Azərbaycan Yazıçılar Birliyinin üzvü, yazıçı, Birinci Qarabağ müharibəsi veteranı Qəni Camalzadənin imzası çoxdandır oxuculara yaxşı tanışdır. Hazırda on iki kitab müəllifi olan yazıçının ilk əsəri 1976-cı ildə, tələbəlik dövründə “Ədəbiyyat və İncəsənət” qəzetində çap olunmuşdu. İllərin qanadında yumorlu və satirik hekayələri “Kirpi”, “Azərbaycan”, “Ulduz” jurnallarına yol açır. Beləcə 1995-ci ildə “Yaxşı oğlanın dayısı” kitabı işıq üzü görəndən sonra gənc yazıçının imzası Azərbaycan ədəbiyyatında təsdiqini tapır. 1998-ci ildə “Sonuncu yeznə” kitabı ilə oxucuların görüşünə gəlir...
Sözü özünə həmdəm seçən, ona böyük sevgi göstərən Qəni Camalzadə əsasən roman janrına üstünlük verir. Üç roman yazıb, hər üçü “Azərbaycan” jurnalında dərc edilib. Rus, ingilis dilinə tərcümə olunan əsərləri də çoxdur. Axırıncı beş ildə yazıçı daha da qabağa gedərək kitablarını Amerika Birləşmiş Ştatlarında çap etmişdir. Bu da onun Azərbaycan ədəbiyyatının, milli mənəvi dəyərlərin xarici ölkələrdə təbliğinə gözəl töhfəsi sayıla bilər.
Yeri gəlmişkən onu da bildirim ki, Qəni Camalzadə 1956-ci ildə dağlar diyarı Lerikdə dünyaya göz açmış, kiçik yaşlardan ailəsi Bakı şəhərinə köçübdür. Doğma diyarı Lerikdə yazıçı ilə rayon ictimaiyyətinin və ziyalıların görüşü keçirildi. Mədəniyyət Mərkəzində olan görüş Lerik Rayon İcra Hakimiyyətinin təşkilatçılığı sayəsində baş tutdu.
Tədbirə qatılanlar əvvəlcə Lerik şəhərindəki “Şəhidlər” abidə kompleksini və ulu öndər Heydər Əliyevin abidəsini ziyarət edərək önünə gül dəstələri qoydular. Sonra mədəniyyət mərkəzinin foyesində yazıçının yaradıcılığını özündə yaşadan kitablardan, qəzet və jurnal materiallardan ibarət sərgiyə baxış oldu.
Tədbirdə giriş nitqi söyləyən aparıcı, Azərbaycan Yazıçılar Birliyinin üzvü Ağacəfər Həsənli yazıçı Qəni Camalzadənin həyat və yaradıcılığı haqqında söhbət açdı, əsərləri barədə geniş məlumat verdi. Söz Lerik Rayon İcra Hakimiyyətinin başçısı Əkbər Abbasova çatanda o, qonaqları və tədbir iştirakçılarını salamladı, yazıçı Qəni Camalzadəni əlamətdar gün münasibətilə təbrik edib gələcək yaradıcılıq işlərində ona uğurlar arzuladı, eləcə xatirə hədiyyəsi təqdim etdi.
“Gözəl söz sahibi, kifayət qədər ədəbi təcrübəsi, zəngin yaradıcılığa malik olan yazıçı Qəni Camalzadə öz oxucuların ürəyində yaxşı yer edibdir. O, xarici ölkələrdə də ədəbiyyatımıza hörmət qazandırır” - deyən Əməkdar jurnalist İdris Şükürlü yazıçının əsərlərinin geniş təhlilini verdi. Natiq onu da bildirdi ki, dəyərli qələm əhli öz əsərlərində real həyat həqiqətlərini özünəməxsus ustalıqla göstərir, eləcə Qarabağ mövzusunda yazdığı əsərlərinin gənclərin vətənpərvər tərbiyəsində rolu böyük əhəmiyyət daşıyır.
Digər çıxışçılar - Azərbaycan Yazıçılar Birliyinin üzvü, yazıçı-kulturoloq Aydın Xan Əbilov, tarixçi Hüseynbala Əliyev, şair Qəhrəman Əliyev, Azərbaycan Yazıçılar Birliyinin üzvü Hacı Mirzəxan Abbasov Qəni Camalzadənin yaradıcılığına oxucuların böyük məhəbbət göstərdiyini dilə gətirdilər, ona yaradıcılığında yeni uğurlar dilədilər.
Yazıçı Qəni Camalzadə isə öz çıxışında doğulub boya-başa çatdığı dağlar diyarında oxucularla keçirilən görüşə, haqqında deyilən xoş sözlərə və göstərilən diqqətə görə rayon rəhbərliyinə, eləcə həmkarların onun ünvanına dediyi səmimi fikirlərə, yaradıcılığına verilən yüksək qiymətə görə dərin minnətdarlığını bildirdi.
Tədbirin təşkilatçıları tərəfindən “Gənc Azərbaycan əsgəri”, “Fəxri diplom” nominasiyası üzrə tədbirdə qonaq qismində iştirak edən şəhid ailələrinə, eləcə rayon fəallarına diplomlar verildi. Əməkdar jurnalist İdris Şükürlü də diplom alanların arasında idi.
Zəfər ORUCOĞLU Azərbaycan Jurnalistlər Birliyinin üzvü
