“Yerli icra orqanları çalışmalıdırlar ki, investisiyaları cəlb etsinlər. Çünki iqtisadi artım olmasa, onda bizim maliyyə imkanlarımız da olmayacaq”. Bunu Prezident İlham Əliyev Bakının Xəzər rayonunda Mərdəkan-Qala avtomobil yolunun açılışında iştirak edərkən sakinlərlə görüşündə deyib.
Ölkə başçısının sözlərinə görə, bürokratik əngəllər aradan qaldırılmalıdır, biznes qurmaq istəyənin qarşısında süni əngəllər qoyulmamalıdır: “Əgər əvvəlki dövrü götürsək görərik ki, pensiyalar, maaşlar təqribən 10 dəfəyə yaxın artıb. Ancaq bu gün bu bizi qane edirmi? Yox. Nə etməliyik? Daha da fəal işləməliyik, iqtisadiyyat daha da sürətlə artmalıdır, sərmayə yatırılmalıdır, bürokratik əngəllər aradan qaldırılmalıdır, biznes qurmaq istəyənin qarşısında süni əngəllər qoyulmamalıdır. Yerli icra orqanları çalışmalıdırlar ki, investisiyaları cəlb etsinlər. Çünki iqtisadi artım olmasa, onda bizim maliyyə imkanlarımız da olmayacaq”.
Onu da qeyd edək ki, ölkə Prezidenti 2018-ci illin yanvarında yerli icra qurumları qarşısında bu vəzifəni qoyub. Belə ki, regionların 2014-2018-ci illərdə sosial-iqtisadi inkişafı Dövlət Proqramının icrasının dördüncü ilinin yekunlarına həsr olunmuş konfransda bu barədə danışan Prezident İlham Əliyev qeyd edib ki, yerli icra orqanları rayonlara sərmayə qoymaq üçün iş adamlarını cəlb etməlidirlər: “Yerli icra orqanları bu işlərdə daha fəal olmalıdırlar. Onlar iş adamlarını cəlb etməlidirlər ki, gəlib sərmayə qoysunlar”.
Yerli icra qurumları bu sahədə aktiv fəaliyyət göstərsə, o zaman bölgələrdə məşğulluğun təmin edilməsi və yeni iş yerlərinin açılması üçün əlavə imkanlar yaranacaq. Bu da bölgələrin inkişafına təkan verəcək.
Maraqlıdır, bölgələrdə bu sahədə vəziyyət necədir? İcra qurumları bu istiqamətdə necə fəaliyyət göstərirlər?
Təranə Əhməd: “Şirvan şəhərində bu sahədə vəziyyət qənaətbəxş deyil”
Sözügedən məsələ ilə bağlı Şirvan şəhərində fəaliyyət göstərən “Kimsəsiz və Aztəminatlı Ailələrin Uşaqlarına Sosial-Mənəvi Dəstək” İctimai Birliyinin rəhbəri Təranə Əhmədin fikirlərini öyrəndik. Onun sözlərinə görə, Prezident İlham Əliyev insanların sosial vəziyyətinin yaxşılaşdırılması üçün çox böyük işlər görür: “Ancaq gərək icra başçıları da bununla bağlı daha aktiv fəaliyyət göstərsinlər. Bəzi rayonlarda investisiyanın cəlbi ilə bağlı bir sıra işlər görülür. Biz bunu müxtəlif səfərlərdə görürük. Ancaq Şirvan şəhərində bu sahədə vəziyyət qənaətbəxş deyil. Vaxt var idi bu şəhər sənayeləşmənin səviyyəsinə görə Sumqayıtdan sonra ikinci şəhər idi. Doxsanıncı illərdə məlum səbəblərdən bu sahədə tənəzzül yaşandı. Azərbaycan dövləti maraqlıdır ki, insanlar sahibkarlıqla məşğul olsunlar, rayonlara sərmayə gəlsin. Ancaq sərmayələrin Şirvan şəhərinə cəlbi arzuolunan səviyyədə deyil. Şəhərdə elə böyük sənaye uğuru yoxdur. İnvestorlar cəlb olunsaydı, bu özünü şəhərin inkişafında göstərərdi. Bu gün Şirvan şəhəri Sumqayıt, Yevlax kimi inkişaf etmir. Baxmayaraq ki, Şirvan şəhərinin çoxşaxəli kadr potensialı var. Əmək qabiliyyətli insanlar çoxdur. Həmçinin, yaxşı təhsil alan mütəxəssislər var ki, iş tapa bilmirlər. Sərmayə cəlb edilsə, bacarıqlı kadrlar qabağa çəkilsə, vəziyyət tamam fərqli olar. Ona görə də bu sahədə görüləsi işlər çoxdur. Bir sözlə, bəzi rayonlara sərmayə cəlb edilməsi istiqamətində müəyyən dinamika olsa da, bunu bütün rayonlara şamil etmək doğru olmaz”.
Vidadi ORDAHALLI
