Azərbaycan münsiflərdən çıxarılır, səslərimiz başqa ölkəyə yazılır – “Avroviziya”nın görünməzlikləri...

img

“Avroviziya” Beynəlxalq Mahnı Müsabiqəsinin təşkilatçısı olan Avropa Yayım Birliyi 6 ölkəni münsiflər heyətindən çıxarıb. Bu barədə yarışmanın saytında məlumat yerləşdirilib.

Sözügedən ölkələr Azərbaycan, Gürcüstan, Monteneqro, Polşa, Rumıniya və San Marinodur. Həmin ölkələr qaydaları pozmaqda ittiham edilir.

Qeyd edək ki, bazar günü “Avroviziya” mahnı müsabiqəsinin canlı yayımında münsif səsverməsi zamanı texniki problemlərin yaşandığı bildirililib. Bu səbəbdən Azərbaycandan səsləri İTV-nin aparıcısı Nərmin Salmanova yox, Martin açıqlayıb. O, ölkəmizin 12 xalı Böyük Britaniyaya verdiyini deyib. N.Salmanova isə “Sabaha saxlamayaq” verilişində Azərbaycanın həmin xalı əslində Ukraynaya göndərdiyini qeyd edib.

Azərbaycanın “Avroviziya” Beynəlxalq Mahnı Müsabiqəsinin münsiflər heyətindən uzaqlaşdırılmasını qərəz sayan ekspertlərə görə, burada söhbət qanun pozuntusundan yox, məhz siyasi yanaşmadan gedir. Azərbaycanın əməkdaşlığı müddətində “Avroviziya”da ən yüksək səviyyədə iştirak etdiyini qeyd edən ekspertlərin sözlərinə görə, burada baş verənlər qərəzdir. Azərbaycanın 44 günlük Vətən müharibəsində qazandığı qələbənin artıq mədəniyyət sferasında da qısqanclıqla qarşılandığını deyən ekspertlərin fikrincə, Azərbaycan beynəlxalq hüquq müstəvisində öz pozulan hüquqlarının bərpası üçün işlər görməlidir.

  • Osman Gündüz: “Düşünürəm ki, burada üç mümkün variant ola bilər”

“Multimedia" İnformasiya Sistemləri Texnologiyaları Mərkəzinin direktoru Osman Gündüz bizimlə söhbətində məsələ ilə bağlı bir sıra məqamlara toxundu: “Avroviziya”da Azərbaycanla bağlı baş verənlər məqsədyönlüdür, yoxsa texniki xəta olub? Azərbaycanın münsifləri nə üçün müsabiqədən kənarlaşdırılıb? Artıq başa çatan “Avroviziya 2022” yarışmasının rəsmi resursunda Azərbaycan münsiflərinin Ukraynaya 6 səs verdiyi görsənir. Azərbaycanın bu yarışla bağlı münsiflər heyəti isə Ukraynaya 12 bal verildiyini bildirir. Azərbaycanın münsiflər heyətinin səsini açıqlamalı olan jurnalist Nərmin Salmanova bu qərarın elan edilməsi üçün canlı bağlantının alınmadığını açıqlayıb. O, bu bağlantının qarşı tərəfin günahı ucbatından alınmadığını qeyd edib. Qarşı tərəf, "Avrovizion 2022" təşkilatçıları, Avropa Yayım Birliyi isə bununla bağlı rəsmi açıqlama verib.  Onlar, Azərbaycan da daxil olmaqla, 6 ölkənin münsiflər heyətinin səsvermə qaydalarını pozduğunu və manipulyasiya etdiyini bildiriblər. Buna görə də bu ölkələrin münsiflərinin qərarları ləğv edilib və qaydalara uyğun olaraq təşkilatçılar əvvəlki mərhələnin nəticələrini əsas götürərək özləri ölkələr üzrə balları qeyd ediblər.

Kimdir günahkar?

Düşünürəm ki, burada üç mümkün variant ola bilər :

1. “Avroviziya” kifayət qədər siyasiləşmiş bir yarışmaya çevrilib. Güman ki, siyasi motivlər əsasında, ikili standartlar əsasında yanaşma olub və AYB məqsədyönlü olaraq Azərbaycanın münsiflər heyətinin verdiyi balları nəzərə almayıb və səsvermə qaydalarını pozduğunu bəhanə edərək münsiflərimizi yarışdan kənarlaşdırıb

2. Ola bilər ki, bizim münsiflər heyətində səsvermə ilə bağlı fikir ayrılığı olub və bununla bağlı öncədən, nəticələr elan olunmazdan qabaq informasiya sızıb. Yarışın qaydalarına görə, bu tip hallarda nəticələr nəzərə alınmır.

3. Güman etmək olar ki, Münsiflər heyəti hansısa səbəblərdən canlı yayımda balları elan etmək istəməyib və məqsədyönlü olaraq bağlantı yaratmayıblar.

Yəni necə deyərlər, səsvermədə məqsədyönlü olaraq iştirak etmək istəməyiblər.

Nə etməli?

AYB artıq rəsmi qərarını verib. Azərbaycanı manipulyasiyada və qaydaları pozmaqda ittiham edib.

Münsiflər heyəti isə bunu təkzib edir.

Düşünürəm ki, bu xoşagəlməz proseslərdə Azərbaycanın adı hallandığından Azərbaycan hökumətinin bu məsələni araşdırması, canlı bağlantıya cavabdeh olan telekommunikasiya operatorlarına sorğular verməsi , münsiflərin iclasının protokollarına və gedişinə baxış keçirməsi və yekun nəticələr əsasında rəsmi açıqlama verməsi doğru olardı. Əgər yuxarıdakılardan 1-ci variant doğru olarsa, onda bir müddət Azərbaycanın bu yarışı rəsmi olaraq boykot etməsi də nəzərdən keçirilə bilər”.

  • Azər Həsrət: “Mənə elə gəlir ki, artıq “Avroviziya” ilə yollarımızı ayırmağın vaxtı çatıb”

Siyasi şərhçi Azər Həsrət isə hesab edir ki, Azərbaycan bundan sonra “Avrovizya”da iştirak etməməlidir: “Mənə elə gəlir ki, artıq “Avroviziya” ilə yollarımızı ayırmağın vaxtı çatıb. Bir vaxtlar bizə “Avrovziya” ona görə lazım idi ki, ölkəmizi tanıtmaq, Avropaya inteqrasiya yolunda daha  çevik addımlar atmaq istəyirdik. Yəni buna ciddi ehtiyacımız vardı. Ona görə də, “Avroviziya”, İlk Avropa Oyunları, İslam Həmrəyliyi Oyunları, “Formula-1” kimi iri həcmli tədbirlər keçirdik. Bunu ona görə edirdik ki, Azərbaycan dünyada yaxşı mənada tanınsın, biz buna nail olmuşuq. Artıq Azərbaycan dünyada yetərincə tanınır. Bizə lazım olan yerlərdə “Azərbaycan haradır? Azərbaycanlılar kimdir” deyə sual edən yoxdur.

Zatən hamı bilir ki, “Avroviziya” musiqi, mədəniyyət yarışmasından daha çox siyasi gövdə göstərisi, əzələ nümayişi səhnəsidir. Azərbaycan da, əlbəttə, durub-durduğu yerdə buna əlavə xərc çəkir. Biz “Avroviziya”dan nə qazanırıq? Üstəlik də, onun bizə gətirdiyi nədir? O səhnədə ifa edilən musiqilər, təqdim edilən nümayişlər bizə nə qazandırır? Yəni bəzən normal adamın oturub baxa bilməyəcəyi nümayişlər var. Bu bizə lazım deyil. Biz bir Şərq, müsəlman, türk cəmiyyətiyik. Ona görə də hesab edirəm ki, artıq “Avroviziya” ilə yolları ayırmaq barədə fikirləşməliyik. “Avrovizya”nın təşkilatçısının Azərbaycanla bağlı verdiyi ani qərar və Azərbaycan tərəfin sözünü ağzında qoyması, öz fikrini ifadə etməsinə şərait yaratmaması artıq onu göstərir ki, bu müsabiqədə siyasiləşmə həddən artıq yüksək səviyyəyə qalxıb. Ona görə də biz əlavə enerji xərcləməmək üçün yollarımızı ayırmaq barədə planlar cızmalıyıq”.

İradə SARIYEVA

Peşə etikası

Son xəbərlər