Xəbər verdiyimiz kimi, 29-31 iyul tarixlərində Gəncə şəhərinin Hacıkənd qəsəbəsindəki Xan yaylağında II Milli Yaylaq Festivalı keçirildi.
Festival “Cavad Xan” Tarix və Mədəniyyət Fondu və “Kap.az” – Fərqli Turizm MMC-nin təşəbbüsü, Mədəniyyət Nazirliyi, TİKA – Türk Əməkdaşlıq və Koordinasiya Agentliyi, Gənclər və İdman Nazirliyi, Dünya Etnoidman Konfederasiyası, Dövlət Turizm Agentliyi, Dövlət Məşğulluq Agentliyi, KOBİA, Kənd Təsərrüfatı Nazirliyi, Gəncə Şəhər İcra Hakimiyyəti, Göygöl Rayon İcra Hakimiyyəti və digər qurumların tərəfdaşlığı və dəstəyi ilə gerçəkləşdi. Festivalın ilk günündə xarici ölkələrdən dəvət olunmuş musiqiçilər və yerli kollektivlər çıxış etdilər.
Artıq festival bitib, ancaq bu tədbirlə bağlı yaranan söz-söhbət hələ də davam edir. Qeyd edək ki, festivalı işıqlandırmaq üçün Göygöl rayonuna səfər edən 40-dan çox jurnalist yağış səbəbindən Hacıkənddə köməksiz vəziyyətdə qalıb. Belə ki, yağış suyu torpaq yolu keçilməz etdiyindən, jurnalistlərin olduğu avtobusla yanaşı, festivaldan çıxan qonaqların əksəriyyəti çətin durumla üzləşib. Kilometrlərlə tıxac yaranıb, yolda hərəkət tamamilə dayanıb.
Festivalla bağlı millət vəkilləri də narazılıq edir. Milli Məclisin Mədəniyyət Komitəsi Yaylaq Festivalına dəvət olunmayıb. Millət vəkilləri Fazil Mustafa və Aqil Abbas Milli Məclisin Mədəniyyət Komitəsinin Yaylaq Festivalına dəvət olunmadığını bildiriblər. Qeyd ediblər ki, Mədəniyyət Nazirliyi tərəfindən onlara heç bir dəvət gəlməyib.
Maraqlıdır, nazirlik Mədəniyyət Komitəsindən niyə heç kimi Yaylaq Festivalına dəvət etməyib? Nazirliklə Mədəniyyət Komitəsi arasında nə baş verir?
Mədəniyyət Nazirliyi: “Qonaqların əsas siyahısını "Cavad Xan" Tarix və Mədəniyyət Fondu tərtib edib”
Məsələ ilə bağlı Mədəniyyət Nazirliyindən “Bakı-Xəbər”ə bildirildi ki, qonaqların əsas siyahısını onlar tərtib etməyiblər: “Əsas siyahını "Cavad Xan" Tarix və Mədəniyyət Fondu tərtib edib. Dəvətlər onların siyahısı əsasında göndərilib”.
“Cavadxan” Tarix və Mədəniyyət Fondu - Müzadil Həsənov: “Bizdən yalnız xarici qonaqlara, tərəfdaş qurumların rəhbərlərinə dəvətnamə göndərilib, burada özəl dəvətnamə yoxdur”
“Cavad Xan” Tarix və Mədəniyyət Fondunun vitse-prezidenti, II Milli Yaylaq Festivalının layihə rəhbəri Müzadil Həsənov qəzetimizə açıqlamasında qeyd etdi ki, Fonddan yalnız xarici qonaqlara, tərəfdaş qurumların rəhbərlərinə dəvətnamə göndərilib: “ Burada özəl dəvətnamə yoxdur. Festival "Elimiz-obamız dəvətlidir" şüarı ilə keçirilib. Yəni heç bir ödəniş etmədən, dəvətnanə almadan, qeydiyyatdan keçmədən hər kəs qatıla bilərdi. Üç gün ərzində axın-axın insanlar gəlirdi. Dəqiq sayını bilməsək də, üç günə 100 mindən çox insan festivala qatılıb. Millət vəkillərinin nə səbəbdən iştirak etməməsinə gəlincə deyim ki, giriş sərbəst idi. Kim istəyirdisə gəlib iştirak edərdi. Əvvəlcədən elan edilmişdi ki, ölkəmizdə Yaylaq Festivalı keçiriləcək. Bu festivalın mahiyyətini başa düşən şəxslər, qurumlar gəlib iştirak etdi. Yenə qeyd edirəm, biz yalnız xarici qonaqlara dəvət göndərmişdik. Milli Məclisin Mədəniyyət Komitəsinin üzvlərini festivalda görmək istəyirdik, düşünürdük ki, millət vəkilləri də ölkə üçün əhəmiyyətli olan tədbirdə iştirak edər”.
Aydinxan Əbilov: “Milli Məclisin Mədəniyyət Komitəsinin üzvlərinin Yaylaq festivalına dəvət olunmaması düzgün deyil”
Kulturoloq Aydınxan Əbilov qeyd etdi ki, bir neçə gün əvvəl keçirilən Yaylaq Festivalı xoş təəssüratlarla yaddaşlarda qalmadı: “Yaxşı ki, millət vəkilləri həmin festivala getmədi. Məlumdur ki, festivalı işıqlandırmaq üçün ora gedən media təmsilçilərinə xoş münasibət göstərilmədi, onları demək olar ki, sayan olmadı. Millət vəkilləri də festivala getsəydi onlara da eyni münasibət göstəriləcəkdi. Onu da qeyd edim ki, millət vəkillərimizin əksəriyyəti şəhərdə böyüyüb, onlar yaylaq, dağlarda baş verə biləcək istənilən təbiət hadisələrinə hazır deyillər”.
Həmsöhbətimiz onu da əlavə etdi ki, həmin tədbirdə xarici ölkələrin təmsilçiləri iştirak edib, ancaq Azərbaycanın millət vəkilləri dəvət olunmayıb. Milli Məclisin Mədəniyyət Komitəsinin üzvlərinin festivala dəvət olunmaması düzgün deyil. Bunun da günahı təşkilatçılardadır”.
Günel CƏLİLOVA
