Fikrət Yusifov: “Çin istəyir ki, ixrac etdiyi məhsulların bir hissəsini Azərbaycan üzərindən dünya bazarına çıxarsın”
Məlum olduğu kimi, Prezident İlham Əliyev Çində keçirilən 2-ci “Bir kəmər, bir yol” beynəlxalq forumunda iştirak edib. Forumda çıxış edən dövlət başçısı ölkədə həyata keçirilən iqtisadi islahatlardan danışıb, nəqliyyat, infrastruktur, tranzit sahəsində həyata keçirilən layihələrin önəmindən bəhs edib.
Prezident qeyd edib ki, Azərbaycanın sürətli iqtisadi inkişafı bizə ölkəni transformasiya etməyə kömək edib. Ötən on beş il ərzində ölkə iqtisadiyyatı üç dəfədən çox artıb. Ötən illər ərzində yatırılan 260 milyard dollar həcmində sərmayə ölkəni müasirləşdirməyə, müasir infrastruktur yaratmağa kömək edib. O cümlədən, nəqliyyat sahəsində infrastrukturu yaratmağa imkan verib. Prezident vurğulayıb ki, aparılan islahatlarda əsas hədəf iqtisadiyyatı şaxələndirmək, insan kapitalına investisiya yatırmaq və inkişaf üçün dayanıqlı imkanlar yaratmaqdır. Ölkə başçısı bu sahədə görülən işlər və əldə olunan müsbət nəticələrə toxunub. Eyni zamanda, məlum olub ki, Azərbaycan müasir infrastrukturun yaradılmasına sərmayə yatırmaq üçün öz maliyyə resurslarından istifadə edir. Müasir nəqliyyat infrastrukturunun yaradılması Azərbaycanın prioritetləri sırasındadır.
Görünən odur ki, “Bir kəmər - bir yol” layihəsi yeni strateji reallıqların tərənnümü kimi qəbul olunur. Çoxsaylı ölkə içərisində öz geosiyasi və geostrateji mövqeyi ilə seçilən tarixi İpək yolunun “Şimal-Cənub” nəqliyyat marşrutu ilə kəsişdiyi mühüm geostrateji məkanda Azərbaycan da var. Bakı özünün müvafiq nəqliyyat-infrastruktur, logistik imkanları, mühüm tranzit üstünlükləri ilə fərqlənir. Belə üstünlüklər həm də Böyük İpək yolunun baş arteriyası - TRASECA-nın mənzil qərargahının yerləşdiyi, Xəzərin ən böyük liman şəhəri paytaxt Bakının bütün multimodal nəqliyyat sistemini özündə birləşdirir. Avropa ilə Asiyanı birləşdirəcək yeni alternativ bağlantı - Bakı-Tiflis-Qars dəmir yolu xəttinin işə düşməsi, yeni Bakı Beynəlxalq Dəniz Ticarət Limanı Kompleksinin yaradılması, “Şimal-Cənub” nəqliyyat dəhlizinin yenidən qurulması fonunda bu effektlər daha real görkəm alacaq.
Yekun olaraq, iqtisadi sahədə həyata keçirilən islahatlar, infrastruktur və tranzit şəbəkəsinin inkişafı ilə bağlı görülən böyük işlər “Bir kəmər, bir yol” layihəsinin həyata keçirilməsində necə rol oynayacaq? Azərbaycansız sözügedən layihənin uğurundan danışmaq olarmı?
Məsələyə münasibət bildirən iqtisad elmləri doktoru Fikrət Yusifovun sözlərinə görə, Azərbaycanda nəqliyyat infrastrukturunun müasirləşdirilməsi ölkənin tranzit və logistik imkanlarını artırır: “Azərbaycan mühüm nəqliyyat qovşağı üzərində yerləşir. Azərbaycanda müasir nəqliyyat infrastrukturunun yaradılması üçün sistemli işlər görülür. Bakıda müasir dəniz limanı tikilib. Azərbaycanda bu sahədə görülən və görülməkdə olan işlər “Bir kəmər, bir yol” layihəsinin reallaşmasında mühüm rol oynayacaq. Bu baxımdan, Prezident İlham Əliyevin sözügedən tədbirdə çıxışı və toxunduğu məsələlər mühüm əhəmiyyət kəsb edir. Bu layihədən bəhrələnəcək ölkələrdən biri də Azərbaycandır. Təbii ki, Azərbaycan da bu prosesdə iştirakçı ölkə olaraq sözügedən layihənin reallaşmasına öz töhfəsini verəcək. Bu layihə çərçivəsində Azərbaycan üzərindən daşımaların həyata keçirilməsi xüsusi rola malikdir. Çünki ərazi baxımdan Azərbaycan çöx mühüm mövqedə yerləşir. Ona görə ki, Azərbaycan Qərblə Şərqi birləşdirəcək çox ciddi məkandır. Ümumilikdə, Çinin Azərbaycana marağı xüsusidir. Bu səbəbdən “Bir kəmər, bir yol” layihəsi çərçivəsində Azərbaycanla əməkdaşlıqda çox maraqlıdır. Çünki bu layihə Çin üçün xüsusi əhəmiyyət kəsb edir. Məsələ ondadır ki, Çin 4,6 trilyon dollar xarici ticarət dövriyyəsi olan bir ölkədir. Çin istəyir ki, ixrac etdiyi məhsulların bir hissəsini Azərbaycan üzərindən dünya bazarına çıxarsın. Bu reallaşarsa, Azərbaycan tranzit ölkə olaraq böyük qazanc əldə edəcək. “Bir kəmər, bir yol” layihəsinin Azərbaycan üzərindən həyata keçirilməsinin bir sıra üstünlükləri var. Bunun başlıca üstünlüyü ondan ibarətdir ki, yüklərin Qərb ölkələrinə çatdırılması müddəti hardasa 3 dəfə qısalacaq. Bu baxımdan, Çin daha çox maraqlıdır ki, Azərbaycan bu layihədə fəal iştirak etsin. Azərbaycansız bu layihənin reallaşmasını təsəvvür etmək çətindir. Ona görə ki, Azərbaycan bu layihənin reallaşmasında açar rolunu oynayır”.
Vidadi ORDAHALLI
