Son günlər mətbuatda xalq artisti Rasim Balayevin Azərbaycan Kinematoqrafçılar İttifaqına (AKİ) sədr seçildiyinə dair məlumatlar yayılıb. İddialara görə, İttifaqın qurultayı keçirmədən xalq artisti İdarə Heyətinin üzvləri tərəfindən AKİ sədri keçilib.
Onu da bildirək ki, AKİ-yə uzun illər rəhbərlik edən Rüstəm İbrahimbəyov vəfat etdikdən sonra təşkilata kimin sədr olacağı müzakirə mövzusu olub. Son həftələr isə görkəmli sənətkar, xalq artisti Rasim Balayevin AKİ sədri olacağı deyilirdi. Daha doğrusu, qurum təmsilçilərinin onun sədr olmasında israrlı olduqları bildirilir.
Rasim Balayev həqiqətəmi AKİ sədri seçilib?
“İdarə Heyətinin iclasında Rasim Balayevin sədrliyə namizdəliyini irəli sürdük və təsdiqlədik”
Azərbaycan Kinematoqrafçılar İttifaqının katibi, Əməkdar İncəsənət Xadimi Baba Vəziroğlu “Bakı-Xəbər”ə açıqlamasında R.Balayevin AKİ sədri seçilməsi xəbərini təkzib edərək bildirdi ki, mətbuatda yazılanlar həqiqəti əks etdirmir. O vurğuladı ki, mayın 11-də AKİ-nin İdarə Heyətinin ümumi iclası keçirilib və burada Rasim Balayev sədr postuna namizəd kimi təqdim edilib və iclas iştirakçıları Rasim Balayevin namizədliyini yekdilliklə təsdiqləyiblər.
B.Vəziroğlunun sözlərinə görə, iclasda gündəlikdə duran bir sıra məsələlər, o cümlədən ittifaqın sədrliyinə namizədlik məsələsi müzakirə olunub.
B.Vəziroğlunun sözlərinə görə, may ayının son ongünlüyü içində AKİ-yə sədr seçkisi ilə bağlı konfrans keçiriləcək və o əmindir ki, təşkilat üzvləri R.Balayevi yekdilliklə İttifaq sədri seçəcəklər.
“Rasim Balayev sədr seçilməyib. Onun sədr seçiləməsi barədə xəbərlər həqiqətə uyğun deyil. Bu xəbəri yayanlar bilmirlər İdarə heyəti nədir, seçki nədir? Qurultaysız, konfranssız sədr seçmək olmaz. Qurultay və konfrans eyni səlahiyyətdədir. Qurultaysız, konfranssız necə seçki keçirmək olar?
Bir həftə əvvəl Anar müəllimin ağsaqqallığı ilə İdarə Heyəti yığışdı. Anar müəllim həm də bizim katibdir. Biz hamımız qərara gəldik ki, ən layiqli namizəd kimi yekdilliklə Rasim müəllimin namizədliyini konfransa təqdim edək. İdarə Heyətinin iclasında Rasim Balayevin sədrliyə namizdəliyini irəli sürdük və təsdiqlədik. Mənə verilən məlumata görə, İttifaqın konfransı da mayın 31-də olacaq. Hesab edirəm, bu da bir aksiomadır ki, konfrans iştirakçıları hamısı Rasim Balayevə səs verəcək. Çünki doğrudan da, Rasim Balayevin alternativi yoxdur”.
B.Vəziroğlunun sözlərinə görə, kiçik istisnaları nəzərə almasaq, ölkənin bütün kino ictimaiyyəti AKİ-nin başına cəmləşib. O vurğuladı ki, AKİ C.Cabbarlı tərəfindən əsası qoyulan legitim bir təşkilatdır və bu qurum bu gün də kino ictimaiyyətini əhatə edir: “Azərbaycan Kinematoqrafçılar İttifaqı köklü bir qurumdur, əsası Cəfər Cabbarlı tərəfindən qoyulub. Bütün kino ictimaiyyəti, gənclər, nüfuzlu kino xadimləri hamısı bizim qurumda təmsil olunur, kinomatoqrafın bütün nüvəsi, qaymağı burdadır, gənclər də bizim qurumdadır”.
Seçkidən sonra bir sıra layihələrin həyata keçiriləcəyini deyən B.Vəziroğlu həmçinin gənclərlə də bağlı layihələr olacağını qeyd etdi. O bildirdi ki, qarşıda çox işlər görəcəklər, hətta artıq iş planlarını da təsdiqləyiblər: “İlk növbədə əsas işimiz Rüstəm İbrahimbəyovun xatirəsini əbədiləşdirməkdir. Burada təkcə onun adını əbədiləşdirməkdən yox, onun arzularını gerçəkləşdirməkdən söhbət gedir. Plan hazırlamışıq. Yeni Kino Mərkəzinin, Kino Muzeyinin yaradılması Rüstəm müəllimin arzusu idi. Bunların əsası qoyulub, sadəcə yarımçıq qaldı, biz onları gerçəkləşdirəcəyik”- deyə B.Vəziroğlu qeyd etdi.
Qeyd edək ki, Azərbaycan Kinematoqrafçılar İttifaqı 11 yanvar 1963- cü ildə Respublika Kinematoqrafiya İşçilərinin I Təsisat Qurultayında yaradılıb. Azərbaycan Kinematoqrafçılar İttifaqı Azərbaycanın peşəkar yaradıcı kino işçilərini könüllü əsaslarla birləşdirən ictimai təşkilatdır. İttifaqın əsas məqsədi milli kinonun, milli mədəniyyətin və dünya kinosunun əsas hissəsi olaraq inkişaf etdirilməsidir.
İradə SARIYEVA
