Azərbaycan dövlətinin həyata keçirdiyi sosialyönümlü siyasətin əsasını xalqımızın rifah halının yüksəldilməsi, onun bütün qayğı və çətinliklərdən xilas edilməsi təşkil edir. Prezident İlham Əliyev sosial siyasət sahəsində hər bir addımı xalqı düşünərək atır desək yanılmarıq. Bunu son bir neçə ayda ölkə başçısının ard-arda imzaladığı sosial sərəncamlar, fərmanlar da təsdiqləyir. Qəbul edilən bütün qərarların hədəfi Azərbaycan xalqının sosial rifah halının yüksəldilməsi, onun həyat şəraitinin yaxşılaşdırılmasıdır.
Bu gün insanların ən çox ehtiyacı olan qida məhsulları arasında bəlkə də birinci yeri çörək tutur. Milli-mənəvi dəyərlər baxımından yanaşdıqda çörək həm müqəddəsdir, həm də insanların qida rasionunun özəyini təşkil edir. Prezidentin çörəklə bağlı qəbul etdiyi qərar əhalinin bütün təbəqələri, o cümlədən də aztəminatlı ailələr tərəfindən müsbət qarşılanır.
Məlum olduğu kimi, Prezident İlham Əliyev Vergi Məcəlləsində dəyişiklik edilməsi haqqında qanunu imzalayıb. Bu, çörəyə tətbiq olunan vergi güzəştinin müddətinin uzadılması ilə bağlıdır. Dəyişikliyə əsasən, Azərbaycanda buğdanın idxalı və satışı, buğda ununun və çörəyin istehsalı və satışı daha 1 il vergidən azad olunacaq. Yəni vergidən azadetmə 2020-ci ili də əhatə edəcək. Bu güzəşt 2017-ci ildən tətbiq edilir.
Güzəştlər kəpəyin istehsalı və satışına da aiddir. Belə ki, Məcəllənin 164-cü (Vergi ödəməkdən azad edilmə) maddəsinə də "kəpəyin istehsalı və satışı - 2019-cu il martın 1-dən 2 il müddətinə" sözləri əlavə olunub.
Ölkə başçısının bu fərmanını şərh edən ekspertlər bildirirlər ki, Prezidet bu addımı atmaqla apardığı uğurlu sosial siyasətin əhalinin rifah halının yaxşılaşdırılmasına yönəldiyini bir daha ortaya qoydu. Ekspertlər qeyd edirlər ki, un məhsullarının satışının daha bir il vergidən azad olunması Prezidentin hər addımda əhalini düşünməsi deməkdir. Bu istiqamətdə vergi güzəştinin tətbiq edilməsi ona imkan verəcək ki, çörəyin qiymətində hər hansı bir artım olmasın, qiymətlər sabit qalsın. Ümumiyyətlə, Prezidentin əsas məqsədi qida məhsullarının qiymətinin əhalinin imkanlarına uyğun olmasına nail olmaqdır.
Əli Əlirzayev: “Dövlətin sosial istiqamətdə həyata keçirdiyi siyasətin əsas hədəfi Azərbaycan xalqının ehtiyacsız, qayğısız, problemsiz həyat sürməsidir”
İqtisadçı-ekspert Əli Əlirzayev “Bakı-Xəbər”ə bildirdi ki, Prezident belə bir fərman imzalamaqla bir daha Azərbaycan xalqının rifah halının daha da yüksəlməsini düşünür. O hesab edir ki, ümumiyyətlə, dövlətin humanitar və sosialyönümlü bütün layihələri, qəbul etdiyi qərarları cəmiyyətimizin qayğısızlığına, firavanlığına xidmət edir. “İnsanın ən çox tələbatı olan çörəkdir, digər qida məhsullarıdır. Çörəyin qiymətinin stabil qalması çox müsbətdir. Bilirsiniz ki, çörək, un məmulatları aztəminatlı ailələrin istehlakının əsas faizini təşkil edir. Ona görə də un məhsullarına tətbiq edilən güzəşt ucuzluq yaradır, bu da aztəminatlı ailələrə müsbət təsir göstərir. Gəlirləri aşağı olan ailələr üçün bu olduqca faydalıdır. Prezidentin bu fərmanı çörək istehsalı ilə məşğul olan sahibkarları da stimullaşdırır. Bu məsələlər dövlət tərəfindən tənzimlənir. Görürsünüz ki, sahibkarlara güzəştli kreditlər, subsidiyalar verilir, idxalda olan vergilər azaldılır. Vergi, ümumiyyətlə, qiymətin üstünə gələn kəmiyyətdir. Vergi nə qədər az olsa, qiymət də aşağı düşər. Çörəyin və digər ərzaq məhsullarının qiymətinə nəzarət sisteminin tətbiq olunması əhalinin ərzaq təhlükəsizliyinin qorunmasıdır. Çörəyin istehsalına və satışına tətbiq edilən vergi güzəşti insanların həyatını qorumağa xidmət edən bir məsələdir. Prezidentin bu məsələ ilə bağlı imzaladığı sosialyönümlü fərman ailələrin qorunmasında, onların sosial rifah halının yüksəlməsində mühüm rol oynayır. Dövlətin sosial istiqamətdə həyata keçirdiyi siyasətin əsas hədəfi Azərbaycan xalqının ehtiyacsız, qayğısız, problemsiz həyat sürməsidir. Çünki atılan bütün addımların mərkəzində Azərbaycan dövlətinin vətəndaşları durur ki, onların da hər birinin sosial qayğısının həlli dövlətin diqqətindədir. Necə ki, bu problemlərin həlli istiqamətində mühüm sosialyönümlü addımlar atılır” -deyə Ə.Əlirzayev qeyd etdi.
İradə SARIYEVA
