Məlumdur ki, Prezident İlham Əliyevin "Fiziki şəxslərin problemli kreditlərinin həlli ilə bağlı əlavə tədbirlər haqqında” 28 fevral 2019-cu il tarixli fərmanının icrası olaraq fiziki şəxslərin xarici valyutada olan kreditləri üzrə kompensasiyaların verilməsi ilə bağlı hazırlıq işləri başa çatdırılıb.
Kompensasiya ödənişinin ümumi məbləği, ödəniş ediləcək fiziki şəxslərin siyahısı və hər bir fiziki şəxsə ödəniləcək vəsaitin məbləği müəyyən edilərək, hər bir fəaliyyətdə və ləğv prosesində olan kredit təşkilatı üzrə ayrılacaq vəsaitin məbləği barədə məlumat Maliyyə Nazirliyinə və Azərbaycan Mərkəzi Bankına (AMB) təqdim edilib.
Maliyyə Bazarlarına Nəzarət Palatasının təqdim etdiyi siyahıya uyğun olaraq, MN müvafiq vəsaitlərin kredit təşkilatlarının, ləğv prosesində olan bankların və "Azərpoçt" MMC-nin AMB-dəki hesablarına köçürülməsinə başlayıb.
Məlumat üçün bildirək ki, kompensasiya alacaq şəxslərin sayı 602 347 nəfərdir. Vətəndaşlara kompensasiya ödənişlərinin verilməsinə isə aprelin 22-dən etibarən başlanıb. Bütün ödənişlərin gələn ayın sonuna qədər yekunlaşdırılması planlaşdırılır.
Onu da qeyd edək ki, kredit götürənlər arasında elə şəxslər var ki, onlar vaxtilə müxtəlif cinayət törədərək həbsə düşüblər. Maraqlıdır, adı kompensasiya siyahısına düşən, lakin həbsdə olan şəxslərə ödəniş necə veriləcək?
Maliyyə Bazarlarına Nəzarət Palatası: “Kompensasiya alacaq, lakin müəyyən səbəblərdən məhkumluq həyatı yaşayan şəxslər etibarnamə ilə ona düşəcək ödənişi digər vətəndaşın almasına icazə verə bilər”
Maliyyə Bazarlarına Nəzarət Palatasının mətbuat xidmətindən “Bakı-Xəbər”ə verilən məlumata görə, bu kimi şəxslər etibarnamə ilə ona düşəcək kompensasiyanı digər vətəndaşın almasına icazə verə bilər: “Yalnız belə halda həbsdə olan şəxslərə düşən kompensasiyanı almaq mümkündür”.
Elşad Məmmədov: “Məhkumlar da digər vətəndaşlar kimi kompensasiya almaq hüququna malikdirlər”
Azərbaycan Dövlət İqtisad Universitetinin (UNEC) professoru, iqtisadçı Elşad Məmmədov bizimlə söhbətində qeyd etdi ki, "Fiziki şəxslərin problemli kreditlərinin həlli ilə bağlı əlavə tədbirlər haqqında” fərmanda qeyd olunur ki, bu qərar bütün ölkə vətəndaşlarına şamil olunur. O cümlədən, Azərbaycan vətəndaşları olan məhbuslara da aiddir: “Müəyyən səbəblərdən həbsə düşən şəxslər həm istehlakçı, həm də vətəndaş kimi hüquqlara malikdirlər. Məhkumlar da digər vətəndaşlar kimi kompensasiya almaq hüququna malikdirlər”.
Real icra mexanizmlərinə gəldikdə isə, həmsöhbətimiz bildirdi ki, ya notarius formasında verilmiş etibarnamə ilə kompensasiyanın verilməsi mümkün ola bilər, ya da qanunvericilikdə nəzərdə tutulmuş qaydada Maliyyə Bazarlarına Nəzarət Palatasının ümumi nəzarəti altında kommersiya bankları bu prosesi həyata keçirə bilərlər.
Günel CƏLİLOVA
