Prezident İlham Əliyev aprelin 20-də “Azərbaycan Respublikasının Kino Agentliyi” publik hüquqi şəxsin yaradılması haqqında Fərman imzalayıb. Fərmana əsasən, Mədəniyyət Nazirliyinin tabeliyində “Azərbaycan Respublikasının Kino Agentliyi” publik hüquqi şəxs yaradılıb.
Müəyyən edilib ki, Agentlik Azərbaycanda kinematoqrafiyanın inkişafının, o cümlədən yerli və müştərək kino istehsalının dəstəklənməsi, kino mədəniyyətinin təbliğinin təşkili, kinematoqrafiya müəssisələrinin və kino sənayesi iştirakçılarının fəaliyyətinin, eləcə də kinematoqrafiya sahəsində yeni informasiya-kommunikasiya texnologiyalarının və innovasiyaların tətbiqinin stimullaşdırılması, Azərbaycan kinematoqrafiyasının dünya kinematoqrafiyasına inteqrasiyası sahələrində fəaliyyət göstərən, Nazirliyin tabeliyindəki kinematoqrafiya müəssisələrini idarə edən və onların fəaliyyətinə nəzarəti həyata keçirən publik hüquqi şəxsdir.
Agentliyin fəaliyyətinə ümumi rəhbərliyi və nəzarəti həyata keçirmək üçün sədr və onun iki müavini daxil olmaqla 3 üzvdən ibarət Müşahidə Şurası yaradılır. Agentliyin fəaliyyətinə cari rəhbərliyi Baş direktor həyata keçirir.
Prezident Kino Agentliyinin yaradılması ilə bağlı imzaladığı fərmanla kino məmurlarına növbəti bir şans verdi ki, kinonu relsə salısınlar. Kinonun ağır vəziyyətindən danışanda kino məmurları, kinoya məsul olan şəxslər deyirdilər problem Agentlik yarandıqdan sonra həll ediləcək. Prezident Kino Agentliyinin yaradılması ilə bağlı sənədi imzaladı. İndi isə söz kino məmurlarının və kino ictimaiyyətinindir.
Kino məmurları Prezidentin kino sahəsi ilə bağlı onlara verdiyi növbəti şansı dəyərləndirib kinonu bataqlıqdan çıxara biləcəklərmi?
Şamil Əliyev: “Məmurlar merkantil maraqlarını önə çəkərək, onlara nökərçilik edənlərə qarşı loyal olub özlərini “kiçik padşahlar” kimi aparmamalıdır”
Tanınmış kinorejissor Şamil Əliyev “Bakı-Xəbər”ə bildirdi ki, Prezidentin Kino Agentliyinin yaradılması haqda fərmanı çox mühüm əhəmiyyət daşıyır: “Möhtərəm Prezidentin sərəncamına "növbəti şans" kimi yox dövrün tələbindən irəli gələn bir məsələ kimi yanaşmaq lazımdır. "Nəyi nə vaxt və necə həll eləməyi" cənab Prezident daha düzgün bilir. Kinonu yaranmış vəziyyətdən çıxarmaq məsələsi təkcə bu şahədə çalışan məmurların işi olmamamlıdır. Yaradıcılıqla məşğul olanların da mənəvi və vətəndaşlıq borcu kimi bir cavabdehlikləri var. Mən deyərdim ki, bu fakt daha önəmli olmalıdır. Sözsüz ki, insan kapitalı (insan amili) kimi bir vacib məsələ - yəni kadrların seçilməsi də hərəkətverici (lokomotiv) rolu oynayacaq. Burada çox ehtiyatlı olmalıyıq. Keçmişdə buraxılmış səhvləri təkrar etməməliyik. Daha dəqiq desək, kinomuzun bugünkü vəziyyəti bəzi kadrların yerində olmaması ilə bağlı idi. Məmurlar merkantil maraqlarını önə çəkərək, onlara nökərçilik edənlərə qarşı loyal olub özlərini “kiçik padşahlar” kimi aparmamalıdır. Kadrlar çox şeyi həll edir. Ən yaxşı, məhtəşəm şüarları sipər edib, arxasında gizlənərək yarıtmaz işlərlə məşgul olan məmurlar daim ifşa olunmalıdır. Vaxt gözləmir”.
Əli İsa Cabbarov: “Agentliyin verdiyi imkanlardan tam olaraq istifadə etməliyik”
Azərbaycan Kinematoqrafçılar İttifaqının katibi Əli İsa Cabbarov da bizimlə söhbətində Agentliyin yaradılmasının təqdirəlayiq olduğunu vurğuladı. “Azərbaycan Kinematoqrafçılar İttifaqı Agentliyinin yaradılmasını ürəkdən alqışlayırıq. Layihənin hazırlanmasında İttifaq olaraq da iştirak etmişik. Cənab prezident “2008-2018 ci illər kinematoqrafiyanın inkişafı” Dövlət proqramı sənədini də qəbul etmişdi. Təəssüf ki, onda aidiyyəti şöbələr Dövlət proqramını layiqincə yerinə yetirmədi. Agentliyin yaranması kinomuzun inkişafı üçün lazımi səlahiyyələrin və müstəqilliyin formalaşması üçün çox vacibdi. Agentlik bir rıçaqdır ondan necə istifadə olunacağını tarix göstərəcək. Kino ictimaiyyəti Agentliyin heyəti ilə bir yerdə kinomuzun inkişafı naminə dostcasına bir yerdə işləməliyik. Agentliyin verdiyi imkanlardan tam olaraq istifadə etməliyik. Bu həm də Agentlikdə formalaşacaq heyətdən asılıdır. Orada kinematoqrafçılar arasında nüfuzlu və ya tez zamanda nüfuz qazana biləcək kadrların olması lazımdır”- deyə Ə.İ.Cabbarov qeyd etdi.
İradə SARIYEVA
