Mətbuatda yayılan iddialara görə, Mədəniyyət Nazirliyi teatrlara qadağa tətbiq edib. Məlumatda bildirilir ki, teatra gedən aktyorların qırmızı dodaq boyasından, dikdabandan, qırmızı rəngli geyimlərdən, cins və dar şalvarlardan istifadəsinə qadağa qoyulub.
Yayılan iddialarla bağlı həm yerli teatrlarla, həm də Mədəniyyət Nazirliyi ilə əlaqə saxladıq.
Akademik Milli Dram Teatrının mətbuat xidmətinin rəhbəri Cavid Zeynallı "Bakı-Xəbər"ə bildirdi ki, teatrlara belə bir təlimat gəlməyib: "Qeyd olunan məsələ ilə bağlı teatr aktyorlarına hər hansı qadağa mövcud deyil. Bununla bağlı təlimat göndərilməyib".
Mədəniyyət Nazirliyi: "... Heç bir qadağadan söhbət getmir"
Mədəniyyət Nazirliyinin İnformasiya və İctimaiyyətlə əlaqələr şöbəsinindən də
Sorğumuza cavab olaraq bildirildi ki, yayılan xəbər yalandır, teatrlara belə bir təlimat verilməyib.
"Azərbaycan Respublikası Mədəniyyət Nazirliyinin Aparatının və strukturuna daxil olan qurumlarda qulluq keçən işçilərin əmək münasibətləri dövlət qulluğu sahəsində münasibətləri tənzimləyən qanunvericilik aktlarına uyğun olaraq tənzimlənir, o cümlədən dövlət qulluqçularının xidməti davranışı “Dövlət qulluqçularının etik davranış qaydaları haqqında” Azərbaycan Respublikasının Qanununa uyğun olaraq müəyyən edilir. Adıçəkilən Qanunda etik davranış qaydalarına dair ümumi müddəalar müəyyən edilməklə yanaşı, həmin etik davranış qaydalarını dəqiqləşdirən normalar, onlara riayət olunması ilə bağlı davranış mexanizmi və qaydaların işlənib hazırlanması səlahiyyəti dövlət orqanlarına həvalə edilir.
Eyni zamanda, Azərbaycan Respublikasının Əmək Məcəlləsində əmək intizamının təmin olunması məqsədi ilə müəssisədaxili intizam qaydalarının hazırlanması nəzərdə tutulmuşdur.
Mədəniyyət Nazirliyində Daxili İntizam Qaydaları Əmək Məcəlləsinin və əmək münasibətləri sahəsində münasibətləri tənzimləyən digər normativ hüquqi aktların tələbləri və müəssislərdə çalışan işçilər arasında formalaşmış işgüzar adətlər nəzərə alınaraq hazırlanmışdır. Qaydalarda hər hansı işçinin və ya şəxsin hüquqlarını və ya azadlıqlarını hər hansı şəkildə məhdudlaşdıran heç bir hal nəzərdə tutulmamışdır". Nazirliyin açıqlamasında qeyd olunduğuna görə, əksinə, əmək müqaviləsi üzrə vəzifə funksiyalarını tam həcmdə və keyfiyyətlə yerinə yetirən, müəssisənin daxili intizam qaydalarına əməl edilməsində fərqlənən işçilərin mükafatlandırılması və əməyinin dəyərləndirilməsi nəzərə alınır. "O ki qaldı geyimlə bağlı tələblərə, Qaydalarda heç bir qadağadan söhbət getmir. İşçilər üçün geyim və üsluba dair tələblər bir çox dövlət orqanlarında, habelə özəl müəssisələrdə də mövcuddur. Hətta bir çox tanınmış yerli və beynəlxalq şirkətlər var ki, öz işçiləri üçün “dress-kod” müəyyən edirlər.
Eyni zamanda, Nazirliyin tabeliyində olan teatr və mədəniyyət mərkəzlərində yaradıcı sahədə çalışan çoxsaylı işçilər üçün geyim və aksessuarların səhnə mədəniyyətinin tərkib hissəsi olduğunu nəzərə alaraq bildiririk ki, həmin işçilərin geyimləri ilə bağlı heç bir tələb və ya tövsiyə nəzərdə tutulmamışdır"- deyə Mədəniyyət Nazirliyinin açıqlamasında vurğulanır.
Leyla QARAXANLI
