Bir sıra hallarda teatrların daxilində baş verən yaradıcılıq prosesindən ictimaiyyətin xəbəri olmur. Soruşa bilərsiz ki, ictimaiyyət teatrların mətbəxindən niyə xəbərdar olmalıdır? Xəbərdar olmalıdır. İctimaiyyət niyə bilməsin ki, hansı teatrda hansı dramaturqun əsəri tamaşaya qoyulacaq, dramaturji materiallar necə seçilir, elə əsər olurmu ki, seçilmir?
Bir vaxtlar teatrlarda Bədii Şuralar fəaliyyət göstərirdi, tamaşalarla bağlı maraqlı rəylər bildirirdilər. Heç bir tamaşa Bədii Şuradan keçməsəydi səhnəyə vəsiqə ala bilməzdi. Amma sonradan bu ənənə sıradan çıxdı və bu sahədə hərc-mərclik, xaos hökm sürməyə başladı. Bu o zaman idi ki, teatrlarda Bədii Şuralar formal olaraq mövcud idi. Bu gün teatrların hamısının rəhbərliyi deyir ki, teatrda Bədii Şura var, fəaliyyət göstərir. Amma teatrlar Bədii Şuranın üzvlərinin adları açıqlanmırlar ki, ictimaiyyət orada təmsil olunanların dramaturgiyadan, rejissorluqdan başının çıxıb-çıxmadığını bilsin. Bu fikri ona görə qeyd edirik ki, çox zaman kənardakı şəxslərdə yaranan rəyə görə teatrların Bədii Şuralarında peşəkarlar yox, qeyri-peşəkarlar təmsil olunurlar. Hətta bəzən iddia edilir ki, teatrların Bədii Şuralarının üzvləri xüsusi tapşırıqla seçilir. Belə deyənlər də var ki, teatr ictimaiyyətində narazılıq olmasın deyə şura üzvlərinin adları açıqlanmır. Bu fikirlər də səsləndirilir ki, Şura üzvlərinin adlarının açıqlanmaması səbəbi teatra əsər təqdim edənlərə görədir. Bəziləri Şura üzvlərinə yol tapıb xahiş-minnət edirlər ki, onun əsərinin şuradan keçməsinə kömək etsinlər. Bütün bunlar iddiadır. Görək teatrlar özləri nə deyir? Teatrlarımızın Bədii Şuralarında kimlər təmsil olunur?
Cavid Zeynallı: “Teatrın Bədii Şurasında təmsil olunan şəxslər öz sahəsinin görkəmli şəxsləridir”
Akademik Milli Dram Teatrının mətbuat xidmətinin rəhbəri Cavid Zeynallı “Bakı-Xəbər”ə bildirdi ki, teatrın Bədii Şurasının tərkibində ölkənin görkəmli şəxsləri təmsil olunur: “Akademik Milli Dram Teatrının Bədii Şurasında təmsil olunan şəxslər öz sahəsinin görkəmli şəxsləridir. Bədii Şuranın sədri Azərbaycan Teatr Xadimləri İttifaqının sədri, Akademik Milli Dram Teatrının Bədii rəhbər-direktoru, Xalq artisti, professor Azər Paşa Nemətovdur. Məsul katibi teatrın ədəbi hissə müdiri, dramaturq Çingiz Ələsgərlidir. Üzvləri isə professor Məryəm Əlizadə, Xalq artisti Siyavuş Kərimi, Xalq artistləri Bəsti Cəfərova və Ramiz Novruz, Akademik Milli Dram Teatrının baş rəssamı, Xalq rəssamı Nazim Bəykişiyevdir”.
GTT: “Əlbəttə, bizim teatrda da Bədii Şura var”
Gənc Tamaşaçılar Teatrından (GTT) isə bildirdilər ki, bu teatrın da Bədii Şurası və Şura üzvləri var, amma hazırda teatrda əsaslı təmir-bərpa işləri getdiyindən şura tam fəaliyyət göstərmir: “Əlbəttə, bizim teatrda da Bədii Şura var. Yəqin xəbəriniz var, teatrımızda təmir gedir. Təmirdən sonra hər şey yenilənəcək, ona görə də hələ ki, sizə dəqiq məlumat verə bilmirəm. Bədii Şuranın tərkibi hər il yenilənir”.
Teatrdan o da bildirildi ki, bina təmirdə olduğu üçün hazırda bütün tamaşalar Teatr Xadimləri İttifaqının binasında oynanılır.
Leyla QARAXANLI
