Azərbaycanda tarix mədəniyyət abidələrinin qeydiyyata alınması, bərpası, mühafizəsi əsas istiqamətlərdən olsa da, təəssüf ki, bir sıra hallarda bəzi abidələrimizi baxımsız, unudulmuş vəziyyətdə görürük. Nəinki bölgələrdə, ucqar yerlərdə, hətta Bakının beş addımlığında mövcud olan tarix mədəniyyət abidələrinin bəzilərinə qayğı göstərilmir.
Müxtəlif əsrlərdən miras qalan, xalqımızın maddi- mədəniyyət abidələri statusu alan tikililərin, qalaların, karvansaraların, türbələrin və sairin hər birinə ayrıca münasibət olmalıdır. Başlıcası isə, onlar bir-bir qeydiyyata alınmalı, təsnifatlandırılmalı və reyestrə daxil edilməlidir ki, böyüklüyündən, kiçikliyindən, yerli və dünya əhəmiyyətli olmasından asılı olmayaraq unudulmasın, dağılmasın.
Son günlər mediada, xüsusən də sosial şəbəkələrdə, Teleqram kanallarında "Minəcik" abidəsinin vəziyyəti ilə bağlı məlumatlar, fotoşəkillər yayılır.
Söhbət bir neçə gün əvvəl yerli mediada XV əsrdə tikilən, Qaradağ rayonu ərazisində yerləşən “Minəcik” adı ilə tanınan karvansaranın baxımsız vəziyyətdə olmasından gedir ki, faktlar fotolarda əks olunub.
Məlumatlara görə, bu tikili Qaradağ rayonunda, daha dəqiq Səngəçal və Əzimkənd yaxınlığında Minəcik deyilən ərazidə yerləşdiyi üçün “Minəcik” karvansarası adlandırılıb. 2001-ci ildən abidə mühafizə olunan daşınmaz tarix-mədəniyyət abidələrinin siyahısına ölkə əhəmiyyətli tarix-memarlıq abidəsi kimi daxil edilsə də, hazırda ucub-dağılmaq təhlükəsi altındadır. İddialara görə, Mədəniyyət Nazirliyinin Mədəni İrsin Qorunması, İnkişafı və Bərpası üzrə Dövlət Xidməti isə bu abidəyə illərdir əhəmiyyət vermir.
"Minəcik" abidəsinin vəziyyəti ilə bağlı Dövlət Xidmətinin məlumatı varmı? Bu abidə ilə bağlı hansı işlər görülə bilər?
"Bu cür dövlət əhəmiyyətli abidələrin təmir-bərpa və tikintisi üçün fərdi sahibkarlar..."
Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Beynəlxalq və İctimaiyyətlə əlaqələr sektorunun müdiri Nuridə Allahyarova ilə əlaqə saxladıq. N.Allahyarova "Bakı-Xəbər" ə bildirdi ki, 6 əsrlik abidənin bərpası nəzərdə tutulur.
Qurum təmsilçisi qeyd etdi ki, Qaradağ rayonu ərazisində, Minəcik deyilən ərazidə yerləşən karvansara Azərbaycan Respublikasının Nazirlər Kabinetinin 2 avqust 2001-ci il tarixli qərarı ilə dövlət qeydiyyatına götürülmüş daşınmaz tarix və mədəniyyət abidələrinin siyahısına daxil edilib.
"Tarixi abidənin bərpa olunmasına ehtiyac var. Ölkə əhəmiyyətli tarix memarlıq abidələri olan bu karvansaranın bərpa olunaraq istifadə edilməsi məsələsi diqqətdə saxlanılır.
Qədim karvan yollarının üzərində yerləşən bu abidə bərpa olunması üçün investisiya planına salınıb. Abidə növbəti illərdə dövlət əsaslı vəsait qoyuluşu hesabına tikintisi nəzərdə tutulmuş layihələrin siyahısındadır.
Bu cür dövlət əhəmiyyətli abidələrin təmir-bərpa və tikintisi üçün fərdi sahibkarlar, hüquqi şəxslər, vətəndaşlar da Dövlət Xidmətinə müraciət edə bilərlər. Müraciətlərə baxılacaq və mütəxəsislər tərəfindən nəzərə alınacaq"- deyə bildirən N.Allahyarovanın sözlərinə görə, müvafiq layihələri hazırlandıqdan sonra uyğun şəkildə Dövlət Xidmətinin əməkdaşlarının iştirakı ilə təmir-bərpa və tikintisi təmin oluna bilər.
İradə SARIYEVA
