olub, cəmiyyət bu elitar mədəniyyətdən faydalanıb. Sənubər xanım həm də onu tanıyanların dərin rəğbətinə, böyük ehtiramına layiqdir. Buna görə bu gün cəmiyyət həm onu, həm də Fəxrəddin Məmmədovu alqış yağışına tutur.
İnsan var, hava kimi, su kimidi, kimidi, biz onu daim axtarırıq. İnsan var, həb kimi, dərman kimidi, biz onu hərdən axtarırıq. İnsan var, xəstəlik kimidi, biz onu axtarmırıq. Fəxrəddin Məmmədov bizə hava kimi, su kimi, qida kimi lazım olan insandır. Onu daim axtarırıq və həmişə də ona ehtiyacımız olacaq. Çünki ömründən ötən 70 ili demək olar ki, o, özü və ailəsindən daha çox başqaları üçün yaşayıb, ömrünü hissə-hissə Vətən övladları arasında bölüşdürüb, yaxşı əməllərini ona ehtiyacı olanlar üçün xərcləyib.
Fəxrəddin Məmmədovun övladları da cəmiyyətin ən yaxşı insanları sırasındadır. Türanə, Şəlalə, Tural və Kənan bir elitar ailənin yüksək mədəniyyət görmüş alicənab ardıcıllarıdır. Onların əxlaqından doğan tərbiyə yetişən nəsillərə nümunədir. Bu da bütövlükdə bir Vətənə ola bilmək anlamındadır.
Fəxrəddin Məmmədov türkçülüyü özünün əsas atributu hesab edir, bundan qürur duyur. Haradan bir türk səsi gəlsə dərhal dönüb həmin yerə salavat çəkir.
Fəxrəddin Məmmədovun yaşadığı mənzildə Azərbaycan bayrağı Türk bayrağı ilə birlikdə dalğalanır. Bayraqlar arasında isə min illərin sənət yaddaşı olan qədim musiqi alətimiz saz asılıb. O, bu dəyərlərə ali baxır. Onun üçün «mənim», «sənin» fikri yoxdur, «bizim» ifadəsi var. Bu da bir ziyalı, bir şəxsiyyət fövqünün ehtişamıdır.
Tanıyanlar yaxşı bilir, biz də mübaliğəsiz deyirik ki, Fəxrəddin Məmmədov işıqlı şəxsiyyət, nüfuzlu insandır; təəccübverici xassələrə malikdir, bir vaxtlar çalışdığı kollektivin, onu tanıyanların qəlbində özünə insanlıq məbədi qurmağı bacarıb. O, heç vaxt gözlərini məchul bir nöqtəyə zilləyib durmayıb, həmişə öz sanballı elmi və insançı axtarışları ilə hər kəsə xoş ovqat yaşadıb.
Bu gün Fəxrəddin müəllim həm də Vətən eşqində təcəlla etdiyi üçün könül aləmini Vətən sevdaları ilə rəngləyib. Bu duyğusal hal onu uzaqdan görünən başı qarlı dağlar qədər uca və məğrur edir...
Fəxrəddin Məmmədov zəhmət adamıdır, zəhmətkeş insanlara xüsusi dəyər verir. Söhbət düşəndə o, deyir ki, bir insanın formalaşmasına xeyli vaxt sərf olunur, o adamı itirmək isə tək bir ailənin faciəsi deyil, bütün cəmiyyət üçün itkidir. Belə bir qayğı, belə bir fikir yalnız halal nəsildən çıxmış, halallığı özünün ən ümdə vəzifəsi edən şəxsdə formalaşa bilər.
Fəxrəddin müəllimin dövlətə, dövlət başçısına, bayrağa, torpağa və xalqa məhəbbəti könül verdiyi işində də həmişə bariz şəkildə olub. Sanki o, çalışdığı işlə nəfəs alıb, özünü burada geniş əhatədə görüb. Çoxlarına müəssər olmayan bu vacib nüans onun üçün indi də bir həyat eşqidir.
Biz (əslində) işıqlı alim-insan Fəxrəddin Məmmədovun Obrazı haqda çox şey deyə bilərik. Qısaca, demək istəyirik ki, o, aydın hücrədir, onun geniş təqdimata zərrə ehtiyacı yoxdur. Biz sadəcə, ruhsal yöndən onu xarakterizə edirik; vücudumuzda oyanan ləngərli çırpıntılar bizi kövrək xatirələrinə sığal çəkən bu qətiyyət sahibinin vətəndaş əzmi ilə qarşılaşdırır...
Fəxrəddin Məmmədovu 70 illik yubileyi münasibətilə ürəkdən təbrik edir, onu tanıyanlar və sevənlər adından möhkəm can sağlığı, yeni elmi uğurlar və yüksək ali məqam arzulayırıq. O məqam ki, orada həmişə Tanrı sevgisi bərqərardır.
Necə də gözəl deyilib: “70 yaş ömrün astanasıdır…” 70 yaşınız bird aha mübarək, Fəxrəddin Məmmədov!!!
Azər Rəsul, Prof./ng.Dr.Sc Elm və Texnika üzrə laureat, Çexiya-Azərbaycan Elmə və Mədəniyyət Mərkəzinin sədri, Beynəlxalq Diaspor Mərkəzinin (BDM) Avropa təmsilçisi
