Filarmoniyanın bağında gecə barı - uyğundurmu?

img

Məlum olduğu kimi, sosial şəbəkələrdə və yerli mediada Müslüm Maqomayev adına Azərbaycan Dövlət Akademik Filarmoniyasında gecə klubunun fəaliyyət göstərməsi barədə məlumat yayılıb. Yayılan görüntülər əsasında mədəniyyət ocağında gecə klubu təşkil olunması və gənclərin əyləncə məclisi təşkil etməsi iddia olunub. Masa üzərinə çıxıb rəqs edən gənclər, su yerinə axan spirtli içkilər, fişənglər- bütün bu görüntülərin Filarmoniyada baş verməsi təəccüb doğurub.

Ölkənin nüfuzlu mədəniyyət ocağının musiqi, sənət məkanı kimi deyil, gecə klubu, bar kimi görüntülənib təqdim edilməsi həqiqətən də utanvericidir. Filormoniyanı tikib yaradanlar, onu Azərbaycan akademik musiqisinin əsas ünvanlarından birinə çevirilənlər nə biləydilər ki, sabah birisi çıxıb Filarmoniyanı, onun məşhur bağını bu şəkildə təqdim edəcək. Yeri gəlmişkən,  Müslüm Maqomayev adına Azərbaycan Dövlət Akademik Filarmoniyasının təmsilçilərinin görüntülərə münasibəti qeyri-adekvat olub.

Məsələn, Filarmoniyadan Lent.az-a verilən məlumata görə,  görüntülər Filarmoniyada yox, Filarmoniyanın həyətində yerləşən restoranda qeydə alınıb. Restoranın Filarmoniyanın balansında olub-olmaması barədə mətbuat orqanının sualına isə “Bizim bundan xəbərimiz yoxdur”- cavabı verilib. Bu qədər səs-küy, həngamə baş verib, amma bu səsi Filarmoniyanın işçiləri eşitməyib.

Filormoniyanın həyətində restoran açılıb, amma ondan qurumun xəbəri yoixdur.

Filarmoniyanın həyətində niyə restoran olmalıdır ki? Musiqi ocağının həyətini restorana icarəyə Mədəniyyət Nazirliyi verib, yoxsa Filarmoniya rəhbərliyi? Mədəniyyət ocağı niyə bu vəziyyətə salınır? Filarmoniyanın ərazisini icarəyə götürən restorana qarşı hansı tədbirlər görüləcək? Onlar oradan çıxarılacaqmı?

Məsələ ilə bağlı Mədəniyyət Nazirliyi ilə əlaqə saxladıq.

  • Mədəniyyət Nazirliyi: “Restoran rəsmi şərtlərə əməl etmədən özbaşına fəaliyyətə başlayıb və bu cür xoşagəlməz görüntülər meydana çıxıb”

Mədəniyyət Nazirliyindən qəzetimizə göndərilən açıqlamada bildirilir: “Müslüm Maqomayev adına Azərbaycan Dövlət Akademik Filarmoniyasının ərazisində “UFFO” restoranının rəhbərliyi ilə cari ilin iyun ayından rəsmi müqavilə bağlanması üçün hazırlıq işlərinə başlanılıb. Lakin restoran rəsmi şərtlərə əməl etmədən özbaşına fəaliyyətə başlayıb və bu cür xoşagəlməz görüntülər meydana çıxıb.

Mədəniyyət Nazirliyi sözügedən hadisədən təəsüfləndiyini bildirir və məsələnin həlli məqsədilə filarmoniya rəhbərliyinə aidiyyəti tapşırıqlar verib.

Bu məsələdə məsuliyyətsizlik göstərmiş şəxslər və müqavilə şərtlərinə əməl etmədən fəaliyyətə başlayan restoran rəhbərliyi barəsində tədbir görüləcək”.

Nazirlik deyir tədbir görüləcək. Niyə vaxtında o bağ restorana icarəyə verilirdi ki, bu gün nazirlik çıxılmaz vəziyyətə düşüb?

Ekspertlərin sözlərinə görə, əvvəla, heç bir restoran, bar, gecə klubu özbaşına gəlib orada fəaliyyət göstərə bilməz. O restoranın Filarmoniyanın həyətində, bağında fəaliyyət göstərməsinin arasında böyük maraqlar dayanır. Ekspertlərin fikrincə, o gecə klubundan, restorandan Filarmoniyanın rəhbərliyinin birmənalı olaraq xəbəri olub.

  • Mübariz Göyüşlü: “Əgər doğrudan da Filarmoniyanın bağında gecə barı açılıbsa və orada qəbuledilməz hallar baş verirsə, bu yolverilməzdir”

“Müasir İnkişaf” Birliyinin sədri Nübariz Göyüşlü bizimlə söhbətində bildirdi ki, bütün hallarda  Müslüm Maqomayev adına Azərbaycan Dövlət Akademik Filarmoniyasının adının belə məsələdə hallandırılması mənfi haldır. O qeyd etdi ki, hadisənin detalları haqda ətraflı məlumatlı deyil. “Bilmirəm ki, mədəniyyət ocağının həyətində, bağında restoran hansı situasiyada açılıb. O restoranın orada açılması qanunsuzdursa Mədəniyyət Nazirliyi, Bakı Şəhər İcra Hakimiyyəti və başqa aidiyyatı qurumlar bununla bağlı ölçü götürməlidirlər. Yox, əgər restoran o gələn qonaqlara, mədəniyyət adamlarına xidmət göstərirsə, bu qanunla da tənzimlənirsə burada qeyri-adi bir məsələ görmürəm. Hətta orada restoran qanunla fəaliyyət göstərsə belə, orada o şəkildə məclis qurmaq, masa üzərinə çıxıb xoşaglməz rəqs etmək yolverilməzdir. Orada qəbul edilməsi mümkün olmayan halların baş verməsinə mənfi yanaşıram. Bu xoşagəlməz əyləncəni kimlər təşkil edibsə onlarla bağlı ciddi tənbeh tədbirləri görülməlidir.Fərqi yoxdur, resrtoran sahibi, qonaqlar, yoxsa filormoniya təşkil edib, tədbir görülməlidir. Bu tədbirlərin görülməsi yaxşı olardı ki, vulqarcasına “istirahət” formasını təşkil edənlər cəzalandırılmalıdır. Nazirliyin ba. Verənlərlə bağlı tədbiri gözləməyi məqsədəuyğun sayıram. Düşünürəm ki, Mədəniyyət Nazirliyi və başqa əlaqədar təşkilatlar bu xoşagəlməzliklə bağlı araşdırma aparacaqlar. Əgər çox ciddi narajatçılıq doğuran məqamlar varsa, lazımı tədbirlər görülməlidir. Gecə barı və Filarmoniya bir-birinə qətiyyən uyğun gəlmir. Əgər doğurudan da, filarmoniyanın bağında gecə barı açılıbsa və orada qəbul edilməsi hallar baş verirsə, bu yolverilməzdir. Hər şey nazirliyin araşdırması zamanı məlum olacaq”- deyə M.Göyüşlü vurğuladı.

İradə SARIYEVA

Peşə etikası

Son xəbərlər