“Ölkəmizdə sahibkarlığın inkişaf etdirilməsi, biznes mühitinin durmadan yaxşılaşdırılması dövlətimizin və hökumətin həyata keçirdiyi iqtisadi siyasətdə əsas vəzifə təşkil edir”
Hər bir ölkənin iqtisadiyyatında qeyri-dövlət sektorunun mühüm rolu və payı var. Özəl sektorun inkişafı keçid iqtisadiyyatlı ölkələrin sosial-iqtisadi sisteminin yenidən qurulmasında, hökumətin qarşıya qoyduğu strateji məqsədlərin uğurla reallaşdırılmasında mühüm rol oynayır. Son zamanlar ölkədə özəl sektorun inkişafına, yerli və xarici iş adamlarının fəaliyyətinə hərtərəfli imkanların yaradılması, iqtisadi mühitin liberallaşdırılması yolu ilə əlverişli biznes və investisiya mühitinin formalaşdırılması istiqamətində bütün zəruri tədbirləri həyata keçirir. Təbii ki, görülən hər bir iş biznes mühitinin inkişaf etməsinə səbəb olur. Azərbaycanın biznes mühiti haqqında Prezident İlham Əliyev də fikir bildirib. Azərbaycan Prezidenti İlham Əliyev aprelin 26-da Pekində keçirilən 2-ci “Bir kəmər, bir yol” Beynəlxalq Əməkdaşlıq Forumunda çıxışı zamanı deyib ki, Azərbaycandakı biznes mühiti dünyada olan ən qabaqcıl biznes mühitlərindən biridir. Azərbaycanın biznes mühiti haqqında “Bakı-Xəbər”ə məlumat verən iqtisadçı ekspert Pərviz Heydərov bildirdi ki, ölkəmizdə sahibkarlığın inkişaf etdirilməsi, biznes mühitinin durmadan yaxşılaşdırılması dövlətimizin və hökumətin həyata keçirdiyi iqtisadi siyasətdə əsas vəzifə təşkil edir: “Ümumiyyətlə, sahibkarlığın daha geniş şəkildə dəstəklənməsi siyasətinə böyük miqyasda 2015-ci ildən başlanıb. Bu siyasət əvvəl də mövcud olsa da, sahibkarlar üçün daha geniş imkanların yaradılması, onların qarşısında mövcud olan hər cür məhdudiyyətlərin aradan qaldırılması və sair kimi addımlar məhz qeyd olunan ildən atılır. Bunun nəticəsidir ki, Dünya Bankı tərəfindən hazırlanan “Doing Business – 2019” reytinq cədvəlində Azərbaycan 32 pillə irəliləyərək, 190 ölkə arasında 57-ci yerdən 25-ə yüksəldi. Adı çəkilən hesabat Dünya Bankı ilə Beynəlxalq Maliyyə Korporasiyası tərəfindən 2003-cü ildən başlayaraq, hər il hazırlanır. Və burada ölkələr üzrə biznesin tətbiqi sahəsində bir sıra göstəricilər baxımından əlverişlilik səviyyəsi nəzərdən keçirilməklə, mövcud vəziyyət qiymətləndirilir. Həmin göstəricilərə isə müəssisələrin qeydiyyatı, tikintiyə icazənin alınması, elektrik enerjisinə qoşulma, mülkiyyətin qeydiyyatı, kreditləşdirmə, sərmayənin qorunması, vergiyığımı, xarici ticarət, müqavilələrin icrasına təminat, həmçinin iflas kimi məsələlər daxildir. Təkcə, 1 il ərzində Azərbaycanda rekord sayda, 8 islahat həyata keçirilib. Bu, digər ölkələrlə müqayisədə ən yüksək göstərici sayılır. Müqayisə üçün qeyd edim ki, Gürcüstanda 3 islahat aparılıb. Yeni biznesə başlamaq və müqavilələrin hüquqi tətbiqi asanlaşdırılıb. Məsələn, ölkəmizdə elektrik şəbəkəsinə qoşulma işləri daha asanlaşmış və ucuzlaşmışdır. Belə ki, müəssisənin şəbəkəyə qoşulması üçün tələb olunan müddət 56 gündən 41 günə enib. Eyni zamanda şəbəkə infrastrukturuna investisiyalar həyata keçirilmiş və milli enerji tənzimləyicisi yaradılıb. Həmçinin, tikinti icazələrinin alınması da asanlaşdırılıb. Səhmdarların hüquqlarının və ciddi korporativ qərarların qəbulunda rolunun gücləndirilməsi, sahiblik və nəzarət strukturlarının aydınlaşdırılması və daha böyük korporativ şəffaflığın tələb edilməsi ilə minoritar səhmdarların hüquqları gücləndirilib. Ümumiyyətlə, istər Dünya İqtisadi Forumunun (DIF), istərsə də “Doing Business” kimi beynəlxalq hesabatların hazırlanması zamanı nəzərdən keçirilən göstəricilərdə irəliləmək üçün biznes mühitinin durmadan yaxşılaşdırılması, mövcud qanunların təkmilləşdirilməsi, tənzimləmə və insan kapitalından istifadə kimi məsələlərin həlli istiqamətində fasiləsiz olaraq islahatların aparılması Azərbaycan hökuməti tərəfindən müvafiq kursa çevrilib. Rəqabətin təşkili, iqtisadiyyatın şaxələndirilməsinin dərinləşdirilməsi, insan kapitalının yaxşılaşdırılması və yeni iqtisadi artım mənbələrinin yaradılması kimi tədbirlər məhz sahibkarlıq fəaliyyətini genişləndirməkdən və bunun üçün zəruri olan şəraiti inkişaf etdirməkdən ibarətdir. Bu sahədə nəticələr əldə olunması üçün hökumətimiz var gücü ilə çalışmaqdadır”.
Günel CƏLİLOVA
