24/07/2019 05:12
728 x 90

Bankomatların banklararası xidməti pullu həyata keçirməsi əhalini narazı salır, çünki pul itirilir…

“Hazırda bazar liberal deyil, rəqabət mühiti zəifdir”

img

Azərbaycanda, demək olar ki, hər kəs plastik kartdan istifadə edir. Ən çox istifadə olunan xidmət də bankomatdan nağd pul çıxarmaqdır. Təəssüf ki, hər plastik kartın öz bankomatını isə istənilən yerdə tapmaq olmur. Buna görə də insanlar məcbur qalıb başqa bankomatdan nağd pul çıxarırlar. Bəzi hallarda bir şəxsin əməkhaqqı çıxardığı bankomat onun yaşadığı yerin yaxınlığında yoxdursa, o zaman həmin şəxs məcbur olub başqa bankomatdan nağd pul çəkir. Bu zaman isə yüksək faizlə komissiya haqqı tutulur. Təbii ki, bu halda itirən yalnız vətəndaşlardır.

Araşdırmalar nəticəsində həm də məlum olur ki, bəzi bankların plastik kartları ilə başqa bankomatdan nağd pul çıxaranda 3-4 faiz komissiya haqqı tutulur. Onlardan bir neçəsini misal olaraq göstərək. “ASB Bank”ın plastik kartı ilə “Ata Bank”, “Amrah Bank”, “AG Bank”, “AFB bank” və başqa bir neçə bankın bankomatından pul çəkərkən 3 faiz komissiya haqqı tutulur. “Caspian Development bank”, “Ekspressbank” və başqa bir neçə bankın kartı ilə istənilən başqa bankomatdan istifadə edərkən 3 faiz tutulur.

  • Rəşad Həsənov: “Dövlət sektoruna məxsus iş yerlərinin əməkhaqqının iki bankın kartlarına həvalə olunması bu sahədə yaşanan problemi daha da dərinləşdirir”

Məsələ ilə bağlı məlumat verən iqtisadçı-ekspertt Rəşad Həsənov “Bakı-Xəbər”ə açıqlamasında qeyd etdi ki, banklar mövcud vəziyyətdə öz mənafelərini qorumağa çalışırlar. Bu başadüşüləndir. Nəzərə almaq lazımdır ki, hər bir bankın özünün bankomat sayı, müştəri potensialı, bankomatlara yerləşdirilən məbləğlər barədə məlumatı var: “Hazırda bazar liberal deyil, rəqabət mühiti zəifdir. Rəqabət mühiti zəif olduğu təqdirdə yüksək komissiyaların tətbiq olunması başadüşüləndir. Çünki banklar bazara uyğun olaraq müəyyən siyasət həyata keçirirlər. Burada vətəndaşın narazılığı bank üçün predmet deyil. Bank qanunu pozarsa, bu zaman vətəndaşın narazılığı bank üçün problem yarada bilər. Ancaq qanunsuz hər hansı bir davranış yoxdursa, o zaman bank vətəndaşın narazılığından çox, öz müştərilərinin hüquqlarını, özünün maliyyə təminatının dayanıqlığını və iqtisadi maraqlarını nəzərə alır. Onu da nəzərə almaq lazımdır ki, dövlət sektoruna məxsus iş yerlərinin əməkhaqqının iki bankın kartlarına həvalə olunması problemi daha da dərinləşdirir. Digər banklara da imkan yaradılmalıdır ki, ölkə vətəndaşları mövcud şəraitdən daha səmərəli istifadə edə bilsinlər. Sadəcə “Kapital Bank”ın kartlarına əməkhaqqının köçürülməsi digər 28 bankın bankomatlarının səmərəsiz formada fəaliyyətinə səbəb olur. Əməkhaqqının verilməsi zamanı bir neçə bankın bankomatlarının qarşısında uzun-uzadı növbə yaranır. Bu problemin qarşısını almaq üçün aidiyyəti qurum bu məsələyə xüsusi nəzarət etməlidir”.

Günel CƏLİLOVA

Son xəbərlər