Məlum olduğu kimi, aprelin 25-də Çinin paytaxtı Pekində “Bir kəmər, bir yol” strategiyası çərçivəsində ikinci beynəlxalq əməkdaşlıq forumu keçirilməsinə start verilib. Tədbirdə dövlət və hökumət başçıları, digər dövlət rəsmiləri, özəl sektor nümayəndələri, sərmayədarlar, beynəlxalq təşkilatların nümayəndələri iştirak edirlər.
Sözügedən tədbirlə əlaqədar Prezident İlham Əliyevin rəhbərliyi altında böyük nümayəndə heyəti Pekində səfərdədir. İşgüzar səfər çərçivəsində Prezident İlham Əliyev Çinin Sədri Si Cinpinlə və bir sıra böyük şirkət rəhbərləri ilə görüşlər keçirib. Keçirilən görüşlər zamanı bir sıra məsələlər müzakirə edilib.
Azərbaycan Cənubi Qafqaz regionunda Çinin əsas ticarət tərəfdaşıdır. Belə ki, Çinin Cənubi Qafqaz ölkələri ilə ticarətində ölkəmizin payı 43 faiz təşkil edir. Bununla yanaşı, Pekində Azərbaycan və Çin şirkətləri arasında ümumi dəyəri 821 milyon ABŞ dolları olan müxtəlif istiqamətlər üzrə 10 sənəd imzalanıb. Daha sonra Sumqayıt Kimya Sənaye Parkı ərazisində şin istehsalı zavodunun qurulmasına, Kürdəmir rayonunda 300 hektaradək sahədə müasir istixana kompleksinin tikintisinə, Quba, Xaçmaz və Göyçayda aqro-logistik sənaye parklarının yaradılmasına, “Azerbaijan Digital HUB” proqramı çərçivəsində Asiya-Avropa telekommunikasiya dəhlizinin yaradılmasına, “Transxəzər” nəqliyyat dəhlizi vasitəsilə Bakıya və Azərbaycan ərazisindən tranzit keçməklə digər ölkələrə 2500-dək konteynerin daşınmasına, Azərbaycan istehsalı şərab və digər spirtli içkilərin Çinə ixracına, Çinin Çendu şəhərində Azərbaycan Ticarət Evinin yaradılmasına dair Əməkdaşlıq Memorandumu imzalanıb.
Görünən odur ki, Azərbaycanla Çin arasında iqtisadi sahədə bir sıra mühüm müqavilələr imzalanıb. Bütün bunlardan nə gözlənir və ekspertlər bunu necə dəyərləndirirlər?
Fikrət Yusifov: “Bu, müxtəlif sahələrin inkişafı üçün geniş meydan açır”
Məsələyə münasibət bildirən iqtisad elmləri doktoru Fikrət Yusifovun sözlərinə görə, imzalanan sənədlərin mühüm əhəmiyyəti var: “Son illər Çin ilə Azərbaycan arasında dostluq və tərəfdaşlıq münasibətləri getdikcə dərinləşir. Çinin Azərbaycanla əməkdaşlıqda böyük maraqları var. Çinin Qərblə Şərqi birləşdirən bir məkan kimi Azərbaycana olan maraqları olduqca böyükdür. Təbii ki, coğrafi yerləşməmiz, iqtisadi sahədə apardığımız davamlı islahatlar, ölkədə artıq illərlə hökm sürən ictimai-siyasi sabitlik Çin kimi böyük və güclü bir dövləti bizimlə əməkdaşlıqda maraqlı edə bilən əsas şərtlərdir. Heç şübhəsiz, biz də dünyanın iqtisadi cəhətdən ikinci nəhəng ölkəsinin bizə olan münasibətindən maksimum yararlanmaq istəyindəyik. Çindən Qərbə daşınan yüklərin az bir hissəsinin Azərbaycan üzərindən keçməsi bizə böyük ölçülərdə valyuta gəlirləri gətirə bilər. Ölkələrimiz arasındakı münasibətlərdə bizim başlıca hədəflərimizdən biri və mən deyərdim ki, birincisi tranzit yükdaşımalar sahəsində əməkdaşlığı yüksək səviyyədə qurmaqdan ibarətdir. Azərbaycan və Çin rəhbərlərinin dəstəyilə ölkələrimiz arasındaki siyasi, iqtisadi, mədəni və digər sahələrdə əməkdaşlıq inkişaf edir”.
F.Yusifovun fikrincə, müxtəlif istiqamətlər üzrə tərəflər arasında 821 milyon dollarlıq 10 sənədin imzalanması böyük iqtisadi uğurdur: “Azərbaycan biznes mühitinin Çinlə bu cür əlaqələr qurmasıı böyük uğurdur. Bu, müxtəlif sahələrin inkişafı üçün geniş meydan açır. Görünən odur ki, iki ölkə arasında əlaqələr daha da genişlənir və bu sahədə böyük uğurlar var. Hesab edirəm ki, iki ölkə arasında əlaqələrin genişlənməsində, Azərbaycan üzərindən tranzit yükdaşımaların artmasında Prezident İlham Əliyevin Çinə son işgüzar səfəri müstəsna əhəmiyyətə malik olacaq”.
Vidadi ORDAHALLI
