Aprelin 30-da Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. İclasda bir sıra məsələlərə toxunulub, o cümlədən, Azərbaycan iqtisadiyyatının qarşıdakı illərdə inkişafı məsələsinə toxunulub.
Prezident İ.Əliyev qeyd edib ki, hazırda iqtisadiyyatın yeni inkişaf strategiyası hazırlanır və ölkədə aparılan islahatlar beynəlxalq qurumlar tərəfindən dəstəklənir.
Vüqar Bayramov: “… iqtisadi inkişafa daha sistemli yanaşmanın nümayiş etdirilməsinə imkan verəcək”
Ölkə iqtisadiyyatının inkişafı istiqamətində hazırlanan yeni strategiyanın əhəmiyyəti barəsində danışan iqtisadçı-ekspert Vüqar Bayramov “Bakı-Xəbər”ə açıqlamasında bunları dedi: “Məndə olan məlumata görə, inkişaf strategiyası "Makkenzi” şirkəti tərəfindən hazırlanır və 5 illik müddəti əhatə edəcək. Strategiya hazır olduqdan sonra yerli mütəxəssislərlə də müzakirəsi həyata keçiriləcək. Müzakirə bitdikdən sonra strategiyanın dövlət başçısı tərəfindən təsdiq olunması gözlənir”.
Həmsöhbətimiz onu da vurğuladı ki, "Makkenzi” şirkəti bir sıra ölkələr üçün də inkişaf strategiyası hazırlayıb. Həmin strategiyalarla tanış olmuşuq: “Makkenzi” şirkətinin hazırladığı strategiyada diqqətçəkən məqamlardan biri də hər bir sektor üzrə konkret ideya və layihələrin olmasıdır. Eyni zamanda, fəaliyyətlərin ümumdaxili məhsula, məşğulluğa necə təsir göstərməsi də qeyd olunur”.
V.Bayramov hesab edir ki, inkişaf strategiyasının hazırlanması və qəbul olunması iqtisadi inkişafa daha sistemli yanaşmanın nümayiş etdirilməsinə imkan verəcək. Strategiya qəbul olunduqdan sonrakı 5 il ərzində ölkədə həm sistemli, həm sosial baxımdan dərinləşmiş islahatlar həyata keçiriləcək”.
İqtisadçının fikrincə, hazırlanacaq yeni strategiya ölkə iqtisadiyyatının inkişafına səbəb olacaq.
Günel CƏLİLOVA
