Mayın 14-də İstanbulda öz işinə başlayan Türk Dövlətləri Təşkilatının (TDT) media və informasiya üzrə məsul nazirlərinin və yüksək vəzifəli rəsmilərinin 4-cü toplantısında olduqca maraqlı müzakirələr həyata keçirilib.
Türkiyə Prezidenti Administrasiyasının Kommunikasiya İdarəsinin ev sahibliyi ilə baş tutan tədbirdə ölkəmiz Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin rəhbərlik etdiyi nümayəndə heyəti ilə təmsil olunub. TDT-yə üzv dövlətlər - Türkiyə, Azərbaycan, Qazaxıstan, Qırğızıstan, Özbəkistan, həmçinin müşahidəçi üzv Macarıstan və Türkmənistanın dövlət rəsmilərinin bir araya gəldiyi toplantının əsas məqsədi türkdilli dövlətlərin media və kommunikasiya sahəsində əməkdaşlığı möhkəmləndirməkdir.
Proqram çərçivəsində “Türk dünyasında dövlət diplomatiyasının yüksələn gücü: serial-film sektoru məsələsi də ətraflı şəkildə müzakirə olunub.
Xatırladaq ki, son illər Türkiyə kinematoqrafları ilə Azərbaycan kinematoqraflarının müştərək filmlər, seriallar istehsal etməsi məsələsi gündəmdədir. Xüsusən də Qarabağ müharibəsinin kino sənətində öz əksini tapması üçün bu cür filmlərin çəkilməsinə ciddi zərurət var.
İstanbul platformasında film-serial məsələsinin ayrıca bir paneldə müzakirə olunması çox müsbət haldır.
Bu çərçivədə 44 günlük Vətən müharibəsi ilə bağlı Azərbaycan və Türkiyə kinematoqraflarının birgə işi mümkün olacaqmı? Bu mövzuda müştərək film və serialların istehsalı mümkündürmü?
Dəyanət Osmanlı: “Azərbaycan və Türkiyənin 44 günlük Vətən müharibəsi ilə bağlı birgə filmlər, seriallar yaratmasının tam zamanıdır”
“Türk Dünyası İnfo” İctimai Birliyinin sədri Dəyanət Osmanlı “Bakı-Xəbər”ə bildirdi ki, 44 günlük müharibəsi ilə bağlı Türkiyə və Azərbaycan kinematoqrafının birgə film və seriallar çəkməsi bizə hava-su kimi lazımdır. İstanbul platformasının bu məsələyə ciddi təkan verəcəyini qeyd edən D.Osmanlının sözlərinə görə, artıq ortada siyasi iradə də var. O hesab edir ki, İstanbul platforması yalnız Türkiyə və Azərbaycan arasında deyil, digər türk ölkələrinin də bu sahəyə ciddi qatqısını təmin edir. D.Osmanlının sözlərinə görə, biz 44 günlük Vətən müharibəsində qazandığımız şanlıq qələbəni kinoya, seriala gətirmək üçün mütləq mənada qanı bir, canı bir qardaşlarımızla birgə işləməliyik. “Azərbaycan və Türkiyənin bütün platformalarda əməkdaşlığını zəruri hesab edirəm. Bu əməkdaşlıq sıradan hansısa ölkələrin deyil, iki qardaş dövlətin, xalqın real və mühüm ehtiyaclarının tələbidir. Bizim doğma münasibətlərin bütün sahələrdə rəsmi status alması ümumi inkişafımıza və əlbəttə, gələcəyə hesablanmış amildir. Türkiyə dünyada böyük nüfuz, söz sahibidir. Azərbaycan da Cənubi Qafqazda aparıcı dövlət olduğunu artıq sübut edib. Ona görə, ölkələrimizin güclənməsi bir-birinin gücünə güc qatması deməkdir. Bu, həm də digər türk xalqları üçün yaxşı nümunədir.
44 günlük müharibə xalqlarımızın münasibətlərində örnəkdir. Bu amildən çıxış edərək, mədəniyyət, o cümlədən media, ədəbiyyat, kino sektorunda da əməkdaşlığa üstünlük verilməlidir. Sənət həm də tarixdir. Yəni həm həqiqətlərin dünyaya çatdırılması, həm də gələcəyə mesaj vasitəsidir. Son zamanlar Türkiyə kino sahəsində də öz sözünü deyir, türk serialları film auditoriyasının böyük hissəsini əhatə edir. Fikrimcə, birgə film istehsalı işində yüksək nəticələr əldə etmək mümkündür. Azərbaycan və Türkiyənin 44 günlük Vətən müharibəsi ilə bağlı birgə filmlər, seriallar yaratmasının tam zamanıdır. Ortada siyasi iradə də var. Bütün mənalarda bu işlərin reallaşması üçün şərait var. Əlbəttə, bu işə digər qardaş ölkələr də qoşula bilər. Bu bütün hallarda bizim zəfərimizin dünyada təbliğ ediləməsinə böyük töhfə verər”-deyə D.Osmanlı vurğuladı.
Şamil Əliyev: “Türkiyə ilə gələcəkdə müştərək proyektlərimiz olacaq”
Tanınmış kinorejissor və kinossenarist Şamil Əliyevin fikrincə də, qardaş Türkiyə ilə birgə film və seriallar çəkmək çox yaxşı olardı. O hesab edir ki, belə bir möhtəşəm tədbirdə dövlətin təmsil olunması və ortaya iradə qoyması çox yaxşı haldır. 44 günlük müharibədə qələbəmizin kinoda əks olunmasının çox vacib olduğunu deyən Ş.Əliyevin sözlərinə görə, bunun üçün qardaş ölkə kinematoqrafları ilə birgə layihələrə start verilməlidir. “Bunu bu cür layihələrə bizim ciddi yanaşmağımızın ciddi bir nümunəsi hesab edirəm. Ona görə də, ümid edək ki, oturuşmuş kino sənayesinə malik olan Türkiyə ilə gələcəkdə müştərək proyektlərimiz olacaq. Çünki bu cür ciddi, sanballı layihələrin ərsəyə gəlməsinə Azərbaycan kino sənayesinin bugünkü halı imkan vermir. Kino sənayemizin imkanı yoxdur ki, ortaya yüksək səviyyəli bir iş qoya biləsən. Biz kino sənayesini qurmaq yolunun başlanğıncındayıq. Bunun obyetiv və subyektiv səbəbləri var. Bunu siz özünüz də bilirsiniz. Müharibə buna çox böyük maneçiliklər törətdi. İndi artıq bu işə əzmkarlqla başlamaq olar. Oturuşmuş kino sənayesini qurmaq isə bir günün, bir ilin, iki ilin işi deyil. Şübhəsiz, biz kinematoqraflardan da çox böyük əzmkarlıq, cavabdehlik tələb olunur. Bu işə nəinki həvəslə, ona vətən qarşısında bir bircumuz kimi yanaşmağımız tələb olunur. Yəni bunun yolu Türkiyə kinomatoqraflarının təcrübəsindən yararlanmaqdır. Bu zərurətdir, tələbdir. Ona görə də, bizim də üzərimizə çox böyük cavabdehlik düşür. Bunu hiss etmək, dərk etmək lazımdır”- deyə Ş.Əliyev qeyd etdi.
İradə SARIYEVA
