Prezident İlham Əliyevin “Bəzi çoxmənzilli binaların istismarına icazə verilməsinin sadələşdirilməsi haqqında” Sərəncamından artıq iki aydan çox vaxt keçir. Qeyd edək ki, ölkə başçısı sözügedən məsələ ilə bağlı bu ilin 19 fevralında sərəncam imzalayıb. Ancaq sərəncamdan iki aydan çox vaxt keçsə də, cəmi 14 binaya dair sənədlər komplektləşdirilərək, bu binaların istismara hazır olması barədə rəy tərtib edilib. Həmin rəy aidiyyəti üzrə Azərbaycan Respublikası Dövlət Şəhərsalma və Arxitektura Komitəsinə təqdim olunub.
“Bəzi çoxmənzilli binaların istismarına icazə verilməsinin sadələşdirilməsi haqqında” Azərbaycan Respublikası Prezidentinin Sərəncamının icrası ilə bağlı görülmüş işlərin, habelə qarşıya çıxan problemlərin müzakirəsi mövzusunda müşavirədə də bu haqda məlumat verilib. Yüksək çinli məmurların, o cümlədən, komitə sədrlərinin iştirak etdiyi müşavirədə çıxış edən fövqəladə hallar naziri Kəmaləddin Heydərov bildirib ki, ötən müddət ərzində aidiyyəti qurumlar tərəfindən lazımi işlər görülüb və bu proses fasiləsiz olaraq davam etdirilir.
O da məlum olub ki, hazırda ölkə üzrə istismara qəbul olunmamış çoxmənzilli yaşayış binalarının sayı 434 ünvan təşkil edir ki, bunun da 381-i Bakı şəhərindədir. Onu da qeyd edək ki, məlum sərəncamın 400-dək yaşayış kompleksinə şamil olunacağı, 50 minədək mənzili, 10 minlərlə ailəni əhatə edəcəyi bildirilir. Sərəncam 2019-cu il yanvarın 1-dək tikilən, tam təhvil verilən, istismara qəbul olunmayan və faktiki olaraq, insanların yaşadıqları binalara şamil edilir.
Məlumdur ki, müvafiq sərəncamın verilməsi vətəndaşlarda çoxsaylı problemin həllini tapacağına ümid yaradıb. Çünki binaların istismarına icazənin verilməməsindən daha çox əziyyət çəkən sahibkarlar deyil, həmin binalarda yaşayan sakinlərdir. Bu məsələ mənzillərə mülkiyyət hüququnun verilməməsi, ev alqı-satqısında əlavə ödənişlərin tələb olunması, mənzil-tikinti kooperativlərinin qanunsuzluqlarına rəvac verirdi.
Maraqlıdır, sərəncamın icrası niyə ləng gedir? 400-dək belə bina olduğu halda, niyə indiyə qədər 14 binanın istismara hazır olduğu barədə rəy verilib?
Ramil Osmanlı: “MTK-lardan binaların sənədlərinin göndərilməsində gecikmələrə yol verilir”
Məsələyə aydınlıq gətirən əmlak məsələləri üzrə ekspert Ramil Osmanlı bunu bir sıra amillərlə əlaqələndirdi: “Prezidentin sərəncamına əsasən, Fövqəladə Hallar Nazirliyinə verilən 2 aylıq müddət aprelin 19-da bitib. Ancaq nəzərə almaq lazımdır ki, bu iki ayda qeyri-iş günləri də var. Yəni o hesabla götürsək, müddət bu ayın axırında bitir. Bundan başqa, bir həftə müddətində sənədlərə Dövlət Şəhərsalma və Arxitektura Komitəsində baxılır. İlkin mərhələdə sənədlər qəbul olunur, baxılır və sonra rəy verilir. Deməyim odur ki, ilk baxışdan 14 binaya istismara hazır olmaqla bağlı rəyin verilməsi az görünə bilər. Əsas odur ki, proses başlayıb. Hesab edirəm ki, təxminən 10-15 gün ərzində daha çox bina barədə rəy veriləcəyi gözlənir. Çünki artıq nazirliyə verilən müddət bitmək üzrədir. Onu da nəzərə almaq lazımdır ki, mənzil-tikinti kooperativlərindən binaların sənədlərinin göndərilməsində gecikmələrə yol verilir. Problem ondadır ki, elə MTK-lar var, bu gün də sənədləri FHN-ə təqdim etməyib. Müxtəlif səbəblər gətirib prosesi gecikdirirlər. Belə problemlər də var. May ayının sonuna qədər bütün binalar olmasa da, hər halda, əksəriyyətinin sənədləşmə problemi həll ediləcək. Çünki cənab Prezidentin sərəncamında qoyulan məsələnin əsas mahiyyəti ondan ibarətdir ki, bina istismara yararlıdırsa, o zaman binanın istismar aktının verilməsində heç bir problem olmamalıdır”.
Vidadi ORDAHALLI
