“İstehlak qiymətlərinə daim nəzarət olmalıdır, süni qiymət artımına qətiyyən yol verilməməlidir”. Bunu Azərbaycan Prezidenti İlham Əliyev Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında yekun nitqində deyib.
Prezident bildirib ki, ölkəmizdə makroiqtisadi vəziyyət sabitdir: “Mən qeyd etdim, inflyasiya aşağı səviyyədədir – 2 faizdən bir qədər çoxdur. Manatın məzənnəsi sabitdir. Belə olan halda, əlbəttə ki, süni qiymət artımına yol vermək qətiyyən olmaz. Bəzi hallarda bəzi məhsulların qiymətlərində artım olur. Bunun heç bir əsası yoxdur. Bəzi hallarda mövsümi xarakter daşıyır. Amma bəzi hallarda qiymətlər süni şəkildə artırılır".
İlham Əliyev qeyd edib ki, indi ölkə iqtisadiyyatında canlanma var. İnsanların alıcılıq qabiliyyəti artır: "Biz bunu indi statistik göstəricilərdən görürük. İndi istehlak bazarına nəzarət edən qurumlar bunu görür. Maaşlar, müavinətlər artır, problemli kreditlərlə bağlı ödənişlər başlayıb. Ancaq biz imkan verə bilmərik ki, bundan hansısa natəmiz adamlar, möhtəkirlər istifadə etsinlər, qiymətləri süni şəkildə qaldırsınlar, yaxud da ki, hansısa bir inhisarçılıqla məşğul olsunlar. Ona görə istehlak qiymətlərinə daim nəzarət olmalıdır. Süni qiymət artımına qətiyyən yol verilməməlidir. Müvafiq qurumlar bu işlərlə çox ciddi məşğul olmalıdırlar".
Maraqlıdır, istehlak qiymətlərinin nəzarətdə saxlanması barədə Prezidentin göstərişinin layiqli icrası üçün məsuliyyəti hansı qurum daşıyacaq?
Pərviz Heydərov: “Əhalinin sosial müdafiəsinin gücləndirilməsi istiqamətində dövriyyəyə 2 milyarddan çox nağd vəsait daxil olub, təəssüf ki, bəzi işbazlar bu vəziyyətdən istifadə etmək istəyirlər”
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, son illər əhalinin sosial müdafiəsinin gücləndirilməsi istiqamətində çoxlu sayda layihə həyata keçirilir. Görülən işlər nəticəsində əhalinin gəliri müəyyən dərəcədə artıb. Belə olan halda, dövriyyəyə 2 milyarddan çox nağd vəsait daxil olub: “Ancaq bu vəziyyət daha çox gəlir əldə etmək istəyən sahibkarlara imkan verməməlidir ki, onlar süni şəkildə qiyməti qaldırsınlar. İstehlak məhsullarının qiymətinə xüsusi nəzarət tətbiq olunmalıdır”.
P.Heydərov onu da vurğuladı ki, son 3-4 il ərzində istehlak bazarında süni qiymət artımı çox qeydə alınmır. Bunun da səbəbi aidiyyəti qurumların istehlak qiymətlərinə xüsusi nəzarət tətbiq etməsidir.
Həmsöhbətimiz onu da vurğuladı ki, bir müddət əvvəl iqtisadiyyat naziri Şahin Mustafayev mətbuata açıqlamasında bildirmişdi ki, süni qiymət artımına yol verməmək üçün istehlak bazarında istehlak qiymətinin formalaşması dövlət nəzarətindədir: “Nazir çıxışı zamanı qeyd etmişdi ki, istehlak bazarına ciddi nəzarət tətbiq olunur və həmin nəzarət nəticəsində ölkədə süni qiymət artımının baş verməsi üçün heç bir zəmin yoxdur. Bu məsələyə ölkə başçısı İlham Əliyev də aprelin 30-da toxundu.
İstehlak qiymətlərinin nəzarətdə saxlanması funksiyasını İqtisadiyyat Nazirliyi həyata keçirir”
Günel CƏLİLOVA
